كاهو یه‌كێكه‌ له‌و سه‌وزانه‌ی‌ ئاره‌زووی زۆری له‌سه‌ره‌، به‌ڵام زۆرحار وه‌ك سه‌وزه‌یه‌ك به‌كاردێت كه‌ تێچووی ژه‌مه‌كه‌ كه‌م بكاته‌وه‌، ئه‌مجاره‌ تیمی په‌یمانگای توێژینه‌وه‌ی‌ بایلۆجیای وردیله‌ی‌ ڕوه‌كی  IBMCP كاریان كردوه‌ له‌سه‌ر ده‌ستكاری كردنی پێكهاته‌ی‌ بۆماوه‌ی‌ كاهوو، توانیویانه‌ ئاستی پێكهاته‌ی‌ دژه‌ ئۆكسێنه‌ر كه‌ ناوی"بێتا كارۆتین" ه‌ و جه‌سته‌ بۆ دروستكردنی ڤیتامین A به‌كاریده‌هێنێت زیاد بكه‌ن ئه‌مه‌ش یارمه‌تی به‌هێزبوونی كۆئه‌ندامی به‌رگری له‌ش ده‌دات و مه‌ترسی توشبوون به‌ زه‌هایمه‌ر و نه‌خۆشییه‌كانی دڵ كه‌مده‌كاته‌وه‌.

بێتا كارۆتین به‌ شێوه‌یه‌كی سروشتی له‌ناو كاهوو و كوله‌كه‌ و په‌تاته‌ی‌ شیریندا هه‌یه‌، به‌ڵام ئه‌م جۆره‌ كاهوه‌ كه‌ پێكهاته‌ی‌ بێتا كارۆتین ی بۆ زیادكراوه‌ ڕه‌نگێكی ئاڵتونی سه‌رنجڕاكێشی هه‌یه‌ و به‌و هۆیه‌وه‌ ناونراوه‌"كاهوی ئاڵتونی"، ئه‌مه‌ش وایكردوه‌ ڕێژه‌ی‌ بێتا كارۆتین 30 جار زیاتر بێت له‌م جۆره‌ كاهوه‌ به‌راورد به‌ كاهوی ئاسایی.

مانویل ڕۆدریگه‌یز، توێژه‌ری سه‌ره‌كی ئه‌م توێژینه‌وه‌یه‌ ده‌ڵێت" تیمی زاناكان سه‌ركه‌وتوو بوون له‌ به‌رهه‌مهێنان و كۆكردنه‌وه‌ی‌ بێتا كارۆتین له‌م جۆره‌ كاهوه‌ نوێیه‌، بۆ ئه‌م كاره‌ش سوود له‌ ته‌كنیكی نوێی ته‌كنه‌لۆجیا و تیشكی به‌هێزی ڕوناكی وه‌رگیراوه‌"