بۆ جاری دووەم سلێمانی دەبێتە ناوەندی بڕیاری ئابووری جیهان؛ کۆڕبەندی دێلفی بە بەشداری وڵاتانی زلهێز بەڕێوەدەچێت

وێستگە ستایل - سۆلین عوسمان

بڕیارە لە ڕۆژانی 6 و 7ی حوزەیرانی ساڵی 2026، شاری سلێمانی جارێکی دیکە ببێتە ڕووگەی دیپلۆماتکاران و ئابووریناسانی جیهان. لە ژێر چاودێری و سەرپەرشتی ڕاستەوخۆی قوباد تاڵەبانی، جێگری سەرۆکی وەزیرانی هەرێمی کوردستان، دووەمین کۆڕبەندی ئابووری نێودەوڵەتی "دێلفی" لە هۆڵی فاوندەیشن لە کارگەی کلتووری سلێمانی بەڕێوەدەچێت. ئەم کۆڕبەندە کە یەکێکە لە سەکۆ گرنگەکانی ناوچەکە، ئامانجیەتی پردێکی پەیوەندی نوێ لە نێوان هەرێمی کوردستان و ناوەندە بڕیاربەدەستەکانی جیهان دروست بکات.

کۆڕبەندەکەی ئەمساڵ لە کاتێکدا ئەنجام دەدرێت کە ناوچەی ڕۆژهەڵاتی ناوەڕاست بە قۆناغێکی هەستیار و پڕ لە گۆڕانکاری جیۆپۆلیتیکیدا تێدەپەڕێت. بڕیارە کۆمەڵێک کەسایەتی باڵا و کاریگەر لەسەر ئاستی کوردستان، عێراق و جیهان، لەگەڵ بەرپرسانی حکومی ئەو وڵاتانەی خاوەن ئابوورییەکی بەهێزن، لە سلێمانی کۆببنەوە. تەوەرە سەرەکییەکانی ئەم کۆبوونەوە فراوانە تەرخان دەکرێت بۆ ئەنجامدانی دیالۆگی چڕ و ورد لەسەر گرنگترین ئاڵنگارییە سیاسی، ئەمنی و ئابورییەکان کە ڕووبەڕووی ناوچەکە بوونەتەوە، بە ئامانجی دۆزینەوەی چارەسەری گشتگیر بۆ سەقامگیری بازاڕ و ئاسایش.

لە پەراوێزی کارەکانی ئەم کۆڕبەندە نێودەوڵەتییەدا، بڕیاربەدەستان و داڕێژەرانی سیاسەت لە وڵاتانی وەک یۆنان، تورکیا، بولگاریا، ڕۆمانیا، جۆرجیا، پۆڵەندا، ئیتاڵیا و فەرەنسا (پاریس) لەگەڵ گەورە بازرگانان کۆدەبنەوە. جەخت لەسەر کۆمەڵێک پرسی ستراتیژی دەکرێتەوە کە گرنگترینیان بریتین لە ئاسایشی ئیقلیمی، داهاتووی کەرتی وزە و پرۆسەی "گواستنەوەی سەوز". هەروەها دۆزینەوەی دەرفەتی نوێی وەبەرهێنان و هەنگاوەکانی حکومڕانی و چاکسازی، بەشێکی تری گفتوگۆکان دەبن کە ئامانج لێیان ڕاکێشانی سەرمایەی بیانییە بۆ هەرێمی کوردستان.

ئەم چالاکییە گەورەیە لە کاتێکدایە کە جیهان لە قۆناغی دوای کێشمەکێشەکان و هەوڵدان بۆ بوژاندنەوەی ئابوورییە، بۆیە بەستنی کۆڕبەندی دێلفی لە سلێمانی، نیشانەی پەرۆشی و پێگەی بەهێزی هەرێمی کوردستانە لە پشتیوانیکردنی گفتوگۆی بنیاتنەرانە. ئەم هەنگاوە دەبێتە هۆی توندکردنەوەی پەیوەندییە ستراتیژییەکانی نێوان ڕۆژهەڵاتی ناوەڕاست لە لایەک و ئەوروپا و ئەمریکا لە لایەکی ترەوە، جگە لەوەی دەرفەتێکە بۆ دووبارە داڕشتنەوەی سیاسەتە ئابورییەکان بە جۆرێک کە لە بەرژەوەندی گەشەپێدانی ناوخۆییدا بێت.

میوانداریکردنی کۆڕبەندی دێلفی بۆ ساڵی دووەم، تەنها چالاکییەکی کاتی نییە، بەڵکو هەنگاوێکی ستراتیژییە بۆ جێگیرکردنی پێگەی سلێمانی لەسەر نەخشەی وزە و ئابووری جیهان. ئەم کۆڕبەندە هانی دیالۆگی ئەرێنی دەدات و دەبێتە پشتیوانێکی بەهێز بۆ جێبەجێکردنی ئەو ڕێوشوێنانەی کە ئامانجیان بەهێزکردنی ژێرخانی ئابوورییە، تەنانەت لە ناو جەرگەی دۆخە دژوار و ناسەقامگیرەکانی ناوچەکەشدا، ئەمەش پەیامێکە کە کوردستان شوێنی پێکەوەگەیشتنی بەرژەوەندییە نێودەوڵەتییەکانە.

نووسینگەی ڕاگەیاندنی جێگری سەرۆک وەزیران - تیمی ڕێکخەری کۆڕبەندی ئابووری دێلفی.

AM:11:16:03/06/2026

ئه‌م بابه‌ته 396 جار خوێنراوه‌ته‌وه‌‌