توێژەرانی ئاسایشی ئەلیکترۆنی خۆیان بۆ بەرەنگاربوونەوەی نەوەیەکی نوێی هەڕەشەکانی ژیریی دەستکرد و مۆبایل ئامادە دەکەن

وێستگە ستایل - سۆلین عوسمان

توێژەرانی ئاسایشی ئەلیکترۆنی زیاتر سەرنج دەخەنە سەر ئەو هێرشانەی پەیوەستن بە ژیریی دەستکرد، ئامێرە مۆبایلەکان، سیستەمەکانی یاری و تەکنەلۆژیای بەستراوەی بەکارهێنەران. کارنامەی ڕاگەیەندراوی لوتکەی شیکارانی ئاسایشی کاسپەرسکی بۆ ساڵی

٢٠٢٦، توێژینەوە لەسەر سیخوڕیی ئەلیکترۆنیی پێشکەوتوو، ئامێرەکانی ئەندرۆید، لاوازییەکانی بواری یارییەکان و هێرشەکانی پەیوەست بە ژیریی دەستکرد لەخۆدەگرێت.

چاوەڕوان دەکرێت پسپۆڕان لەم لوتکەیەدا لێکۆڵینەوە لەسەر هەڕەشە ئاڵۆزەکان بکەن، لەوانە هێرشە ئاست نزمەکان، کەلێنەکانی سیستەمە مۆبایلەکان و ئەو لاوازییە ئەمنییانەی کە کار دەکەنە سەر پلاتفۆرمەکانی یارییە ئەلیکترۆنییەکان.

هەروەها کۆنفرانسەکە لێکۆڵینەوە لەو هێرشانە دەکات کە ژیریی دەستکرد تێیاندا بەکاردێت. بەشێکی سەرەکیی توێژینەوەکان تیشک دەخاتە سەر دۆزینەوەی ئۆتۆماتیکی کەلێنە ئەمنییەکان لە ڕێگەی سیستەمگەلێکەوە کە بۆ دیاریکردن و پشکنینی کێشەبئەمنییەکان دروستکراون.

ئۆتۆمبێلە بەستراوەکان و سیستەمەکانی ئەندرۆید بوارێکی تری سەرنجپێدانن، کە دەریدەخات ئاسایشی ئەلیکترۆنی لە کۆمپیوتەر و مۆبایلە ئاساییەکان تێپەڕیوە. لە هەمان کاتدا پلاتفۆرمی یارییەکان بوونەتە بوارێکی گرنگی توێژینەوە چونکە کۆنسۆڵ و یارییە ئۆنلاینەکان ڕەقەکاڵای بەهێز، نەرمەکاڵا، خزمەتگوزاریی هەور و کۆمەڵگەیەکی گەورەی بەکارهێنەران پێکەوە گرێدەدەن.

ئەم پێشهاتانە ئەوە دەسەلمێنن کە ئاسایشی ئەلیکترۆنی بووەتە کێبڕکێیەک لە نێوان سیستەمە بەرگرییە خودکارەکان و شێوازە هێرشبەرییە ئۆتۆماتیکییەکاندا کە ڕۆژ لەدوای ڕۆژ پێشکەوتووتر دەبن.

بەگوێرەی کارنامەی فەرمیی لوتکەی ساڵانەی شیکارانی ئاسایش (SAS) لەلایەن کۆمپانیای کاسپەرسکی بۆ ساڵی ٢٠٢٦.

PM:11:44:02/10/2026

ئه‌م بابه‌ته 84 جار خوێنراوه‌ته‌وه‌‌