هاوارێکی بێدەنگ و رزگارکردنی ژیان لەبەرامبەر بێباکی فەرمیدا

دۆخی گەلی کورد و دیاردە بەدبەختەکانی وەک خۆکوشتن بەهۆی هەژاری و فرۆشتنی جەستەی مرۆڤ نەک هەر بە ئازارە بەڵکو زۆر نیگەرانکەرن. ئەم کێشانە ئاماژەن بۆ قوڵایی قەیرانە ئابووری و کۆمەڵایەتییەکان لەم کۆمەڵگا زیانلێکەوتووە دا. هەژاری دەتوانێت بە مانای لەدەستدانی هیوا و کەرامەتی مرۆڤ بێت و لە ئەنجامدا مرۆڤ ناچار بکات کردەوەی نامرۆڤانە بەرامبەر جەستەی خۆی و کەسانی دیش ئەنجام بدات کە لە بێدەسەڵاتی ، بێدەسەڵاتی سەرهەڵدەدات.

رۆژانە بەریەککەوتنمان دەبێت لەگەڵ سەرهەڵدانی دیاردەی نەخوازراوو ، هەر ئەم ئێوارەیە بانگەوازێک بۆ( فرۆشتنی بەشێک لە جستە) کرا وە ..ئەو دۆخە بە ئازارە بە ڕوونی دەرخەری بێباکی و بێ هەستی بەرپرسان و دامودەزگاکانی حکومەتە،بەرامبەر کێشە و ئازارەکانی ژیان و گوزەرانی هاووڵاتیان . لە جیاتی گرنگیدان بە پێداویستییە سەرەتاییەکانی خەڵک، مامەڵە لەگەڵ بابەتی پەراوێز و ناپێویست دەکەن. کاتێک تاکەکانی کۆمەڵگا دەگەنە ئاستێک کە بە ناچاری جەستەی خۆیان بفرۆشن یان بیر لە خۆکوشتن بکەنەوە بۆ ئەوەی بتوانن بژین، ئەمە ئاماژەیە بۆ شکستی سیستەمی پشتیوانی و ئابووری.

پەیامی بەهێزی ئەم دۆخە دەتوانێت ببێتە بانگەوازێک بۆ بەرپرسان و بڕیاردەران بۆ ئەوەی بیر لە چارەسەری ڕاستەقینە و ئینسانی بکەنەوە لەبری پشتگوێخستنی کێشەکان. داڕێژەرانی سیاسەت و بەڕێوەبەران پێویستیان بە چارەسەرکردنی کێشە ئابووری و کۆمەڵایەتی و کولتوورییەکان هەیە و ڕێوشوێنی کاریگەر بۆ باشترکردنی دۆخی کۆمەڵگا بگرنەبەر. بەرپرسیارێتی ئەوانە کە یارمەتی خەڵک بدەن لە و دۆخە چەق بەستووە دڵتەنگی و
هەژاری و بێهیوایی ڕزگاریان بێت لە ڕێگەی ڕەخساندنی هەلی کار و پاراستنی کۆمەڵایەتی و بەرنامەی پەروەردە و تەندروستی.

لە کۆتاییدا ئەمە پێویستی بە هاودەنگی و هاوسۆزی کۆمەڵایەتی هەیە. پێویستە هەموومان دەنگی ئەو کەسانە بین کە لە مەترسیدان و کار بکەین بۆ دروستکردنی گۆڕانکاری ئەرێنی لە کۆمەڵگاکەماندا.

PM:07:04:07/07/2025

ئه‌م بابه‌ته 1956 جار خوێنراوه‌ته‌وه‌‌

هەموو وتارەکان کاتێک لە وێستگە نیوز بڵاودەبێتەوە تەنها بیروبۆچونی خاوەنەکانێتی