ڤیتامین B3 ئومێدی سەرەتایی دەبەخشێت وەک چارەسەرێکی یارمەتیدەر بۆ شێرپەنجەی مێشک

وێستگە ستایل - سۆلین عوسمان

تاقیکردنەوەیەکی کلینیکیی بچووک سەرنج دەخاتە سەر بەکارهێنانی ژەمی بەرزی ڤیتامین

B3 (نیاسین) وەک چارەسەرێکی پاڵپشتیکار بۆ نەخۆشیی گلیۆبلاستۆما، کە یەکێکە لە توندترین جۆرەکانی شێرپەنجەی مێشک لە کەسانی پێگەیشتوودا.

توێژەرانی زانکۆی کالگاری لە کەنەدا لێکۆڵینەوە لەسەر بەکارهێنانی نیاسین لە پاڵ چارەسەری کیمیایی و تیشکی ستاندارد دەکەن، بەو پێیەی نیاسینی ژەم-بەرز ڕەنگە یارمەتی گەڕاندنەوەی ئەو بەشانەی سیستەمی بەرگری بدات کە بەهۆی وەرەمەکەوە سڕ کراون.

لە نێوان یەکەمین ٢٤ نەخۆشدا، لە سەدا ٨٢یان دوای شەش مانگ لە وەرگرتنی چارەسەرەکە، شێرپەنجەکەیان پەرەی نەسەندبوو، کە ئەمەش بە بەراورد بە دەرەنجامەکانی پێشوو ئاماژەیەکی سەرەتایی ئومێدبەخشە، هەرچەندە بەهۆی کەمیی ژمارەی نەخۆشەکان هێشتا ناتوانرێت وەک بەڵگەی یەکلاکەرەوە دابنرێت و توێژینەوەکە بۆ ٤٨ نەخۆش فراوان دەکرێت.

زانایان بە توندی جەخت دەکەنەوە کە نابێت ڤیتامین B3 بە ژەمی بەرز بەبێ ڕێنمایی پزیشک بخورێت، چونکە بەکارهێنانی برێکی زۆر لەم مادەیە دەکرێت زیانی تەندروستیی هەبێت و پێویستی بە چاودێریی بەردەوامە.

نگلیۆبلاستۆماش هەمیشە چارەسەری قورس بووە بەهۆی ئەوەی زوو دووبارە سەرهەڵدەداتەوە.

ئەم هەوڵە دەریدەخات کە چۆن پزیشکان و توێژەران تەنیا بەدوای دەرمانی نوێدا ناگەڕێن، بەڵکو دەیانەوێت پێکهاتە بایۆلۆجییە بەردەستەکان بۆ گۆڕینی ژینگەینوەرەمەکە و بەهێزکردنی بەرگریی جەستە بەکاربهێنن.

(ScienceDaily)

PM:10:43:04/10/2026

ئه‌م بابه‌ته 76 جار خوێنراوه‌ته‌وه‌‌