مێژووی هاوچه‌رخی کوردستان له‌ ١١ی ئه‌یلووله‌وه‌ ده‌ستپێده‌کات

‌ئومێد خۆشناو

هەمیشە كورد كێشەی لەگەڵ مێژوودا بۆ دروست كراوە ناوەڕۆكی كێشەكەش لەوەوە سەرچاوەی گرتووە، كە مێژووی ئەو نەتەوەیە مێژووییەكی پڕ لە داگیركاری و ماڵوێرانی بووە واتە دوژمنان و ناحەزانی كورد بە ئارەزووی خۆیان دەرفەتیان بۆ ڕەخساوە تاوەكو مێژووەكەی چەواشە بكەن بە تایبەتی مێژووی ڕاستەقینەی شۆڕشەكانی لەم ڕوانگەیەوە بە تەنیا بیركردنەوە لەوەی كە شۆڕشی مەزنی ئەیلول لە دەرەوەی شۆڕشی گشتگیری نەتەوایەتی كورد بووە كیفایەتە بۆ ئەوەی بڵێن ئەم بیركردنەوەیە بۆ خۆی پێویستە كە شۆڕشێكی هزری بەسەر دا بكرێ، چونكە لە لایەك تێنەگەیشتنە لە چەمكی شۆڕش و عەقلیەتی شۆرشگێڕی، لە لایەكی ترەوە چەواشە كردنی مێژووێكی هەستیاری گەلی كوردستانە بە گەواهی ئەو مێژوونووس و شارەزاییانەی لە ڕوانگەی بێ لایەنییەوە پرسە سیاسییەكانی دەخوێنەوە  لە پێوەری شۆڕشی گەلانی رۆژهەڵات شارەزان دواتر بوونی رێبەر (بارزانی نەمر) وەكو نەخشە داڕێژەری ئەم شۆڕشە بە ئەستۆگرتنی رێبەرایەتی و سەركردایەتی شۆرشەكە خۆی لە خۆیدا گۆڕانێكی نەوعی گەورە بووە لە ڕوانگەی ئەم رێبەر و سەركردەیە لە دایك بووی ڕەحمی كوردایەتی هەڵقوڵاوی ناخی جەماوەر بوو واتە بەرپرسی یەكەمی ڕووداوەكان بوو، بە جۆرێك لەو ئان و ساتەدا هەم ئەركی قورستر بوو هەمیش ئەجندای بەرفراوانتر بوو ئەم پاشخانەی (بارزانی نەمر)یش فاكتەرێك بوو بە مەبەستی خولقاندنی گۆڕانێكی ڕیشەیی بەر لە هەموو شتێك گیانێكی پڕ قەناعەتی بۆ زەروورەتی بزوتنەكە خولقاند و ئەم كاریگەریەش بۆ هەموو پارچەكانی تری كوردستان تەنیەوە و بڵاوبووە، بۆیە جموجۆڵی هزری كوردایەتی كردن، بیرۆكەی خەبات كردن لە پێناو سەندنەوەی مافە نەتەوەییەكان جۆش و خرۆشی خستە تێفكرینی هەموو تاكێكی كورد  هەر ئەمەش بوو كەوای كرد بە سەدان و هەزاران پیر و لاو بوونە پێشمەرگە و بە چەك و تفاقی خۆیانەوە بەشداریان لە شۆڕش كرد و ئەیلولی مەزن لە شۆرشێكی دیاری كراوە بوو بە شۆرشی سەرتاسەری گەلێكی ستەم دیدە و داگیراوی تێنوو بە هەناسەی ئازادی لەم ڕوانگەیەوە ئەم شۆرشە جیاواز لە هەموو شۆرشەكانی دیكەی كورد و بزاڤەكەی قورسایی سیاسی خۆی هەبووە ڕەنگدانەوەی سیاسی گەورەی لێكەوتۆتەوە، چونكە پێداگیریەكانی ئەم رابوون و شۆرشە بنەما و لۆژێكی خۆی هەبوو كە ئەویش لە پەرچە كرداری داگیركاری و سەركوت كردن و زەوت كردنی مافە نەتەوەییەكانی كورد بەرجەستە بوو بەو مانایەی ستراتیژیەتی شۆڕشی مەزنی ئەیلول  گەرم گوڕی شۆرشەكە بناغەیەكی بە تینی هەبووە واتە كاتێك دەبیستین و دەخوێنینەوە لەگەڵ دەست پێكی بانگی حەق بێژی ئەم شۆڕشە داستان و نەبەردییەكانی ئەوا لێشاوی پێشمەرگە لە هەموو پارچەكانی تری كوردستان ڕوویان لە باشوری كوردستان كردووە بوون بە پێشمەرگەی بارزانی ئەمەش لە دوو قەناعەتەوە سەرچاوەی گرتووە، یەكەمیان بوونی سەركردەیەكی خاكی، جەماوەری وەكو (بارزانی نەمر) كە كاریزمایی خۆی بەسەر هەموو بەشەكانی تری كوردستان بە جێهێشتبوو، دووەمیان بڕوا بوون بە گوتاری یەكدەنگی و هاوخەباتی نەتەوایەتی بەوەی كە كورد یەك نەتەوەیە، بەڵام دوژمن دابەشی كردووە، كەواتە كوردیش وەكو گەلانی دیكەی جیهان پێویستە خودان سەروەری نەتەوەیی خۆی بێت.

