"فاروق رەفیق" نەئەوەندە رەش بوو، نەبەو ئەندازەیەش سپی

مەرگی فاروق رەفیق، هاوشێوەی "کارەساتێک" دەنگدانەوەیەکی گەورەی بەدوای خۆیدا هێنا، کەس نەما قسەی لەسەر نەکاو "رەحمەتێک" یان "نەفرەتێک"ی بۆ نەنێرێت، تەنانەت ئەوانەشی کە هیچیان لەسەر نەووت، "بێدەنگییان" گەیاندنی پەیامێک بوو!

فاروق رەفیق، گرنگی تەنها لەوەدا بەرجەستە نابێت کە لەکایەی فکرو رۆشنبیریدا پانتاییەکی گەورەی داگیرکردبوو یان نا، یاخود فەیلەسوف‌و خاوەنی پڕۆژەیەکی فیکری بوو یان نا، بەڵکو گرنگی ئەو لەوەدا بوو کە بەدرێژایی سێ دەیەی رابردوو، لەهەموو هەڵبەزو دابەزەکانیدا کە لەمپەڕی چەپەوە بازیدا بۆ ئەوپەڕی راست، بەئەندازەیەک لەگەیاندنی پەیامەکانیدا روون‌و بەتوانا بوو، کە دەیزانی چۆن داکۆکی لەو پرس‌و بابەتانە بکات باوەڕی پێیانبوو، ئەگەر فاروق ببوایە بەپارێزەری "شەیتان"یش، دەیزانی چۆن بەرگری لێبکات‌.

رەنگە هۆکاری ئەم دەنگدانەوە گەورەیە لەبارەی مەرگی فاروق‌و ئەو مشتومڕانەشی سەبارەت بەو بەردەوامن، بەشێکی بگەڕێتەوە بۆ گۆڕانە فکرییە بەردەوامەکانی، ئەوەی دوێنێ ئەو ستایشی دەکرد، ئەمڕۆ وردو خاشی دەکرد، بەشێکی سەرنجڕاکێشیی فاروق لەمەدا بوو کە بەردەوام لەهەڵگەڕانەوە فکرییەکانیدا قسەی تازەی پێبوو، بەپێچەوانەی ئەو رۆشنبیرانەی ساڵەهای ساڵە قسە دووبارەکانیان، وەک حیکایەتی مێش بۆ خەڵکی دەگێڕنەوە. ئەو لەزریانە زۆرەکانی ژیانیدا بابەتی زۆر جیاوازو دژ بەیەکی ورژاند، "کە بەلای رەخنەگرانیەوە یەکێکە لەخاڵە رەش‌و لاوازەکانی".

فاروق هەر رەخنەگرێک نەبوو، کە هیچ کەسێک بەساغی لەرەخنەکانی قوتاری نەبوو، لەڕۆشنبیران‌و میدیاو میدیاکارانەوە بگرە تا دەگات بەخێڵ‌و حزبەکان‌و مەلاکان‌و بەو هاوڕێیانەشیەوە کە رۆژگارێک پڕۆژەی "رەهەند" کۆی کردبوونەوە، بەڵکو ئەوەندە رۆحی "دژایەتی" تیا بەهێز بوو، کە زۆرجار وا دەردەکەوت دروشمەکەی "زۆربا"ی کردبێت بەبنەمای بیرکردنەوەو رێسای ژیانی، کە دەڵێت "رقم لێتانە، بەهەمووتان ناتوانن دڵم خۆش کەن".
ئەو بەئەندازەیەکیش ئیگۆو خۆ بەزلزانی‌و متمانە بەخۆکردنی بەهێز بوو، کە باکی بەوە نەبوو لەکۆتاییدا کەسی بەدەورەوە نامێنێ‌و تاک‌و تەنیا دەکەوێتەوە، خۆی وەک چاوساغێک دەبینی کە لەنێو ئاپۆرایەکی نابینادا، ئەرک‌و پەیامی رێنماییکردنیانی پێسپێردرابێت.

