سەمای ڕۆبۆتەکان لەسەر شانۆ؛ واین مەکگریگۆر سنوورەکانی نێوان مرۆڤ و ئامێر تێکدەشکێنێت

وێستگە ستایل - سۆلین عوسمان

دیزاینەری سەمای جیهانی، واین مەکگریگۆر، لە نوێترین کاری هونەری خۆیدا بە ناوی (Automatons) کە لە لەندەن نمایش کرا، هەموانی تووشی سەرسوڕمان کرد بەوەی کە هیچ سەماکارێکی مرۆڤ لە سەر شانۆکەدا نەبوو، لە جیاتی ئەوە، ١٢ قۆڵی ڕۆبۆتی پێشکەوتووی پیشەسازی سەمایەکی زۆر ورد و پڕ لە هەستیان پێشکەش کرد.

مەکگریگۆر بە هاوکاری لەگەڵ ئەندازیارانی ڕۆبۆت لە زانکۆی ئێدینبەرە، بۆ ماوەی چەندین مانگ کاری لەسەر پرۆگرامکردنی ئەم ڕۆبۆتانە کردووە تاوەکو بتوانن بە شێوەیەکی نەرم و سروشتی بجوڵێنەوە، ئەو وەکو سەماکاری زیندوو مامەڵەی لەگەڵ ئامێرەکاندا کردووە و جوڵەی وای بۆ داناون کە باس لە ماندووبوون، ژیریی دەستکرد و جوانیی میکانیکی دەکەن.

ئەم نمایشە مۆسیقایەکی ئەلەکترۆنی تایبەتی بۆ دانراوە و ڕۆبۆتەکان بە جۆرێک کارلێک لەگەڵ یەکتردا دەکەن کە بۆ مرۆڤ مەحاڵە بەو وردییە ئەنجامی بدات، مەکگریگۆر دەڵێت ئەمە وەک "سەردەمێکی نوێی سەما" دەبینێت کە تێیدا تەکنەلۆژیا و هونەر دەبنە یەک و پرسیار دەربارەی داهاتووی مرۆڤ و ئامێر دەوروژێنن.

بینەرانی ئەم نمایشە ئاماژەیان بەوە کردووە کە جوڵەی ڕۆبۆتەکان چەندە سارد و میکانیکی بووە، بەڵام هاوکات توانای ئەوەشی هەبووە هەستی بینەر بجوڵێنێت، ئەم پڕۆژەیە تاقیکردنەوەیەکی گەورەیە بۆ ئەوەی بزانرێت ئایا "جوانی" دەکرێت لە ڕێگەی کۆد و ئاسنەوە بەرهەم بهێنرێت یان نا

ئەم کارە هونەرییە دەبێتە یەکێک لە باسە هەرە گەرمەکانی جیهانی هونەری هاوچەرخ و نیشانی دەدات کە داهاتووی نمایشە زیندووەکان چیتر تەنها بەند نییە بە توانای جەستەیی مرۆڤەوە، بەڵکو داهێنانە تەکنەلۆژییەکان ڕەهەندێکی نوێ بە هونەر دەبەخشن.

ڕۆژنامەی The Guardian و شانۆی Sadler's Wells

PM:08:06:25/02/2026

ئه‌م بابه‌ته 120 جار خوێنراوه‌ته‌وه‌‌