سه‌رۆكی فراكسیۆنی به‌ره‌ی توركمان: له داهاتویه‌كی نزیكدا دیالۆگی هه‌ولێر و به‌غدا ده‌ست پێده‌كات
وێستگه نیوز- پشتیوان جه‌مال
سه‌رۆكی فراكسیۆنی به‌ره‌ی توركمان له په‌رله‌مانی كوردستان رایده‌گه‌یه‌نێت له داهاتوویه‌كی نزیكدا دیالۆگی نێوان هه‌رێمی كوردستان و حكومه‌تی عیراق ده‌ست پێده‌كات.
ئایدن مه‌عروف، سه‌رۆكی فراكسیۆنی به‌ره‌ی توركمانی له په‌رله‌مانی كوردستان به وێستگه نیوز-ی راگه‌یاند، دوای بڕیاری دادگای فیدراڵی عیراق بۆ هه‌ڵوه‌شاندنه‌وه‌ی ریفراندۆم و هه‌ڵوێستی حكومه‌تی هه‌رێمی كوردستانیش كه هه‌ڵوێستێكی ئیجابی بوو، وایده‌بینن له داهاتوویه‌كی نزیكدا دیالۆگی هه‌ولێر و به‌غدا ده‌ست پێبكات.
وتیشی: "دواجار هه‌رێمی كوردستان به‌شێكه له عیراق، ئێمه‌ش له‌گه‌ڵ ئه‌وه‌داین هه‌موو پرسه‌كان له‌چوارچێوه‌ی ده‌ستووردا چاره‌سه‌ر بكرێن".
سه‌باره‌ت به‌وه‌ی توركیا چ رۆڵێكی هه‌یه بۆ نزیككردنه‌وه‌ی هه‌ولێر و به‌غدا، ئایدن مه‌عروف وتی "پرسی هه‌رێمی كوردستان و عیراق پرسێكی ناوخۆییه، حه‌یده‌ر عه‌بادی سه‌رۆك وه‌زیرانی عیراقیش جه‌ختیكرده‌وه كه دیالۆگ له‌گه‌ڵ هه‌ولێر پێویستی به هیچ لایه‌ك نییه و پرسێكی ناوخۆییه".
سه‌رۆكی فراكسیۆنی به‌ری توركمانی ئاشكرایكرد، عیراق به‌رپرسیارێتی یه‌كه‌می به‌رامبه‌ر هه‌رێمی كوردستان هه‌یه و ده‌بێت هه‌رێمی كوردستانیش له‌چوارچێوه‌ی ده‌ستووردا كێشه‌كان چاره‌سه‌ر بكات.
به‌ره‌ی توركمانی ئه‌نجامدانی ریفراندۆمی له 25-9-2017 ره‌تكرده‌وه و به‌شداری كۆبوونه‌وه‌ی ئه‌نجومه‌نی باڵای ریفراندۆمیشی نه‌كرد.
PM:07:30:27/11/2017
ئه‌م بابه‌ته 3458
جار خوێنراوه‌ته‌وه
لێرەوە کۆمێنت بنوسە لە فەیسبوک دەردەکەوێت