بەدیعە دارتاش؛ یەکەم خانمە شانۆکاری ئەکادیمی کە مێژووی هونەری کوردی گۆڕی

وێستگە ستایل - سۆلین عوسمان

هونەرمەند بەدیعە دارتاش وەک یەکەمین ژنە شانۆکاری ئەکادیمی لە مێژووی کورددا، بە یەکێک لە سیمبولە هەرە دیارەکانی نواندن و پەروەردەی هونەری دادەنرێت کە ڕێگەی بۆ کارکردنی ئافرەتان لەم بوارەدا خۆش کرد و بووە پێشەنگێکی مێژوویی.

ئەم هونەرمەندە لە ساڵی ١٩٤٦ لە شاری سلێمانی لەدایکبووە و لە کۆتایی شەستەکانەوە دەستی بە خوێندنی باڵای هونەری کردووە لە شاری بەغدا، ئەمەش لەو سەردەمەدا وەرچەرخانێکی گەورە و بوێرانە بوو لە ژیانی ئەودا کە دواتر ڕێڕەوی شانۆی کوردی گۆڕی.

خاتوو بودیعە دارتاش دوای تەواوکردنی خوێندن، گەڕایەوە سلێمانی و وەک مامۆستایەکی لێهاتوو لە پەیمانگای هونەرە جوانەکان خزمەتی کرد. ئەو جگە لە نواندن، لە کاری کارگێڕی هونەریشدا سەرکەوتوو بوو، بە جۆرێک لە ساڵی ٢٠٠٢ بووە سەرپەرشتیاری گشتی سەرجەم پەیمانگاکانی هونەر لە هەرێمی کوردستان.

بەهۆی خزمەتە بەردەوامەکانییەوە بۆ بواری شانۆ و نواندن، لە ساڵی ٢٠٠٥ نازناوی فەرمی "یەکەم خانمە شانۆکاری کورد"ی پێبەخشرا. بۆ ڕێزلێنان لە تەمەنێک لە بەخشین و داهێنان، ئێستا پەیکەرێکی تایبەتی لە ناو جەرگەی شاری سلێمانی و لە پارکی ئازادی بۆ دروستکراوە.

بەدیعە دارتاش تەنها ئەکتەرێک نەبووە لەسەر تەختەی شانۆ، بەڵکو قوتابخانەیەک بووە بۆ پێگەیاندنی نەوەیەکی نوێ لە هونەرمەندان و چەسپاندنی بەها مرۆیی و نەتەوەییەکان لە ڕێگەی هونەری نواندنەوە.

سەرچاوە: ئەرشیفی زانیارییە بایۆگرافییەکانی هونەرمەندانی کوردستان.

PM:10:06:04/07/2026

ئه‌م بابه‌ته 100 جار خوێنراوه‌ته‌وه‌‌