سلێمانی بە ئاوازی کوردی و فەرەنسی یادی جەژنی موزیک دەکاتەوە؛ پردێکی کلتووری لە تەلاری هونەرەوە دەست پێ دەکات

وێستگە ستایل - سۆلین عوسمان

ئەمڕۆ پێنجشەممە، 11ی حوزەیرانی 2026، شاری سلێمانی وەک مەڵبەندی ڕۆشنبیری و هونەر، میوانداریی چالاکییەکی هونەریی نێودەوڵەتی دەکات. لە تەلاری هونەر، بەڕێوەبەرایەتی گشتی ڕۆشنبیری و هونەری سلێمانی بە هاوبەشی لەگەڵ ئەنستیتوتی فەرەنسی، کۆنسێرتێکی تایبەت بەبۆنەی جەژنی موزیکەوە ساز دەکەن، کە تێیدا هونەرمەندانی ناوخۆیی و فەرەنسی پێکەوە ئاوازەکانیان تێکەڵ بە یەکدی دەکەن و ئەزموونێکی جیاواز پێشکەشی بینەران دەکەن.

ئەم پڕۆژە هونەرییە لە چوارچێوەی هەوڵە بەردەوامەکانە بۆ بەهێزکردنی پەیوەندییە کلتوورییەکانی نێوان هەرێمی کوردستان و وڵاتی فەرەنسا. لە ڕێگەی ئەم کۆنسێرتە هاوبەشەوە، هەوڵ دەدرێت شێوازێکی نوێی ئاڵوگۆڕی هونەری لە نێوان موزیکژەنانی کورد و بیانی پیشان بدرێت، کە ئامانجی سەرەکی لێی دروستکردنی زمانێکی هاوبەشە لە ڕێگەی نۆتە و میلۆدییەکانەوە، بە جۆرێک کە سنوورە جوگرافییەکان ببڕێت و جوانییەکانی هەردوو کلتوورەکە لە یەک شوێندا کۆبکاتەوە.

لەبارەی وردەکاریی ئەم چالاکییە، دانا کەریم، سەرۆکی زۆیا کولتوور، ئاماژەی بەوە کرد کە ئەم پڕۆژەیە ژمارەیەک هونەرمەندی هەردوو وڵات کۆدەکاتەوە و دەرفەتێکی دەگمەنە بۆ بیسەران تا لە یەک کاتدا گوێبیستی ئاوازە ڕەسەنەکانی هەردوو کلتوور بن. ناوبراو ڕایگەیاند کە ئەم جەژنە تەنیا لە کۆنسێرتێکی سادەدا کورت نابێتەوە، بەڵکو هەوڵێکی جدییە بۆ دروستکردنی پردێکی کلتووری و مەعریفی لە نێوان فەرەنسا و کوردستان، کە تێیدا موزیک وەک کەرەستەیەک بۆ لێک نزیکبوونەوەی گەلان بەکاردەهێنرێت.

مێژووی ئەم بۆنەیە بۆ ساڵی 1982 لە وڵاتی فەرەنسا دەگەڕێتەوە، کە دواتر بەهۆی کاریگەرییە گەورەکەیەوە بوو بە دیاردەیەکی جیهانی و ساڵانە لە زۆربەی وڵاتان یادی دەکرێتەوە. فەلسەفەی سەرەکی پشت "جەژنی موزیک" بریتییە لەوەی موزیک لە هۆڵە گەورە و داخراوەکانەوە بگوازرێتەوە بۆ ناو جەرگەی کۆمەڵگە و ناو ژیانی ڕۆژانەی خەڵک، هەر بۆیەش لە زۆربەی وڵاتانی جیهان ئەم بۆنەیە بە شێوەیەکی کراوە و بێ بەرانبەر بۆ هەموو چین و توێژەکان ئەنجام دەدرێت تا هەمووان بەبێ جیاوازی لە چێژە هونەرییەکانی بەهرەمەند بن.

سازکردنی ئەم جەژنە لە سلێمانی، جارێکی دیکە دووپاتکردنەوەی ڕۆڵی ئەم شارەیە وەک پایتەختی ڕۆشنبیری کە هەمیشە پشتیوانی لە هونەر و گەنجان کردووە و دەرگای بۆ دیالۆگی کلتووری واڵا کردووە. لەم کۆنسێرتەدا، ئاوازە فۆلکلۆری و کلاسیکییەکانی کورد لەگەڵ پارچە موزیک و گۆرانییە فەرەنسییەکان ئاوێتە دەبن، ئەمەش هاندەرێکی گەورە دەبێت بۆ هونەرمەندانی گەنج تا تواناکانیان لە کەشێکی نێودەوڵەتیدا بخەنە ڕوو. بڕیاریش وایە دوای وێستگەی سلێمانی، ئەم جەژنی موزیکە لە 13ی حوزەیران بگاتە شاری هەولێر و لە 15ی حوزەیرانیشدا لە شاری دهۆک چالاکییەکانی بەردەوام بن.

PM:04:38:11/06/2026

ئه‌م بابه‌ته 100 جار خوێنراوه‌ته‌وه‌‌