‌وه‌زاره‌تی دارایی خشتەی نوێی دابەشکردنی مووچەی فەرمانبەرانی راگەیاند

وێستگه‌ نیوز ـ

وه‌زاره‌تی دارایی و ئابووری حكومه‌تی هه‌رێمی كوردستان خشته‌ی نوێی دابه‌شكردنی مووچه‌ی مانگی شه‌شی فه‌رمانبه‌ران و مووچه‌خۆرانی راگه‌یان و ئاماژه‌ی به‌وه‌دا رۆژی یه‌كشه‌ممه‌ مووچه‌ی مانگی حوزه‌یرانی وه‌زاره‌تی پێشمه‌رگه‌ ده‌درێت.

وه‌زاره‌تی دارایی و ئابووری حكومه‌تی هه‌رێمی كوردستان له‌ راگه‌یه‌ندراوێكدا كه‌ وێنه‌یه‌كی بۆ وێستگه‌ نیوز نێردراوه‌، تیایدا خشته‌ی نوێی مووچه‌ی مانگی حوزه‌یرانی فه‌رمانبه‌ران و مووچه‌خۆرانی راگه‌یاندووه‌.

وه‌زاره‌تی دارایی له‌ راگه‌یه‌ندراوه‌كه‌دا ده‌ڵێت: "رۆژی‌ یه‌كشه‌ممه‌ 13ی ئابی 2017، مووچه‌ی‌ مانگی‌ شه‌شی‌ ساڵی‌ 2017ی‌ دیوانی‌ وه‌زاره‌تی‌ پێشمه‌رگه‌ و لیواكان دابه‌ش ده‌كرێت".

وه‌زاره‌تی دارایی و ئابووری راشیگه‌یاندووه‌: رۆژانی‌ دووشه‌ممه‌ و سێشه‌ممه‌ 14و 15ی ئابی 2017، مووچه‌ی‌ مانگی‌ شه‌شی‌ ساڵی‌ 2017 ی‌ یه‌كه‌كانی‌ 80 و 70 ی‌ وه‌زاره‌تی‌ پێشمه‌رگه‌ دابه‌ش ده‌كرێت.

وه‌زاره‌تی دارایی ئه‌وه‌شی وتووه‌: "رۆژانی‌ چوارشه‌ممه‌ و پێنجشه‌ممه‌ 16و 17ی 2017، مووچه‌ی‌ مانگی‌ شه‌شی‌ ساڵی‌ 2017 ی‌ فه‌رمانده‌ی‌  پێشمه‌رگه‌ی‌ زێره‌ڤانی‌ و فه‌رمانده‌ی‌ پۆلیسی‌ به‌رگری‌ و فریاكه‌وتن دابه‌ش ده‌كرێت".

پێشتریش سه‌رچاوه‌یه‌كی ئاگادار له‌ وه‌زاره‌تی دارایی و ئابووری حكومه‌تی هه‌رێمی كوردستان به‌ وێستگه‌ نیوزی راگه‌یاندبوو، پێش هاتنی جه‌ژنی قوربان وه‌زاره‌ته‌كه‌یان مووچه‌یه‌كی دیكه‌ ده‌داته‌ فه‌رمانبه‌ران.

سه‌رچاوه‌كه‌ ئاماژه‌ی به‌وه‌شدابوو، پێشبینی ده‌كرێت له‌ ناوه‌ڕاستی مانگی ئابه‌وه‌ خشته‌ی نوێی مووچه‌ رابگه‌یه‌ندرێت و یه‌كه‌م وه‌زاره‌تیش پێشمه‌رگه‌ وه‌ریده‌گرێت.

رۆژی 17ی ته‌مموزی 2017 وه‌زاره‌تی دارایی و ئابووری حكومه‌تی هه‌رێم خشته‌ی دابه‌شكردنی مووچه‌ی مانگی ئایاری فه‌رمانبه‌رانی راگه‌یاند و تا رۆژانی 8 و 9ی ئه‌م مانگه‌ به‌رده‌وام بوو.

حكومه‌تی هه‌رێمی كوردستان له‌ سه‌ره‌تای ساڵی 2016ه‌وه‌ به‌ناوی پاشه‌كه‌وتی مووچه‌وه‌، به‌شێك له‌ مووچه‌ی فه‌رمانبه‌رانی بڕیوه‌، كه‌ پاشه‌كه‌وته‌كه‌ له‌ %30 بۆ %70 ده‌گرێته‌وه‌ و به‌پێی زۆری و كه‌می رێژه‌كه‌ی، مووچه‌ی فه‌رمانبه‌ران پاشه‌كه‌وت كراوه‌.


PM:01:55:10/08/2017


ئه‌م بابه‌ته 13573 جار خوێنراوه‌ته‌وه‌‌