ماهیەتی ئەم حەقیقەتەش بە بەڵگەی دیكۆمێنتاری بەرجەستەكراو سەلمێندراوە واتە هەر بە تەنیا مێژووێكی نووسراو نییە كە لە لاپەڕەكانی مێژوودا تۆمار كرابێت، چونكە تاوەكو ئەمڕۆش بەشێك لەوانەی پێشەنگی شۆڕشی ئەیلولی مەزن  بوون لە نێوماندا دەژین و دەرهاوێشتەكانی دوای ئەم شۆڕشە بە چاوی خۆیان دەبینن كەچی بە داخەوە جار جار هەندێ ئاوازی ناشاز دەبیستین كە حقدی خۆیان بە بێ لێكدانەوە و دوور لە خوێندنەوەیەكی واقعبینانە و بەبێ مۆراڵی و بە هەڵچوونێكی هستریا ئامێزەوە لە دژی گەورەیی و سەروەرییەكانی ئەم شۆڕشە مەزنە هەڵدەدەڕێژن  لە بایەخی كەم دەكەنەوە گوایە چەشنی شۆڕشەكانی دیكە ژیلەمۆی خێرا كوژایەوە بەبێ ئاگا لەوەی كە ئەو سەركردەیەی شۆِرشی ئەیلولی هەڵگیرساند رۆحی ئەم میللەتە و ئەو پارتەیە كە ئەمڕۆ بێ ركابەر لە گۆرەپانەكەدا خەبات بۆ ئازادی، سەربەخۆیی، دیموكراسی،  مافی مرۆڤ دەكات  فریادرەسی ژێر دەستەكانە.

