مۆبایلە زیرەکەکان و چاویلکەی زیرەکیی دەستکرد ململانێی داهاتووی تەکنەلۆژیا دیاری دەکەن

وێستگە ستایل - سۆلین عوسمان

پیشەسازی مۆبایلە زیرەکەکان چووەتە قۆناغێکی تری ململانێی خێراوە، بە جۆرێک کۆمپانیاکان خەریکی دروستکردنی پرۆسێسەری تایبەت بە خۆیانن و وەبەرهێنانی زۆر لە ئامێرە پۆشراوەکانی خاوەن زیرەکیی دەستکرد دەکەن. شیاومی نوێترین پرۆسێسەری خۆی ڕاگەیاند تا پشتبەستن بە دابینکەرە دەرەکییەکان کەم بکاتەوە.

پرۆسێسەرە نوێیەکەی شیاومی بە ناوی "Xring O3" بە تەکنەلۆژیای ٣ نانۆمەتر دروستکراوە و چاوەڕوان دەکرێت لە مۆبایلە پێشکەوتووەکانی داهاتوودا بەکاربهێنرێت. هەروەها کۆمپانیاکە خەریکی پەرەپێدانی چیپی تایبەتە بە ئۆتۆمبێلی بێ شۆفێر و زیرەکیی دەستکرد.

لە هەمان کاتدا، چاویلکە زیرەکەکان وەک ئامرازێکی نوێ بۆ کارلێک لەگەڵ AI دەردەکەون. چاویلکەکانی مێتا سەرنجی زۆریان ڕاکێشاوە، لە کاتێکدا گوگڵ، ئەپڵ و سامسۆنگیش کار لەسەر بەرهەمی هاوشێوە دەکەن.

گەشەی چاویلکە زیرەکەکان بووەتە هۆی دروستبوونی مشتومڕ لەسەر پاراستنی  تایبەتمەندێتی. کامێرا، مایکرۆفۆن و پەیوەندی بەردەوام بە ئینتەرنێتەوە وادەکات ئەم ئامێرانە بە شێوەیەک زانیاری کۆبکەنەوە کە مۆبایلە ئاساییەکان ناتوانن.

لەلایەکی ترەوە، هەندێک کۆمپانیا وەک "Fairphone" جەخت لەسەر درێژخایەنی و چاککردنەوەی مۆبایل و پاراستنی نهێنییەکانی بەکارهێنەر دەکەنەوە، ئەمەش ڕەنگدانەوەی ئارەزووی بەکارهێنەرانە بۆ ئامێرە بەردەوامەکان.

ئەم پەرەسەندنانە دەریدەخەن کە داهاتووی تەکنەلۆژیا تەنها لە مۆبایلەکاندا کورت نابێتەوە، بەڵکو بەرەو چاویلکە و ئامێرە پۆشراوەکان دەچێت کە بە زیرەکیی دەستکرد کار دەکەن.

ڕۆیتەرز، ئەندرۆید سێنتراڵ، فاینانشیاڵ تایمز، ئابی ٢٠٢٦.

PM:11:43:24/08/2026

ئه‌م بابه‌ته 116 جار خوێنراوه‌ته‌وه‌‌