ئاژانسی فرانس پرێس بڵاویكرده‌وه كه فرۆكه موشه‌هاوێژه‌كانی روسیا و چین گه‌ڕانێكی هاوبه‌شیان له نزیك ئالاسكای ئه‌مریكا كردوه‌و واشنتۆنیش ده‌ڵێت كه به‌ریان به‌و فرۆكانه گرتوه.
فه‌رمانده‌یی به‌رگریی ئاسمانیی ئه‌مریكا له به‌یاننامه‌یه‌كدا ئه‌مرۆ پێنجشه‌ممه بڵاویكرده‌وه كه دوو فرۆكه‌ی روسی و دوانی دیکەی چینی له نزیك ناوچه‌ی كایه‌ی به‌رگریی ئاسمانیی ئالاسكادا بوون، به‌ڵام ئه‌و كایه‌ی تیایدا بوون به كایه‌ی ئاسمانیی نێوده‌وڵه‌تی داده‌نرێت.
به‌یاننامه‌كه ده‌ڵێت كه فرۆكه‌كان نه‌یانتوانیوه سه‌روه‌ریی كایه‌ی ئاسمانیی ئه‌مریكا و كه‌نه‌دا ببه‌زێنن و هێزه ئاسمانییه‌كانی ئه‌مریكا رێگه‌یان لێ گرتون.
ئه‌وه‌شی روونكردوه‌ته‌وه كه فرۆكه‌كان هیچ مه‌ترسییه‌كیان دروست نه‌كردوه‌و به‌رگریی ئاسمانیی ئه‌مریكاش به‌رده‌وام ده‌بێت له چاودێریكردنی جوڵه‌ی ركابه‌ره‌كانیان له نزیك ئه‌مریكای باكور.
AM:10:59:25/07/2024