هۆشدارییەکی بەپەلە؛ مەترسییەکانی زێدەڕۆیی لە بەکارهێنانی پاراسیتامۆڵ و

ئازارشکێنەکان

وێستگە ستایل - سۆلین عوسمان

ئاژانسی دەرمانی ئەورووپی (EMA) هۆشدارییەکی نوێ و توند دەداتە هاووڵاتییان سەبارەت

بە بەکارهێنانی هەڕەمەکی و بێسەروبەری دەرمانە ئازارشکێنەکان، بە تایبەتی

"پاراسیتامۆڵ". ئەم دەرمانە کە بە یەکێک لە باوترین دەرمانەکانی ناو ماڵان

دادەنرێت و زۆربەی کات بێ ڕەچەتەی پزیشک دەستدەخەوێت، ئەگەر بە وریایی

بەکارنەهێنرێت دەتوانێت ببێتە هۆی کارەساتی تەندروستی گەورە.

بەپێی ڕاپۆرتە پزیشکییە نوێیەکان، زێدەڕۆیی لە خواردنی پاراسیتامۆڵ و ئازارشکێنە

هاوشێوەکانی، کاریگەرییەکی ڕاستەوخۆ و مەترسیدار لەسەر جگەری مرۆڤ دروست دەکات.

لە حاڵەتی خواردنی بڕێکی زۆر لەم دەرمانە لە ماوەیەکی کورتدا، ئەگەری لەکارکەوتنی

کتوپڕی جگەر (Liver Failure) زۆر دەبێت، کە ئەمەش مەترسییەکی جیدییە لەسەر ژیانی

کەسەکە. ئاژانسەکە جەخت دەکاتەوە کە نابێت تەنها لەبەر ئەوەی دەرمانەکە بە ئاسانی

دەستدەکەوێت، بە بێ سنوور بەکاربهێنرێت.

هەروەها پزیشکان هۆشداری دەدەن کە بەکارهێنانی درێژخایەنی ئەم ئازارشکێنە بێ ڕاوێژی

پزیشکی، دەبێتە هۆی تێکچوونی سیستمی هەرس و زۆرجار کار دەکاتە سەر فەرمانەکانی

گورچیلەش. مەترسییەکە لەوەدایە کە هەندێک کەس کاتێک هەست بە ئازارێکی توند

دەکەن، چەند دانەیەک لە یەک کاتدا دەخۆن یان بڕی ڕۆژانە تێدەپەڕێنن، بێ ئاگا

لەوەی کە جەستە توانایەکی دیاریکراوی هەیە بۆ تێکشکاندن و فڕێدانی پاشماوەی ئەم

دەرمانانە.

ئاژانسی دەرمانی ئەورووپی ڕێنمایی دەکات کە لە کاتی پێویستدا دەبێت بەکارهێنەر

پابەند بێت بەو بڕەی کە لەسەر پاکەتەکە نووسراوە یان پزیشک دیاری کردووە.

هەروەها جەخت لەسەر ئەوە دەکرێتەوە کە نابێت لە هەر ئازارێکی بچووکدا پەنا بۆ

دەرمان ببرێت، بەڵکو دەبێت ڕێگە بدرێت جەستە هەندێک جار خۆی بەرگری بکات یان ڕێگە

سروشتییەکان بەکاربهێنرێت.

ئەم هۆشدارییە دوای ئەوە دێت کە ئامارەکانی نەخۆشخانەکان زیادبوونی حاڵەتەکانی

ژەهراویبوون بە دەرمانیان نیشانداوە. تەندروستی مرۆڤ سامانێکی گەورەیە و

پاراستنی لە ڕێگەی هۆشیاری دەرمانییەوە، ئەرکێکی سەرەکییە بۆ ئەوەی دووربین

لەو نەخۆشییانەی کە خۆمان بە دەستی خۆمان دروستیان دەکەین.

سەرچاوە: ئاژانسی دەرمانی ئەورووپی (EMA) و ڕێکخراوی تەندروستی جیهانی (WHO)

PM:10:07:05/05/2026

ئه‌م بابه‌ته 104 جار خوێنراوه‌ته‌وه‌‌