رەنگە خاڵی هەرە بەهێزی ناودارکردنی فاروق، مانەوەی بەردەوامی بووبێت لەکوردستان‌و لەناو خەڵکدا، ئەو دەمێک بوو کوردستانی کردبوو بەوڵاتی هەمیشەیی خۆی، ئێرە گۆڕەپانی هات‌و هاوارو وانەوتنەوەکان‌و مەیدانی هەڵبەزو دابەزو ململانێ‌و زۆرانبازییەکانی فاروق بوو، هەندێکجار ریسکی بەژیانی خۆشیەوە دەکرد، بەتایبەتی رۆژگارێک بەهۆی دژایەتی دەسەڵاتی ستەمکاریی یەکێتی‌و پارتی‌و رۆژگارێکیش بەهۆی دژایەتی ئایین‌و ئیسلامی سیاسییەوە. (ئەگەرچی رۆژگارێک دۆستی ئیسلامییەکان‌و لەکۆتایی ژیانیشیدا هاوڕێی پارتییەکان بوو)!

رەنگە رەخنەگرتن بۆ ئەوانە زۆر ئاسان‌و ئاسایی بێت کە لەدەرەوەی جوگرافیای کوردستاندان‌‌و چییان بوێ بیڵێن‌، بەبێ ئەوەی رووبەڕووی لێپێچینەوە ببنەوە یان کەس ئێخەیان بگرێ، بەڵام لێرە لەشەقام‌و سەراکانی ئەم وڵاتەدا، بوێریی‌و ئازایەتی راستی وتن، (تاوان)ێکە کە نان‌ بڕین‌و سەرشکاندن‌و رەنگە سەربڕینیشی بەدواوە بێت.

فاروق باش درکی بەوە دەکرد کە بۆ هێزە هۆش تاریک‌و ستەمکارەکان، هیچ شتێک هێندەی بەتاڵکردنەوەی وڵات لەخەڵکی تووڕەو هوشیار جێی بایەخ نییە، چونکە گۆڕەپانەکەیان بۆ تەخت دەبێت.

فاروق هەر ئەهلی قەڵەم‌و کتێب نەبوو، بەڵکو لەئاستی شەقام‌و لەناو خەڵکیشدا ناسراوترین‌‌ نوسەرو رۆشنبیر بوو، لەبەرئەوەی کاراکتەرێکی رووداوە گەورەکانی وەک "سەرای ئازادی" بوو، کە سەردەمانێک پڕ بەگەرووی دوژمنایەتی خۆی بۆ ئەم دەسەڵاتە ستەمکارە رادەگەیاندو پاش چەند ساڵێکیش لەسایەو بەسپۆنسەری ئەو دەسەڵاتەی دوێنێ بەستەمکار ناوی دەبرد، درێژەی بەپڕۆژە فکرییەکانی دەدا.

کاری فاروق تەنیا کورت نەدەبۆوە بۆ نووسینی چەند کتێبێک "کە ژمارەیەک خوێندەواری دیاریکراو بیخوێننەوە"، بەڵکو کەسێکی مەیدانی‌و کارای ناو خەڵک‌و رووداوەکانیش بوو، ئەو چەند لەناو رۆشنبیران‌و خوێندەواراندا ناسرابوو، دوو هێندە لەناو خەڵکی کوچەو بازاڕیشدا ناودار بوو (بەئەندازەیەک کە براندێکی ئوتۆمبێلێکیان بەناوی فاروق رەفیقەوە ناونابوو).
بەدڵنیایی فاروق نەئەوەندە رەش بوو کە نەیارەکانی دەیڵێن‌و نەبەو ئەندازەیەش سپی بوو کە هەوادارانی بانگەشەی بۆ دەکەن‌‌، ناکرێ ئەو وەک "موقەدەس"و لەسەروو رەخنەشەوە سەیربکرێت.

جا تۆ "هاوڕایت" یان "ناکۆکیت" لەگەڵ بۆچوونەکانی‌و ئەو ڕەخنانەی کە ئاڕاستەی دەسەڵات‌و ئایین‌و کۆمەڵگاو خەڵکی کردووە، هیچ لەو راستییە ناگۆڕێت‌ کە ناتوانیت نکۆڵی لەڕۆڵی دیارو گرنگی ئەو لەکایەی رۆشنبیریدا بکەیت‌و درک بەوەش نەکەیت کە بەمەرگی فاروق رەفیق، کوردستان نوسەرێکی گەورەو چالاکی لەدەست دا

PM:12:05:07/05/2026

ئه‌م بابه‌ته 84 جار خوێنراوه‌ته‌وه‌‌

هەموو وتارەکان کاتێک لە وێستگە نیوز بڵاودەبێتەوە تەنها بیروبۆچونی خاوەنەکانێتی