مەسعود بارزانی پەیامێك ئاڕاستەی دانیشتوانی هەریەك لە شارەكانی سلێمانی و هەڵەبجە و ئیدارەی راپەڕین دەكات و تیایدا سوپاسین دەكات بۆ ئەو گردبوونەوە بەجۆش و خرۆشەی دوێنێی مەلعەبەكەی سلێمانی.
بارزانی لەدرێژەی ئەو پەیامەیدا بەتایبەتی ئاڕاستەی خەڵكی سلێمانی و هەڵەبجە و ئیدارەی راپەڕینی كردووە و لە وێبسایتی سەرۆكایەتی هەرێمی كوردستاندا بڵاوكراوەتەوە تیایدا ئاماژە بەوەدەكات، پڕ بە دڵ سوپاس و پێزانینی خۆم ئاڕاستەی ئێوەی ئازیز و نیشتیمانپەروەر دەكەم بۆ ئەو بەشدارییە فراوان و پڕ جۆش و خرۆشەتان لە كۆبوونەوەی جەماوەریی دوێنێ سێشەممە 20-9-2017دا، جۆش و خرۆشی ئێوە پەیامێكی ڕوون بوو بۆ ناوخۆ و دەرەوە كە گەلی كورستان بە یەكڕیزی و یەكدەنگییەوە بەرەو ئامانجی خۆی هەنگاو دەنێت.
مەسعود بارزانی لەو پەیامەیدا روونیشیكردۆتەوە، ئەو كۆبوونەوە جەماوەرییانەی لە رۆژانی رابردوودا بەڕێوەچوون و هاواری پڕ بەگەرووی جەماوەری كوردستان بوو بۆ سەربەخۆیی، بۆخۆی ریفراندۆمێكە و ئێستا هەموو جیهان تێگەیشتووە كە گەلی كوردستان ژێردەستەیی رەتدەكاتەوەو دەیەوێ سەربەخۆ بێت، ئێوەی جەماوەری خۆشەویستی كوردستان بەهەموو حزب و لایەنە سیاسییەكانتان وت كە سەربەخۆیی چەترێكە هەموو ڕەنگ و بیروبۆچوونە سیاسییەكان كۆ دەكاتەوەو ئاڵای كوردستان بەرز ڕادەگرن.
بارزانی لەو پەیامەیدا جەماوەری كوردستان راشیدەگەیەنێت كە دڵنیایە رۆژی 25ی ئەیلول بەهەمان جۆش و خرۆشەوە موژدەی سەركەوتن و سەربەخۆیی دەدەنە شەهیدان و بەسەربەرزییەوە روو لەشەهیدان دەكەن و دەڵێن: ئیدی ژێر دەستەیی تەواو، كاتی سەربەخۆییە.
بارزانی لەو پەیامەیدا بەپێویستیشی دەزانێت، سوپاسی هێزی پێشمەرگەو سەرجەم دەزگا ئیداری و ئەمنییەكان و پۆلیسی هاتوچۆ بكات، بۆ هاوكارییان لەپاراستنی ئاسایشی خەڵك و باشتر بەڕێوەچوونی ئەو كۆبوونەوە جەماوەریانە.
هەر شاد و سەرفراز بن
مەسعود بارزانی
21ـی9ـی2017
د.ف
PM:03:29:21/09/2017