یاریی کۆتایی جامی جیهانی 2026؛ ئەستێرە جیهانییەکان نیویۆرک دەهەژێنن

وێستگە ستایل - سۆلین عوسمان

بڕیارە ڕۆژی 19ی تەمموز، یاریی کۆتایی جامی جیهانیی 2026 لە شاری نیویۆرک بەڕێوەبچێت، کە تیایدا هەردوو هەڵبژاردەی ئیسپانیا و ئەرجەنتین بۆ بەدەستهێنانی نازناوەکە ڕووبەڕووی یەکدەبنەوە. ئاهەنگی کۆتایی ئەم خولە بە یەکێک لە گەورەترین و پڕ بایەخترین ڕووداوەکان دادەنرێت، چونکە ژمارەیەکی بێپێشینە لە ئەستێرە دیارەکانی جیهان تێیدا ئامادە دەبن.

ئەم بۆنە گەورەیە تەنها لە چوارچێوەی وەرزشدا نامێنێتەوە، بەڵکو کۆکەرەوەی ناودارترین کەسایەتییەکانی جیهانە. چەندین ئەستێرەی وەک تۆم کروز، ڕۆبی ویڵیامس، جێنەفەر هەدسن، شاکیرا، مادۆنا و گرووپی BTS، لەگەڵ کریس مارتن و کۆمەڵێک ڤڵۆگەر و یوتیوبەری بەناوبانگ بە فەرمی بەشداری لەو ئاهەنگەدا دەکەن و پێشبینی دەکرێت ببێت بە یەکێک لە گەورەترین بۆنە هونەرییەکانی مێژووی مۆندیال.

ئەوەی جۆش و خرۆشی زیاتر بە ئاهەنگەکە دەبەخشێت، نمایشی گۆرانیبێژەکانە. هەریەک لە شاکیرا و مادۆنا، هاوشانی گرووپی کۆریی BTS و کریس مارتن، گۆرانییەکانی تایبەت بەو بۆنەیە پێشکەش دەکەن. ئەم کۆبوونەوەیەی ئەستێرەکان لە یەک شوێندا، وەک یەکێک لە دەوڵەمەندترین نمایشە هونەرییەکان لە مێژووی وەرزشدا وەسف دەکرێت.

جیانی ئینفانتینۆ، سەرۆکی یەکێتیی تۆپی پێی جیهانی (FIFA)، سەبارەت بەم ئامادەکارییە گەورانە ڕایگەیاند: "ئەمە ساتێکی مێژوویی دەبێت بۆ فیفا و جامی جیهانی. لە گەورەترین بۆنەی وەرزشیی جیهاندا، هونەرمەندانیش بەشدار دەبن و ئەم تێکەڵبوونە وێنەیەکی ناوازە بە جیهان نیشان دەدات."

چاوەڕوان دەکرێت ئەم یارییە و ئاهەنگی کۆتاییەکەی، ڕیکۆردی بینەر لە ئاستی جیهان بشکێنن و وەک یەکێک لە گەورەترین ڕووداوە کلتووری و وەرزشییەکانی سەدەی بیست و یەک لە یادەوەرییەکاندا بمێنێتەوە، کە تێیدا نیویۆرک دەبێتە چەقی سەرنجی ملیارەها مرۆڤ.   

سەرچاوە: فیفا - میدیا جیهانییەکان

PM:05:43:17/07/2026

ئه‌م بابه‌ته 1716 جار خوێنراوه‌ته‌وه‌‌