خراپترینەکانی ساڵی سینەما دەستنیشانکران و ئایس کیوب و دیزنی پشکی شێریان بەرکەوت

وەستگە ستایل - سۆلین عوسمان

46ـەمین خولی خەڵاتەکانی "ڕازیی زێڕین" (Golden Raspberry Awards) کە تایبەتە بە دەستنیشانکردنی خراپترین بەرهەم و کەسایەتییە سینەماییەکانی ساڵ، لە ئەمریکا بەڕێوەچوو و تێیدا چەندین سوپرایزی ناخۆش بۆ ئەکتەر و دەرهێنەرە ناودارەکان ئاشکرا کران. لەم خولەدا، فیلمەکەی Ice Cube توانی زۆرترین خەڵاتی سوکایەتیپێکردن کۆبکاتەوە و وەک شکستخواردووترین بەرهەمی ساڵ بناسرێت.

ئەم فیلمە نەک تەنها یەک خەڵات، بەڵکو پێنج خەڵاتی سەرەکیی "خراپترین"ی بردەوە، کە بریتی بوون لە: خراپترین فیلم، خراپترین ئەکتەر، خراپترین دەرهێنەر، خراپترین سکرینپلەی (سیناریۆ) و خراپترین بەشی دووەمی فیلم. ئەمەش ئاماژەیەکی ڕوونە بۆ ئەوەی کە بەرهەمەکە نەیتوانیوە هیچ کام لە پێوەرە هونەرییەکان جێبەجێ بکات و بووەتە مایەی گاڵتەجاڕی ڕەخنەگران.

لە لایەکی دیکەوە، کۆمپانیای دیزنی کە هەمیشە بە کارە ناوازەکانی ناسراوە، ئەمساڵ بە فیلمی Snow White تووشی شکستێکی گەورە بوو. ئەم فیلمە دوو خەڵاتی خراپترینی بردەوە، کە بریتین لە خراپترین ئەکتەری پاڵپشت و خراپترین "سکرین کۆمبۆ" (پێکەوە گونجانی ئەکتەرەکان لەسەر شاشە)، ئەمەش دوای ئەو هەموو ڕەخنە توندانە دێت کە پێشتر لەسەر هەڵبژاردنی ئەکتەرەکان و گۆڕینی چیرۆکە کلاسیکییەکە ئاراستەی کرابوو.

لە بەشەکانی دیکەی خەڵاتەکەدا، ناوی چەند خانمە ئەکتەرێکی ناسراو هات، ڕێبێڵ ویڵسن وەک خراپترین خانمە ئەکتەر دەستنیشان کرا، هەروەها سکارلێت ڕەوز ستالۆن-یش هەمان خەڵاتی پێدرا، کە ئەمەش نیشانەی ئەوەیە ساڵی ڕابردوو بۆ هەندێک لە ئەستێرەکانی هۆڵیوود ساڵێکی پڕ لە شکست و بەرهەمی لاواز بووە.

سەرچاوە: ڕۆژنامەی ڤارایتی و میدیا سینەماییەکان