ڕاکردن لە زیندان (Prison Break)؛ ئەو درامایەی بینەری لەسەر شاشەکان کۆت کرد

وێستگە ستایل - سۆلین عوسمان

زنجیرە درامای "Prison Break" یەکێکە لە پڕبایەخترین و سەرنجڕاکێشترین بەرهەمە تەلەفزیۆنییەکانی ئەمریکا کە توانی لە ماوەیەکی کورتدا جیهان داگیر بکات و هەوادارێکی بێشومار بۆ خۆی کۆبکاتەوە.

چیرۆکی زنجیرەکە باس لە "مایکڵ سکۆفیڵد" دەکات، کە ئەندازیارێکی بلیمەتە و بە ئەنقەست تاوانێک ئەنجام دەدات بۆ ئەوەی بچێتە هەمان ئەو زیندانەی کە براکەی "لینکن بۆرۆز" تێیدایە و سزای لەسێدارەدانی بۆ دەرچووە، مایکڵ نەخشەی زیندانەکەی لەسەر جەستەی تاتۆ کردووە و پلانێکی وردی هەیە بۆ ڕاکردن.

ئەوەی ئەم زنجیرەیەی کردووە بە ئەفسانە، تەنها چیرۆکی ڕاکردنەکە نییە، بەڵکو ئەو ململانێ عەقڵییە و وردەکارییە بلیمەتانەی مایکڵە کە لە هەموو ئەڵقەیەکدا بینەر تووشی شۆک دەکات، هەروەها کەسایەتییە جیاوازەکانی وەک (T-Bag) و (Mahone) ڕەهەندێکی قووڵتریان بە دراماکە بەخشیوە.

زنجیرەکە بۆ یەکەمجار لە ساڵی ٢٠٠٥ لە کەناڵی فۆکس نمایشکرا و بۆ ماوەی چوار وەرز بەردەوام بوو، دواتر لە ساڵی ٢٠١٧ وەرزی پێنجەمی بۆ بەرهەم هێنرایەوە، ئەم زنجیرەیە کاندیدی چەندین خەڵاتی گۆڵدن گڵۆب و ئیمی بووە.

پریزۆن برێک تەنها باس لە ڕاکردن ناکات، بەڵکو باس لە قوربانیدان، خۆشەویستی برا بۆ برا و گەندەڵی سیاسی دەکات، ئەمەش وای کردووە تا ئێستاش وەک یەکێک لە باشترین زنجیرەکانی مێژوو ناوی بهێنرێت.

سەرچاوە: پێگەی Rotten Tomatoes

PM:10:05:30/06/2026

ئه‌م بابه‌ته 136 جار خوێنراوه‌ته‌وه‌‌