تەلەسکۆپی هابڵی ناسا پێکهاتەی وردی گەلەئەستێرەیەکی لوولپێچی دوور ئاشکرا دەکات

وێستگە ستایل - سۆلین عوسمان

ئاژانسی ناسا وێنەیەکی نوێی تەلەسکۆپی بۆشاییگەری هابڵی بڵاوکردەوە کە گەلەئەستێرەی لوولپێچی "NGC 1827" لە لێوارەوە پێشان دەدات و ڕوانینێکی ورد بە گەردوونناسان دەبەخشێت سەبارەت بە پێکهاتە تۆزاوییەکەی و ئەو ناوچانەی ئەگەری هەیە ئەستێرەی نوێیان تێدا دروست ببێت.

ئەم گەلەئەستێرەیە نزیکەی ٣٧ ملیۆن ساڵی ڕووناکی لە زەوییەوە دوورە و لە کۆمەڵەئەستێرەی کۆڵۆمبادا هەڵکەوتووە؛ بەهۆی ئەوەی کە لە کەنارەوە دەبینرێت، هێڵە تۆزاوییە تاریکەکانی وادەردەکەون کە بە درێژایی گەلەئەستێرەکە دابەش بووبن، لە کاتێکدا بەشە ڕووناکەکانی دیکە پەپکە و ناوەندە قۆقزەکەی دەردەخەن.

ئەم وێنەیە لە چوارچێوەی ڕوپێوییەکی گەردوونی گیراوە کە چاودێریی گەلەئەستێرە سەتەلایتەکانی دەوروبەری ئەو گەلەئەستێرانە دەکات کە هاوشێوەی ڕێگەی شیریین؛ پڕۆژە گەورەکە لێکۆڵینەوە لە ٢٦٠ گەلەئەستێرەی پاشکۆ دەکات کە بە دەوری ٢٢ گەلەئەستێرەی خانەخوێدا دەسووڕێنەوە، تاوەکو زانایان لە چۆنیەتیی گەشەکردن و کارلێکی سیستەمە بچووک و گەورەکان تێبگەن.

بەشە شین و درەوشاوەکان بە درێژایی پەپکەی NGC 1827 لەوانەیە ئاماژە بن بۆ ناوچەکانی دروستبوونی ئەستێرەی نوێ، و گەردوونناسان لە تایبەتمەندیی ئەم گەلەئەستێرە بچووکانە دەکۆڵنەوە تا بزانن مۆدێلە گەردوونییەکانی ئێستا تا چەند دەتوانن دروستبوون و پەرەسەندنی سیستەمە گەلەئەستێرەییەکان ڕوون بکەنەوە.

چاودێریکردنەکانی هابڵ جگە لە پێشکەشکردنی وێنەی سەرنجڕاکێش، داتای زانستیی گرنگ دابین دەکەن کە یارمەتی زانایان دەدات لە تێگەیشتن لە چۆنیەتیی گەشەکردنی گەلەئەستێرەکان، هۆکاری جیاوازیی پێکهاتەکانیان و چۆنیەتیی کاریگەریی گەلەئەستێرە هاوەڵە بچووکەکان لەسەر خانەخوێکانیان.

ئاژانسی ناسا (NASA)

PM:09:36:16/10/2026

ئه‌م بابه‌ته 168 جار خوێنراوه‌ته‌وه‌‌