مێتا بە هاوبەشی لەگەڵ کۆمپانیایەکی چینی ڕۆبۆتێکی مرۆڤئاسا دروست دەکات

وێستگە ستایل - سۆلین عوسمان

کۆمپانیای مێتا لە ڕێگەی هاوکاری لەگەڵ کۆمپانیای چینی فۆریەر نموونەیەکی سەرەتایی ڕۆبۆتێکی مرۆڤئاسای بە ناوی "ماکس" پەرەپێداوە و هەنگاوێکی نوێی لە بواری ڕۆبۆتیک ناوە.

پڕۆژەکە لە ماوەی سێ مانگدا پەرەی پێدراوە و باڵای ڕۆبۆتەکە نزیکەی ١.٥ مەتر و کێشی نزیکەی ٤٨ کیلۆگرام دەبێت.

ڕۆبۆتەکە سیستەمی Jetson Thorی کۆمپانیای ئێنڤیدیا بەکاردەهێنێت و خاوەنی دەستی پێنج پەنجەییە بۆ ئەنجامدانی کارەکانی ڕۆژانە، لەگەڵ شاشە و کامێرای ڕووخسار بۆ کارلێکی سروشتی لەگەڵ مرۆڤدا.

هەردوو کۆمپانیا دەستیان کردووە بە کارکردن لەسەر نەوەی دووەمی نموونەکە تا دەست، هەستەوەر و توانای سەرکەوتن بەسەر قادرمەدا باشتر بکەن.

ئەم پڕۆژەیە دیدگای مێتا دەردەخات کە ژیریی دەستکرد تەنها لە کۆمپیوتەر و مۆبایلدا قەتیس نابێت، بەڵکو دەچێتە ناو جەستەی فیزیکی ڕۆبۆتەکانەوە.

دی ئینفۆرمەیشن، پێشبڕکێی ژیریی دەستکرد (AI Race).