تۆفانی الاقصی و ام المعارك،دوانەیەکی سەرکەوتن

ساڵی ١٩٩٠ سەدام حسێن موجاهید و شەهیدی رێگای ئیسلام کەوتە تەڵەی ئەمریکا وە و پەلاماری کوەیتی برای موسڵمان و هاوخوێنی دا، هەرچەندە کۆمەڵی نێو دەوڵەتیی بە جیهانی عەرەبیی و ئیسلامیشەوە کەوتنە رجاو تکای زۆر تا پاشەکشێ بکات و دەستبەرداری ئەو سەرکێشییە بێت . کەچی ئەو هەر سور بو لەسەر جیهاد و وەدەرنانی فەساد و کوفر و زایۆنی لە ناوچەکە ،کوەیتیشی بەرێگای بەرەو رزگارکردنی قودس ناوبرد .ساڵی ١٩٩١ ئەم کاتە کەوتە جەنگێکی گەورەوە لەگەڵ ئەمریکا و هاوپەیمانانی .جەنگەکەشی ناونا (ام المعارك) ئەم رابەرە موجاهیدەی جیهانی ئیسلام کە ئێستاش لە نێو زۆربەی گەلانی عەرەب و ئیسلام و لە نێو حزبە ئیخوانیی و جانەوەرەکانی تردا لەوانە حەماس سوێند بەسەری دەخورێت ، زۆر قارەمانانە زیاتر لە مانگێك جەنگا، دەیان هەزار سەربازوئەفسەر و دەرەجەداری سپاکەی بە کوشت دا، ماشێنە جەنگییە پڕوکاوەکەی دوای جەنگی هەشت ساڵەی (عێراق —ئێران)ی نابوت تر کرد ،ژێر خانی ئابوریی وێرانتر کرد ،دواتریش لە ژێر خێمەی سفواندا وەزیری جەنگەکەی گرێبەستی خۆ بەدەستەوەدانی بەناوی عێراقەو ئیمزا کرد و دەستبەداری ئوم قەسر و کوێ و کوێش بو . موجاهید سەدام بە رۆژی سەرکەوتنی ام المعارك ی ناوزەد کرد و لە ناو جەماوەردا بە عەقڵێتە پەلاماردەر و کاولکاریکردنە بیابانییەکەی سەجەرەکەی، خۆشحاڵیی بە تەقە کردن دەردەبڕی ، جیهانی عەرەب و ئیسلامیش بە پاڵەوانیان ناودەبرد.

دوای 32 ساڵ جیهان بووە بینەری هەمان فیلمی ئەو جیهاد و سەرەڕۆییە . ئەویش تۆفانی ئەقسا کەی حەماسی تێرۆریست بوو کە پانزدە مانگ خوێن لەبەر گیانی فەڵەستینەکانی کەرتی غەزە چۆڕا ، دەیان هەزار هاووڵاتی کوژران و بریندار بون کە کرابون بەسپەری مرۆیی لەلایەن تێرۆریستەکانەوە ،ژێرخانی خراپی ئابووریی کەرتی غەززە لەوە زیاتر داڕما، هەزاران بینای نیشتەجێ، خوێندنگە ،نەخۆشخانە و شوێنی گشتیی وێران بون و روخان ،کە تێرۆریستە چەکدارەکان خۆیان تیادا حەشار دەدا.

بە کورتی ئەو نوزە بوژانەوەیەی ناوچەکەی بن رکێفی تێرۆریستانی حماس کە هەبو ئەوەش لە ناوچو . کەچی سەرە زلە بێ ئابڕوەکانی حماس ،حزب و گزگلە ئیسلامچییەکانی ناوچەکە ، قەڵەم بەدەستە مێشك وشکەکانی هزر ئیسلامچی ، بە هەمان دەستوری ئیمام و رابەرەکەیان (سەدام حسێن) هەر سورن کە تۆفانی ئەقسا بە هەمان شێوەی ام المعارك سەرکەوتنی بەدەستهێناوە و مەرامەکانی خۆی پێکاوە ، هەمویان بە یەك ریتم و ئاواز ئەو قەوانە سواوەی سەردەمی ناسیۆنالیستی عەرەبی دەڵێنەوە کە لەساڵی ١٩٤٨ەوە بەردەوامە، بەڵام بە بەرگێکی تۆخی ئیسلامچێتییەوە (کە هەردووکیان یەك سەرچاوەن).

