ماڵئاوایی ؛پیتەر گرین، شەڕەنگێزە خۆشەویستەکەی سینەما لە تەمەنی ٦٠ ساڵیدا کۆچی دوایی کرد

وێستگە ستایڵ - سۆلین عوسمان

پیتەر گرین، ئەو ئەکتەرە خاوەن کاریزمایەی کە بە نیگا تیژەکانی و ڕۆڵە کاریگەرەکانی وەک "دۆریان" لە فیلمی ئەفسانەیی (The Mask) و "زێد" لە شاکاری (Pulp Fiction) ناوی خۆی لە مێژووی سینەمادا نەخشاندبوو، دواجار ماڵئاوایی لە ژیان کرد. کۆچی دوایی ئەم هونەرمەندە لە تەمەنی ٦٠ ساڵیدا، نەک تەنها هۆڵیوود، بەڵکو هەوادارانی سینەمای لە سەرانسەری جیهاندا تووشی شۆک و خەمباری کرد.

ڕووداوەکە پاشنیوەڕۆی ڕۆژی هەینی، ١٢ی کانوونی یەکەمی ٢٠٢٥ [بە کاتی ئەمەریکا] ڕوویدا، کاتێک دەنگۆی دۆزینەوەی تەرمەکەی لە میدیاکاندا بڵاوبووەوە. پۆلیسی نیویۆرک لە ڕاگەیەندراوێکی فەرمیدا ئاشکرای کرد کە تیمەکانیان دوای وەرگرتنی پەیوەندییەک، گەیشتوونەتە شوققەکەی ناوبراو لە شەقامی کلینتن لە شاری نیویۆرک. لە دەوروبەری کاتژمێر ٠٣:٢٥ی پاشنیوەڕۆ، تەرمی بێگیانی ئەکتەرەکەیان دۆزیوەتەوە. تاوەکو ئەم ساتە، تەمومژێکی زۆر بەسەر هۆکاری گیانلەدەستدانەکەیەوە هەیە؛ پۆلیس هیچ ئاماژەیەکی بە تاوان یان خۆکوژی نەداوە، بەڵام جەختی لەوە کردۆتەوە کە لێکۆڵینەوە پزیشکی و ئەمنییەکان بۆ گەیشتن بە ڕاستییەکان بەردەوامن.

لە یەکەم کاردانەوەدا بەرامبەر ئەم کۆستە هونەرییە، گرێگ ئێدوەردز، بەڕێوەبەری کارەکانی پیتەر گرین، بە دڵێکی پڕ لە خەمەوە هەواڵەکەی بۆ ئاژانسەکان پشتڕاستکردەوە. ئێدوەردز لە لێدوانێکدا کە سۆزێکی زۆری پێوە دیار بوو، وتی: "بەڕاستی ئێمە یەکێک لە ئەکتەرە هەرە مەزن و بەتواناکانی نەوەی خۆمان لەدەستدا. ڕەنگە خەڵکی لە ڕێگەی ڕۆڵەکانەوە وەک کەسێکی توند بیبینن، بەڵام لە ڕاستیدا دڵێکی زۆر گەورە و میهرەبانی هەبوو. ئەو تەنها ئەکتەر نەبوو، بەڵکو هاوڕێیەکی نایاب بوو کە بۆ هەمیشە شوێنپەنجەی لە یادەوەریماندا دەمێنێتەوە و زۆر بیری دەکەم."

پیتەر گرین، کە ڕەچەڵەکی دەگەڕێتەوە بۆ ویلایەتی نیوجێرسی، یەکێک بوو لەو ئەکتەرانەی کە خاوەنی شێوازێکی تایبەت (Style) بوو لە نوانdندا. ئەو بەوە ناسرابوو کە دەیتوانی ڕۆڵی کارەکتەرە خراپەکار و ئاڵۆزەکان بە جۆرێک بەرجەستە بکات کە بینەر لە هەمان کاتدا ڕقی لێیان بێت و سەرسامیش بێت پێیان. لوتکەی دەرکەوتنی لە ساڵی ١٩٩٤ بوو، کاتێک ڕۆڵی (دۆریان تایڕێڵ)ی لە فیلمی کۆمیدی و ئاکشنی (The Mask) بینی؛ لەوێدا وەک نەیاری سەرەکیی جیم کێری دەرکەوت و توانی هاوسەنگییەک لە نێوان کۆمیدیا و ترسدا دروست بکات، ئەمەش بووە هۆی ئەوەی ناوبانگێکی جیهانیی بەرفراوان پەیدا بکات.

جگە لەم ڕۆڵە ئایكۆنییە، گرین لە زنجیرەیەک بەرهەمی سینەمایی دیکەدا بەشداریی کردووە کە مۆرکی خۆی لێداون. لە فیلمی (Pulp Fiction)ـی کوێنتین تارانتینۆدا ڕۆڵی "زێد"ی بینی، کە هەرچەندە ڕۆڵێکی کورت بوو، بەڵام بووە بەشێک لە مێژووی سینەما. هەروەها لە فیلمەکانی وەک (Blue Streak)، (Laws of Gravity) و (Training Day) بەشداریی کاریگەری هەبووە، کە هەموویان شایەتحاڵی بەهرە ناوازەکەی بوون لە بەرجەستەکردنی کەسایەتییە یاخی و یاساشکێنەکان.

مەرگ ڕێگەی نەدا گرین دوا پڕۆژەی هونەریی خۆی تەواو بکات، کە بڕیار بوو وێستگەیەکی نوێ بێت لە ژیانی پیشەییدا. بەپێی زانیارییەکان، بڕیار بوو لە کانوونی دووەمی ٢٠٢٧دا دەست بە وێنەگرتنی فیلمێکی نوێ بکات بەناوی (Mascots). ئەم پڕۆژەیە کە ئێستا چارەنووسەکەی نادیارە، دەبووە گەڕانەوەیەکی بەهێز بۆ ئەم ئەکتەرە، بەڵام مەرگ خێراتر بوو و دەرفەتی نەدا جارێکی تر لەبەردەم کامێرادا دەربکەوێتەوە.

بەمەش هۆڵیوود ئەستێرەیەکی دیاری خۆی لەدەستدا کە بۆ هەمیشە بە "خراپەکارە خۆشەویستەکە" دەمێنێتەوە.

سەرچاوە: ئاژانسەکانی هەواڵ و ڕاگەیەندراوی پۆلیسی نیویۆرک