مەکتەبی سیاسی یەکێتی: هەڵوێستمان نەگۆڕە و هەڵبژاردن لە وادەی خۆیدا بکرێت


وێستگه‌ نیوزـ

كۆبونه‌وه‌ی مه‌كته‌بی سیاسی یه‌كێتی كه‌ بافڵ تاڵه‌بانی، سه‌رۆكی یه‌كێتی سه‌رپه‌رشتیی كرد، كۆتایی هات له‌ راگه‌یه‌ندراوی كۆبونه‌وه‌كه‌دا جه‌ختی له‌سه‌ر نه‌گۆریی هه‌ڵوێستی یه‌كێتی بۆ ئه‌نجامدانی هه‌ڵبژاردن كراوه‌ته‌وه‌و داواكراوه‌ پرۆسه‌كه‌ دوانه‌خرێت له‌و واده‌یه‌دا به‌رێوه‌بچێت كه‌ بۆی دیاریكراوه‌.

به‌پێی میدیاكانی یه‌كێتی یەکێک لە تەوەرە سەرەکییەکانی كۆبونه‌وه‌كه‌ پرسی هەڵبژاردن و نوێترین پێشهاتەکان و ئەنجامی سەردانەکەی بافڵ تاڵەبانی، سەرۆکی یەکێتی نیشتیمانی کوردستان بووه‌ بۆ روسیا.

له‌ راگه‌یه‌ندراوی كۆبونه‌وه‌كه‌دا هاتووه‌ كه‌ دیسانەوە یه‌كێتی نیشتمانی كوردستان تەئکید لەسەر هەڵوێستی نەگۆڕ و مەبدەئی خۆی ده‌كاته‌وه‌ به‌وه‌ی لەگەڵ ئەنجامدانی هەڵبژاردنی پەرلەمانی کوردستاندایە  لەوادەی دیاریکراوی خۆی لە ( ١٠-٦- ٢٠٢٤).

سه‌باره‌ت به‌ مووچه‌ و بژێویی خه‌ڵكیش، له‌ راگه‌یه‌ندراوه‌كه‌دا هاتوه‌ كه‌ "مەکتەبی سیاسیی  هەڵوێستی روون و ئاشکرای یەکێتیی تەئکید کردەوە کە ئەمرۆ داخوازی هاوڵاتیان بۆ مووچە و بودجەی  ئاوەدانی و بوژاندنەوە تەنها و تەنها لە رێی پەرلەمان و حکومەتێکی نوێوە دەکرێت کە پشت بەستوو بە بڕیاری خەڵکی کوردستان دەتوانێت پێداگری لەسەر مافە دەستورییەکانی کوردستان  و شایستە داراییەکانی گەلەکەمان  بکات و لەگەڵ حکومەتی فیدراڵی دانوستاندێکی دادپەروەرانە و ئازایانەی لەسەر بکات."

ده‌قی راگه‌یه‌ندراوه‌كه‌:
مەکتەبی سیاسیی  بەسەرپەرشتی هەڤاڵ بافڵ جەلال تاڵەبانی سەرۆکی یەکێتیی نیشتمانیی کوردستان کۆبوووە و دیسانەوە تەئکیدی لەسەر هەڵوێستی نەگۆڕ و مەبدەئی یەکێتیی کردەوە کە لەگەڵ ئەنجامدانی هەڵبژاردنی پەرلەمانی کوردستاندایە  لەوادەی دیاریکراوی خۆی لە ( ١٠-٦- ٢٠٢٤).

لە کۆبوونەوەکەدا  کە ئەمرۆ ٢-٤- لە دەباشان  بۆ تاوتوێکردنی دوا ئامادەکارییەکان و بەرنامەی مەکتەبی هەڵبژاردنی یەکێتیی لەم بوارەدا بەرێوەچوو ، هەڤاڵان بە تێکرا لەگەڵ پابەندێتیی هەموو لایەک بوون بەو وادەی  کە لە لایەن سەرۆکایەتی هەرێمی کوردستانەوە بڕیاری لێدراوە و کۆمسیۆنی  باڵای هەڵبژاردنەکانی عێراقیش ئامادەکاری پێویستی بۆ کردووە.

کۆبوونەوەی مەکتەبی سیاسیی لە سۆنگەی پەرۆشی بۆ پاراستنی قەوارەی هەرێم و ئەزموونی دیموکراتی کوردستان کە خەونی لە مێژینەی گەلەکەمانە و خەباتێکی بێوچانی بۆ کراوە،  هەروا جەختی لەسەر بەرێوەچوونی هەڵبژاردنێکی ئازاد و دیموکرات کردەوە  کە پابەندبوون بە وادە راگەیاندراوەکانی هەڵبژاردنیش بەشێکە  لە ئاماژە جەوهەرییەکانی  پاک و بێگەردی پرۆسەکە، کۆبوونەوە دووپاتیشی کردەوە نوێکردنەوەی دامەزراوە دەستورییەکانی وەک پەرلەمان و حکومەتی هەرێم هەر لە رێی دەنگدانی گشتییەوە دەبێت و رەوایی نوێنەرایەتی گەلەکەشمان بۆ  داکۆکی ماف و ژیان و گوزەرانی هاوڵاتیانیش هەر بەو شێوەیە دابین دەبێت.

مەکتەبی سیاسیی  هەڵوێستی روون و ئاشکرای یەکێتیی تەئکید کردەوە کە ئەمرۆ داخوازی هاوڵاتیان بۆ مووچە و بودجەی  ئاوەدانی و بوژاندنەوە تەنها و تەنها لە رێی پەرلەمان و حکومەتێکی نوێوە دەکرێت کە پشت بەستوو بە بڕیاری خەڵکی کوردستان دەتوانێت پێداگری لەسەر مافە دەستورییەکانی کوردستان  و شایستە داراییەکانی گەلەکەمان  بکات و لەگەڵ حکومەتی فیدراڵی دانوستاندێکی دادپەروەرانە و ئازایانەی لەسەر بکات.

بەشێکی کۆبوونەوەکە تەرخانکرا بۆ هەڵسەنگاندنی دوا سەردانی دیپلۆماسیی سەرۆک بافڵ و وەفدی باڵای یەکێتیی بۆ روسیای فیدرال و دیدارەکانی لە مۆسکۆی پایتەختی ئەو وڵاتە،  کۆبوونەوەکەی مەکتەبی سیاسیی  سەردانەکەی بە سەرکەوتوو  و بنیاتنەرانە لە قەڵەمدا کە دەبێتە مایەی گەشەکردنی  پەیوەندی یەکێتیی و روسیا و پەرەپێدانی زیاتری دۆستایەتی لەگەڵ کوردستان .

مەکتەبی سیاسی یەکێتیی نیشتمانیی کوردستان
٢ ی ٤ ی ٢٠٢٤


PM:06:00:02/04/2024


ئه‌م بابه‌ته 1300 جار خوێنراوه‌ته‌وه‌‌



لێرەوە کۆمێنت بنوسە لە فەیسبوک دەردەکەوێت

هەواڵی پەیوەندیدار

زۆرترین خوێندراو