من جاسووسی بەسەر هاوڕێکانمەوە ناکەم!؟

"تکایە دوور لە قسەی زبر"

لە دیمانەیەکی تەلەفزیۆنیدا بەڕێز کاک ئاراس شێخ جەنگی ئەم قسانەی کرد( کاتی خۆی من خۆم فەرمانم بە دادوەرەکان کردووە کە چی بکەن)، وتیشی لە پشتی مام جەلالەوە ئەمرمان بە دادوەران دەکرد و چیمان بویستایە بۆیان دەکردین.

ئەم گشتاندنەی کاک ئاراس هەموو ئەو دادوەرانە دەگرێتەوە کە ئەوسا ئەندامی خێزانی قەزایی زۆنی سەوز بوون و کەسیشیانی لێ نەبواردووە.

من پێم وایە بەشێکی لە قسەکەکانی ڕاستن و بەشێکیشی ناڕاستن، چونکە هەموو دادوەران نە ئەو کاتە نە ئێستاش ئەڵقە لە گوێی دەسەڵات نین، قسەکەی کاک ئاراس هەموو خێزانی قەزایی ناگرێتەوە بەڵکو تەنیا ئەو دادوەرانە دەگرێتەوە کە دەستگرتن بە مێزی دادوەریان لە خۆیان و لە کەرامەتی خۆیان و لەسەروەری یاسا، پێ باڵاتر بووە،تەنیا ئەو دادوەرانە بوونە کە حیزبی دەسەڵات لەڕێی تەزکییەی حیزبییەوە دایانمەزراندوون کە بەشێکیان هەر شایانی ئەو شوێنە هەستیارە نەبوونە چ لەڕووی زانستییەوە چ لەڕووی کەسایەتییەوە، ئەو ماوەیەی من دادوەری لێکۆڵینەوە و دادوەری تاوانی بچوک(کەتن) و ئەندامی دادگای تاوان و سەرۆکی دادکای نەوجەوانان بووم، هەرگیز ڕێگەم نەداوە هیچ کەسێک لە هەچ پایە و پلەیەکی حیزبی و حکومی دابێت، دەست بخاتە کاروباری ئەو دادگایانەی من ئیشم تێدا کردوون، لەم ڕوەوەش بۆ مێژوو دەیڵێم خودی مام جەلال پشت و پەنامان بووە

لەساڵی 1997 ی سەدەی ڕابردوو لە دیدارێکی ڕۆژنامەی کوردستانی نوێدا وتم..دادگای تەحقیق بووە بە دادگای تەکلیف.. دادگای تەکلیف و واسیتە نەک دەستتێوەردان، بۆ بەیانی مام خۆی ڕاستەوخۆ تێلی بۆ کردم و وتی ئەمە هەنگاوی یەکەمە بۆ چاکسازیی دەسەڵاتی دادوەری..وتی ناوم بەرێ بزانم کێن ئەوانەی دەست لە کاروباری قەزا وەردەدەن. وتم مامە گیان با ئەم جارە لێیان ببوورین. وتی، ژمارەی تێلم لات بێ هەر سەرپێچییەکت لە بەرپرسان بینی ئاگادارم بکەرەوە، سەبارەت بەوەش بەیاننامەیەکی دەرکرد و ئیدی تەکلیف و واستەکاری بنبڕ بوو.

من باسی تەکلیف و تەکلیفکاری دەکەم نەک دەستتێوەردان. من بەش بەحاڵی خۆم تا هەموو فایلی کێشەکانم یەک لایی نەدەکردەوە، نامەکانم نەدەخوێندەوە یان هەر نەمدەخوێندنەوە و دوای تەواو بوونی دادگایی بە کارگوزارە بەڕێزەکەم دەگوت تکایە بیاندڕێنە و فڕێیاندە ناو تەنەکەی خۆڵەکە

رۆژێک بەرپرسێکی گەورەی حکومی و حێزبی ئەو سەردەمە داوای کرد سەردانێکی بکەم. پێی گوتم وا بزانە ئێستا تەنیا من و تۆو مام لێرە دانیشتوین و هەموو شتێک نهێنییە و بە نهێنی دەمێنێتەوە، گوتم فەرموو داواکاریت لە من چییە:

تۆ گوتی تۆ بە نهێنی چاو و گوێی حکومەت و یەکێتی بە لە دادگاکاندا، ڕاپۆرتی دەوریمان دەربارەی هەڵس و کەوتی دادگاکان بۆ بنووسە..

نەمهێشت زیاتر درێژە بە قسەکانی بکات و پێم گوت، ببوورن من ناتوانم جاسووسی لەسەر هاوڕێکانم بکەم.. هەستایە سەر پێ و دەستی کردە ملم گوتی لێرەش دیارە هەر ڕۆحی شاعیرانە داگیری کردووی من ئەوەم نەکرد، بەڵام ڕەنگە دادوەر هەبووبن بەبێ ئەوەی کەس داوای لێکردبن خۆیان حەزیان بەو ملشکاندنەی هاوڕێکانیان کردبێ، ئەوەی لە قسەکانی بەڕێز کاک ئاراس جێی سەرنجە گشتاندنیەتی کە هەرگیز هەموو دادوەران کۆیلەی دەسەڵات نەبوونە و نابن، کە کاک ئاراس ئەو قسانە دەکات، ناوو ڕوخساری ئەو دادوەرە ملکەچانەی لەبەر دەستایە، بەڵام ناوو ڕوخساری هەموو دادوەران لە نێو ئەلبوومەکەی بەڕێزیاندا نین

ئەو دادوەرانەی کاک ئاراس باسیان دەکات ، پتر وەک ئەندامی مەڵبەند و وەک ئەندامی لق، لەسەر مێزی دادوەری دادەنیشن، نەک وەک دادوەری عەدالەتخواز.

PM:12:48:23/08/2025

ئه‌م بابه‌ته 2080 جار خوێنراوه‌ته‌وه‌‌

هەموو وتارەکان کاتێک لە وێستگە نیوز بڵاودەبێتەوە تەنها بیروبۆچونی خاوەنەکانێتی