شۆڕش لە جیهانی مۆسیقادا؛ ڕۆبۆتێک سەرکردایەتی گەورەترین ئۆرکێسترای ڕووسیا دەکات

وێستگە ستایل - سۆلین عوسمان

لە دیمەنێکی سەرنجڕاکێشدا کە تێیدا تەکنەلۆژیا و هونەری ڕەسەن بەیەک دەگەن، ڕۆبۆتێکی سەرکردەی مۆسیقا (ماێسترۆ) لەگەڵ ئۆرکێسترای سیمفۆنی دەوڵەتی مۆسکۆ لە شاری مینسک چووە سەر تەختەی شانۆ. ئەم نمایشە بەشێک بوو لە پڕۆژەی "سیمفۆنیای داهێنانەکان" کە یەکەمین کاری لەو شێوەیەیە لە بێلاڕوسیا بۆ نیشاندانی هێزی ژیری دەستکرد لە بواری کلتووردا.

ئەم کۆنسێرتە ناوازەیە لە کۆشکی کۆمار لە مینسک بەڕێوەچوو، کە تێیدا بەرهەمە نەممرەکانی ئاوازدانەرە گەورەکانی وەک ڕاخمانینۆف، سکیاربین و پرۆکۆفیێف پێشکەش کران. هاوکات لەگەڵ مۆسیقاکە، شاشە گەورەکان و سیستەمە دیجیتاڵییەکان دیمەنی هونەرییان نیشان دەدا کە بە ژیری دەستکرد دروست کرابوون، ئەمەش ئەزموونێکی نوێی بۆ گوێگران و بینەران خوڵقاند.

ئەم چالاکییە تەنها بۆنەیەکی هونەری نەبوو، بەڵکو ڕەهەندێکی سیاسی و دیپلۆماسیشی هەبوو، چونکە هاوکات بوو لەگەڵ واژۆکردنی پلانی هاوکاری کلتووری بۆ ساڵی ٢٠٢٦ لە نێوان وەزارەتەکانی کلتووری ڕووسیا و بێلاڕوسیا. پلانەکە زیاتر لە ١٠٠ پڕۆژەی جیاواز لەخۆدەگرێت، لەوانە گەشتی شانۆیی و پێشانگای هاوبەش، کە ئامانج لێی قووڵکردنەوەی پەیوەندییەکانە لە سایەی ئەو گوشارە نێودەوڵەتییانەی لەسەر هەردوو وڵات هەیە.

ڕوسلان چێرنێتسکی، وەزیری کلتووری بێلاڕوسیا، لە کاتی نمایشەکەدا جەختی لەوە کردەوە کە پێویستە تەکنەلۆژیا بەکاربهێنرێت بۆ گەیاندنی پەیامی کلتووری بە نەوەی نوێ. وتیشی "ئێمە دەبێت بە زمانی گەنجان بدوێین تا بتوانین ناسنامە و مێژووی خۆمان بپارێزین"، ئاماژەی بەوەش کرد کە ژیری دەستکرد نایەت بۆ جێگرتنەوەی مرۆڤ، بەڵکو بۆ دەوڵەمەندکردنی ئەزموونە هونەرییەکانە.

ئەم پڕۆژەیە لە کاتێکدایە کە ڕووسیا و بێلاڕوسیا بەهۆی سزاکانەوە ڕووبەڕووی دابڕانی کلتووری بوونەتەوە لەگەڵ وڵاتانی ڕۆژاوا، بۆیە پەنابردن بۆ ئەم جۆرە داهێنانە تەکنەلۆژییانە وەک پەیامێک دەبینرێت کە ئەوان هێشتا دەتوانن لە پێشەنگی داهێنان بن و کلتووری خۆیان وەک ئامرازێکی دیپلۆماسی نەرم بەکاربهێنن.

سەرچاوە: ئاژانسی هەواڵی بێڵتا (Belta)

PM:07:52:20/03/2026

ئه‌م بابه‌ته 76 جار خوێنراوه‌ته‌وه‌‌