لەبارەی دابەزینی نرخی بەنزین روونکردنەوە دەدرێت
وێستگەنیوز-
وەزارەتی سامانە سروشتییەکانی حکومەتی هەرێمی کوردستان بڕیاریدا کە رێگە بە بازرگانان بدرێت لە ناوەڕاست و خوارووی عێراق نەوت هاوردەبکەن، ئەمەش کاریگەری لەسەر دابەزینی نرخی بەنزین دەبێت لە بازارەکانی هەرێم.
ئەمڕۆ یەکشەممە 8ی ئەیلولی 2024، رامیار رزگار، وتەبێژى بازاڕى سووتەمەنى لە پارێزگاى سلێمانی بە وێستگە نیوزی راگەیاند، "بریارەکەی وەزارەتی سامانە سروشتییەکان بە مەبەستی رێگریکردنە لە روودانی قەیران و بەرزبوونەوەی نرخی بەنزین، ئەو بڕیارەش هاوکاری بازرگانان دەکات بەمەبەستی هاوردەکردنی بەنزین لە ناوەراست و باشووری عێراق بە مەبەستی زیادبوونی لە وێستگەکان و دابەشبوونی بەسەر هاوڵاتییاندا".
ئاماژەی بەوەشکرد، "ئەم بریارە دلخۆشکەرە بۆ هاوڵاتییان و یارمەتی بازرگانان دەدات کە بەنزین و سووتەمەنی لە پارێزگاکانی عێراق هاوردەبکەن و ببێتە هۆی دابەزینی نرخی بەنزین لە داهاتوودا ئەگەر بەهای دۆلاری ئەمریکی بەرامبەر بە دیناری عێراقی لە ئاستێکی جێگیردا بمێنێتەوە".
ئەمەش لەکاتێکدایە لەئێستادا نرخی لیترێک بەنزینی نۆرماڵ لە بەنزینخانەکان 925 دینارە ئەمەش نیگەرانی لای شۆفێران دروستکردووە، بۆیە پێدەچێت بەم بڕیارەی وەزارەتی سامانە سروشتییەکانی حکومەتی هەرێم نرخی بەنزین بۆ هەر لیترێک 50 بۆ 100 دینار دابەزێت.
AM:08:26:08/09/2024
ئه‌م بابه‌ته 12800
جار خوێنراوه‌ته‌وه
لێرەوە کۆمێنت بنوسە لە فەیسبوک دەردەکەوێت