بەکتریای گەدە چییە؟
وێستگە ستایل-
هێلیکۆباکتێر پایلۆری (H. pylori) جۆرێکە لە بەکتریا کە تووشی گەدە دەبێت و دەبێتە هۆی دروستبوونی برین و هەوکردن لە ناوپۆشی گەدە یان بەشی سەرەوەی ڕیخۆڵە باریکە کە پێی دەوترێت دوانزەگرێ، هەروەها بۆ هەندێک کەس هەوکردنەکە دەبێتە هۆی شێرپەنجەی گەدە، لەم باسەدا دکتۆر حسێن عەلی پسپۆڕی نەشتەرگەری گشتی ڕوونکردنەوەی زیاتر سەبارەت بەم بەکتریایە دەخاتەڕوو.
تووشبوون بە H. pylori باو و ئاساییە، نزیکەی دوو لەسەر سێی دانیشتوانی جیهان ئەم بەکتریایەیان هەیە، بۆ زۆربەی خەڵک هەرگیز هیچ نیشانەیەکی لێناکەوێتەوە بەڵام باوترین هۆکاری برینی گەدەیە، کە برینی کراوەی ئازاربەخشە لە کۆئەندامی هەرسدا و لە حاڵەتە دەگمەنەکاندا تەنانەت دەتوانێت ببێتە هۆی شێرپەنجەی گەدە.
بەکتریاکانی H. pylori بەزۆری لە کەسێکەوە بۆ کەسێکی تر بڵاودەبنەوە و هەروەها ئەگەری هەیە لە ڕێگەی خواردنی پیس، ئاو، کەلوپەل، دەم بە دەم ماچکردن یان پیسایی و ڕشانەوە بگوازرێتەوە، کاتێک H. pylori دەچێتە ناو جەستەوە، لە ناوپۆشی گەدەدا زۆردەبێت، ئەمەش دەبێتە هۆی لاوازبوونی ناوپۆشەکە، هەروەها ئەگەری ئەوە زیاترە کە ترشەڵۆکەکانی گەدە ببنە هۆی دروستبوونی برینی گەدە.
نیشانەکانی بەکتریای گەدە بریتین لە ئازارێکی مات یان سووتاوی سک کە لەوانەیە هەستەکە بێت و بڕوات، وە لەوانەیە خراپتر بێت کاتێک گەدە بەتاڵ دەبێت و لەوانەیە هەست بە باشتر بوون بکەیت دوای خواردن، خواردنەوەی شیر، یان خواردنی دەرمانی دژە ترش.
نیشانەکانی دیکە بریتین لە:
1- ئاوسانی گەدە.
2- بێ ئارەزووی خواردن.
3- هێڵنج.
4- ڕشانەوە.
5- دابەزاندنی کێش بەبێ هیچ هۆکارێکی ڕوون.
PM:06:54:28/08/2025
ئه‌م بابه‌ته 196
جار خوێنراوه‌ته‌وه