لێرەوە پێویستە دان بەو راستییە دابنرێ كەوا (بارزانی نەمر) بە پێچەوانەی هاوكێشە سیاسییەكان كە باس لە سەروەری نەتەوە لە نێوان سیستەم و سەروەری سەركردە دەكەن ئەوە (بارزانی نەمر) وەك چۆن لە یەك كاتدا كەسایەتی ئایینی و پێشمەرگە و سەركردەیەكی كاریزما و رێبەری شۆرشێكی نەتەوایەتی ئازادی خواز بوو، چونكە ئەم زاتە كە زۆر جاریش ناوی بە سەركردەی ئەفسانەیی دەبدرێت بێ پەردە و ڕەهەندی سیاسی و سۆسیۆلۆژی خۆی بە پێشمەرگەكانی ئاشنا دەكرد واتە پێوەری هەڵگیرسانی شۆرشی ئەیلول لەو زەمەنە دیاری كراوە دا ساتی هەڵگیرسانی شۆڕشەكە بوو بە فیعلی، كەواتە لە خوێندنەوەی ڕەخنەی چەمكی ئەو شۆڕشە پێویستە هەرەمەكیانە چاو لە حەقیقەتەكان دانەخەین، بەڵكو پێویستە ئاماژ بەو دیسپلینە پڕاگماتیەش بكرێ كە سەركردایەتی شۆڕش نەخشەی بۆ كێشابوو نابێت شوێن پەنجەی هزری (بارزانی نەمر) لە رێبەرایەتی كردنی ئەم شۆڕشە لە بیرخۆمان بەرین كە ئەنجندا و كایزمایەكەی بڕبڕەی پشتی شۆڕش بووە.   

هەر ئەو شێوە بیركردنەوەیەی (بارزانی نەمر) بوو بۆ چارەنووسی كورد پەرەسەندنی ئەمڕۆی نەتەوەیی لێكەوتەوە، كەواتە دەربڕینێكی موحافیزكارانە نییە كە بلێن پێویستە رێبازی (بارزانی نەمر) وەك رێگای ستراتیژی خەباتی ئایندەمان بمێنێتەوە، چونكە ئەم رێبازە مۆركی نوێبوونەوەی بە ناوەڕۆكی خۆیەوە گرتووە، كە دەكرێ بەردەوام خوێندنەوەی تری بۆ بكرێ ئەمرۆش واقعی ناوخۆی پارتیش زۆر بە شەفافانە جێگەی ئیرەی ناحەزانیەتی ئەوانەی لە درێر زەمانەوە دەستیان خستۆتە قورقوراگەی بزوتنەكەیەوە و لە ئاست دەسكەوتەكانی سەرسام و ئیفلیج بوونە كە دەبینن ئەو پارتەی (بارزانی نەمر) ئەلف و بێ یەكەی نووسیوەتەوە رۆژ لە دوای رۆژ خەباتی بە گوڕتر دەبێت زیاتر لەگەڵ چەمكەكانی نوێبوونەوە ئاشنایەتی پەیدا دەكات  ئەندام و لایەنگیرانی لە فراوانبوونی زیاتر دان ئەم پێوەرانەش كیفایەتە بۆ وەڵامدانەوەی ئەوانەی دەیانەوێت حەقیقەتە مێژووییەكان چەواشە بكەن ئەم حەقیقەتانەی پارتی لە تاقیكردنەوەیدا سەركەوتنی بە دەست هێناوە، چونكە سەرۆكەكەی كلیلی بڕیارەكانی بە دەستەوەیە واتە ئەمڕۆش  ئەیلول بەردەوامە بە هەمان ناوەڕۆك، بەڵام بە ستایلێكی دیكە تا گەیشتن بە كەناری ئارام و سەربەخۆیی كوردستان سەوڵی كاروانەكەش لە چنگێكی ئەمین دایە درێژەپێدەری میتۆد و رێبازی بارزانی و لە دایك بووی هەناوی شۆرش و كوردایەتی سەرۆك (مەسعود بارزانی) یە بۆیە مێژووی هاوچەرخ و نوێ كورد لە 11ی ئەیلولی 1961 یەكەوە دەست پێدەكات تا كەناری ئارام بە رێبەرایەتی سەرۆك( مەسعود بارزانی) بەردەوام دەبێت.




PM:02:36:10/09/2021

ئه‌م بابه‌ته 880 جار خوێنراوه‌ته‌وه‌‌



هەموو وتارەکان کاتێک لە وێستگە نیوز بڵاودەبێتەوە تەنها بیروبۆچونی خاوەنەکانێتی