مەرزیە فەریقی لەدایكبووی سالی 1958 لەشاری مەریوانی رۆژهەڵاتی كوردستان، له‌ ته‌مه‌نی لاوێتیه‌وه‌ چۆته‌ دنیای هونه‌ر و خاوەنی چەند گۆرانی و سروودێكی نیشتمانییە.

هه‌تا تەمەنی 17 ساڵی، مه‌رزیه‌ ژیانی لە شاری مەریوان بەسەر بردووە، پاشان بۆ درێژەدان بە خوێندن، ڕوویكردۆتە شاری سنە، لەوێ خوێندنی مامۆستایەتی تەواو كردووە‌و، بڕوانامەی دبلۆمی بەدەستدەهێناوە.







بۆ یەكەمین جار لە تەمەنی 9 ساڵیدا چۆتە سەر شانۆی قوتابخانەكەی‌و، گۆرانیەكی فەتانەی وەلیدی‌ وتۆتەوە، ساڵی 1977 لە‌شاری سنە بە هونەرمەند ناسڕی ڕەزازی ئاشنا بووەو لە ساڵی 1978 زەماوەندیان كردوە،دواتر شاری سنەی رۆژهەڵاتی كوردستان جێدەهێڵن و روودەكەنە ژیانی پێشمەرگایەتی ‌و پاش چەند ساڵێك لە شاخ دواتر بەرەو هەندەران ڕۆیشتوون. 





لە سەرەتای ساڵی 1985وە، لە وڵاتی سوید وەك پەناهەندەیەك لەگەڵ ناسڕی هاوسەری و سێ مند‌اڵەكەی دڵنیا ‌و ماردین و كاردۆ ژیانی بەسەر بردووە لەساڵی 2005 لەكاتی ئەنجامدانی نەشتەرگەری دڵ لە وڵاتی سوید كۆچی دوایكرد.