قوباد تاڵه‌بانی: زیندان شوێنی رۆژنامه‌نووسان و راگه‌یاندنكاران نییه
قوباد تاڵه‌بانی، سه‌رۆكی هاوپه‌یمانی كوردستان
وێستگه نیوز ـ
قوباد تاڵه‌بانی، سه‌رۆكی هاوپه‌یمانی كوردستان رایگه‌یاند، زیندان شوێنی رۆژنامه‌نووسان و راگه‌یاندنكاران نییه، به‌ڵكو شوێنی تاوانبارانه، ئه‌مه‌ش وه‌ك ئاماژه‌یه‌ك بۆ سزادانی ئۆمێد به‌روشكی به سزادانی بۆ ماوه‌ی یه‌ك ساڵ.
ئه‌مڕۆ پێنجشه‌ممه 23ی ئه‌یلوول، بەتۆمەتی ناوزڕاندن و بڵاوکردنەوەی پۆستی فەیسبوک لەسەر پۆلیس و پارێزگاری دھۆک، رۆژنامەنووس ئومێد بەڕوشکی بە سزای ساڵێک زیندانیکردن حکومدرا.
تیمی کوردستانی عیراقی CPT، رایگه‌یاند: لە 22ی حوزەیراندا، ئومێد به‌ڕوشكی بەھەمان تۆمەت سزای ساڵێک زیندانی بەسەردا سەپێندرا و لە ئێستاشدا چاوەڕێی دانیشتنی دادگاییکردنی سێیەمی دەکات کە بڕیاروایە لە 12ی تشرینی یەکەمدا بەڕێوەبچێت و تۆمەتبارکراوە بە سیخوڕیکردن و ئەنجامدانی کاری تێکدەران.
قوباد تاڵه‌بانی، سه‌رۆكی هاوپه‌یمانی كوردستان كه ئه‌مڕۆ بۆ بانگه‌شه‌ی هه‌ڵبژاردن له ئاكرێیه له لێدوانێكدا به رۆژنامه‌نووسانی راگه‌یاند: "ئه‌مڕۆ هه‌واڵی سزادانی رۆژنامه‌نووسێكیان بیست له دهۆك، ئێمه به هه‌موو شێوه‌یه‌ك دژی سزادانی رۆژنامه‌نووسانین".
وتیشی: "زیندان شوێنی رۆژنامه‌نووسان و راگه‌یاندنكاران نییه، به‌ڵكو شوێنی تاوانبارانه".
قوباد تاڵه‌بانی باسی له‌وه‌شكرد: راگه‌یاندنكارێك كه رای خۆی ده‌رده‌بڕێت و ده‌یه‌وێت گله‌ییه‌ك بكات، به‌هیچ شێوه‌یه‌ك هۆكارێك نییه بۆ ئه‌وه‌ی راگه‌یاندنكار سزا بدرێت و زیندانی بكرێت.
قوباد تاڵه‌بانی وتیشی: "ئه‌مه خراپ به‌كارهێنانی دادگایه، من به‌هه‌موو پێگه‌كانمه‌وه به حكومی و حزبی و كه‌سایه‌تیه‌كه‌مه‌وه دژی ده‌وه‌ستمه‌وه".
سه‌رۆكی هاوپه‌یمانی كوردستان باسی له‌وه‌شكرد: "ئه‌گه‌ر ئێمه به‌هێزبین و هێزه ئازادی خوازه‌كان به‌هێزبن، ده‌توانرێت رێگری له‌م جۆره كارانه بكه‌ن كه دژی ئازادی راده‌ربڕین ده‌كرێت".
PM:03:02:23/09/2021
ئه‌م بابه‌ته 2844
جار خوێنراوه‌ته‌وه
لێرەوە کۆمێنت بنوسە لە فەیسبوک دەردەکەوێت