ڤلادیمر پوتن - عەرابی دیموکراسی

بەڵام پرسیارەکە ئەوەیە، بەڕاست زێلنسکی دیکتاتۆرە ؟ ئایە پوتن ترسی لە دیکتاتۆرێکە،هاوسنوریبێت لەگەڵیدا؟. وەکو لۆکاشینکۆ،(سەرۆکی بیلا ڕوسیا، لەم ساڵدا بۆخولی حەوتەم هەڵبژێردرایەوە، زیاتر لە «٣٠» ساڵە لە دەسەڵاتە)، یان ترسی جدی، لە هاوسنورێکی دیموکراسی بە فۆڕمی ڕۆژئاواهەیە ؟ وەکو ئۆکرانیا ؟ ئایە چارەگە سەدەیەک، مانەوەی پوتن لە کرملن، وەگەرەنتی مانەوەی،لەپۆستەکەی تا ساڵی (٢٠٣٦)، دوای هەمواری دوەمی دەستوری ڕوسیا، لە ساڵی ( ٢٠٢٠)، دەکرێ چی ناولێبنرێت ؟ نمونەیەکی جوانی دیکتاتۆری، یان نمونەیەکی ناشیرینی دیموکراسی؟ هەربەڕاست، پوتن لەبری ئەوروپا، بوە بە عەرابی دیموکراسی ؟

ئەم پێشنیارەی پۆتن ، جگە لە بەرزکردنەوەی، سەقفی داواکاریەکان، بۆ ئاستێکی چاوەڕوان نەکراو، شتێکی تر نیە. لە دوای دەستپێکردنی، کردەوەسەربازیەکانیان، بۆ سەر ئۆکرانیا، وە کاردانەوەی ڕۆژئاواییەکان،بە درێژایی ئەم سێ ساڵەی جەنگ، هەرگیز ڕوسەکان، خۆیان لە هەڵوێستێکی، ئاوا بەهێز نەبینیوە، چ لە مەیدانی جەنگ، وە لەسەر مێزی گفتوگۆ ، پوتن زۆر بەشانازیەوە دەڵێت :جڵەوی بژاردە ستراتیژیەکان، لەدەستی ئێمەدایە .

ئێستا ئاماژەکان، تادێت ڕونتردەبنەوە، ئەمریکا هەمو هێزی فشاری خۆی، بۆسەر چین وە ئێران ئامادەدەکات لە ئایندەدا، لە ڕوی سیاسی ئابوری وە سەربازیەوە، لەسەردانەکەی ئەم دواییەیدا بۆ دورگەکانی گرینلاند،( بەستەڵەکی باکور)، ( جی دی فانس)،جێگرەکەی تڕامپ، بە ئاشکرا دانی بەوەدانا، ئەم دورگانە بۆ ئاسایشی نیشتمانی، ئەمریکاو جیهان گرنگن، تەنانەت تڕامپ دەڵێت:ئەگەربە جەنگیش بێت دەبێت بەدەستی بهێنین،ئەم هەڵوێستە وەک ئامادەکاری سەیردەکرێ، بۆ ململانێی ستراتیژی نوێ،لە ئایندەدا،هەروەها نامەهەڕەشە ئامێزەکانی، بۆ بەکارهێنانی هێزی سەربازی دژی ئێران، لەم ڕۆژانەدا، لەهەمان چوارچێوەدان .

لەکۆتایدا هەفتەی پێشو، هاوپەیمانی ئارەزومەندان،(تحالف الراغبين)،تائێسیا نزیکەی زیاتر،لە (٣٠) وڵاتی ئەوروپی،ئامادەییان پێشانداوە،بەشداربن تیایدا، بۆ پشتیوانی ئۆکرانیا، لە پاریس کۆبونەوە، هەمو هەوڵەکانیان بۆ خۆ ئامادەکردنە، لەڕوی سەربازی، بەتایبەت پڕچەک کردنی سوپاکانیان، وە هاوکاری ئۆکرانیا ، تەنانەت ئامادەن هێزی سەربازی بنێرنە نێو خاکی ئۆکرانیا،ئەمە جگە لە تەرخانکردنی، بوجەی قەبە، بۆسەرمایەگوزاری لە ڕێکخستنەوەی هێزە سەربازیەکانیان، وە تەکنۆلۆژیای سەربازی، لەچوارچێوەی ناتۆ، لە بەرامبەردا، لاڤرۆڤ دەڵێت: ئەوروپا هەڵە مێژویەکانی، دوبارە دەکاتەوە، کاتێک سوپا ئامادەدەکات، بۆ ڕوبەڕوبونەوەی ڕوسیا،چارەنوسی ناپلیۆن و هیتلریان بیر دەهێنێتەوە، داوادەکات پەند لەو مێژوە وەربگرن .

ئەم هەڕەشانە لە کاتێکدایە،ڕۆژانە هێرشی چڕی ئاسمانی، بەتایبەت لە ڕێگەی درۆنەوە، بۆسەر شارو ناوچەکانی ئۆکرانیا، نەک نەوەستاوە یان کەمی نەکردوە،لەکاتێکدا پرۆسەی ئاشتی، لە سعودیە لەگۆڕێدایە،  بەڵکو بەپێچەوانەوە زۆر زیادی کردوە، ئۆکرانیەکان هەموو ئەو هەڵوێست، وەکردەوە دوژمنکارانە، بە هەوڵی خۆدزینەوە لە ئاشتی ناودەبەن، لە پێناو درێژەدان بەجەنگ وە داگیرکاری زیاتر .


                                                          

PM:03:07:08/04/2025

ئه‌م بابه‌ته 1132 جار خوێنراوه‌ته‌وه‌‌

هەموو وتارەکان کاتێک لە وێستگە نیوز بڵاودەبێتەوە تەنها بیروبۆچونی خاوەنەکانێتی