نامەوێت خاڵە بەهێزەکانی سەرکەوتنی ئیسراییل لەم وتارەدا ریز بکەم و بەراوردی بکەم لەگەڵ شکست و خاڵە لاوازەکانی حماس و مقاوەمە ئیسلامییەکەی ناوچەکە ،تەنیا ئەوە دەڵێم با هەمووان لە وتاری لۆجیکیی ئیسراییل ورد بینەوە لە ئاست ئاگربڕ و لێکەوتەکانی و بەراوردی بکەین(کە خۆیان بە سەرکەوتو ناونابەن) لەگەڵ وتاری هەڕەمەکیی حماس و تەواوی ئیسلامچییەکان و بەرەی مقاوەمەی ئیسلامچیدا ،سەیر دەکەین هەمان میتۆد و بیرکردنەوەی قادسیەی صدام و ام المعارك ن.

ئەو بیرکردنەوویە هیچ تەفسیر و تەئویلێکی ئیسلامچییە کانی هەردو جیهانی عەرەبیی و ئیسلامیی هەڵناگرێت بە قەڵەمە شکاوە کوردییەکانیشەوە، ئەوە نەبێت کە حەمساوییەکان و هاو بیچم و سۆزدارەکانیان بێ عارن و خوێن رژان و کاولکاری نەهج و باوەڕی فیکری تێرۆریستیانە .واتە ئەوان بۆ ئەوە دەژین کە بکوژن ،بکوژرێن هەر بۆیە کوژرانی خۆیان بە مژدە و خۆشیبەختی لەقەڵەم دەدەن . هەر بۆیە صدام و ئەحمەد یاسینی پەروەردەی موساد و ئەوانی دوای ئەو بە پاڵەوان و کەسایەتییە پڕاگماتیست و واقیع بینەکانی جیهانی دوای جەنگی سارد لە فەڵەستین و دەوڵەتانی تری عەرەبیی، بە سەرشۆڕ و زەلیل ناودەبەن . ئەوانە نازانن کە دانا ترین سەرکردەی عەرەب (شاعبداللەی ئوردن ١٨٨٢-١٩٥١، محمد انور سادات١٩٢٨-١٩٨١ )بون کە زۆر زو درکیان بەوە کرد کۆتایی هێنانە بە خوێن رشتن و جەنگی سەرەڕۆیی و لەگەڵ ئیسراییل و پێکەوە ژیانە.

ئەوەتا مقاوەمەی ناسیونالیستیی و ئیسلامچیی عەرەبیی لە ساڵی ١٩٤٨ ەوە، شەڕی ئیسراییل دەکات کەچی رۆژ بەرۆژ خەڵك و خاك لە دەست دەدەن ،وا ئەمجارە شەڕە خۆ تڕێنەکەی یەحیا سینواریشی چووە سەر .

بە دیوێکی تردا، چۆن صدامی موجاهید بە هەمان بیرکردنەوەی قومارچییە دۆڕاوەکانی لەمەڕ خۆمان رەفتاری کرد، کاتێك دەیدۆڕێنن دەڵێن بە (….ەوە) ،حماسی تێرۆریستیش لە تەوەفانە دۆڕاوەکەیدا هەمان ئسلوبی گرتوەتە بەر، دیارە ئەوە بەسەر حزب اللەی تێرۆریستیشدا جێبەجێ دەبێت، کە ئەوانیش لە بەرەی ئەو مقاوەمەتەدا کە لە خوێن رژان و کاولکاریی زیاتر هیچ مانایەکی تری نییە .

AM:10:18:21/01/2025

ئه‌م بابه‌ته 912 جار خوێنراوه‌ته‌وه‌‌

هەموو وتارەکان کاتێک لە وێستگە نیوز بڵاودەبێتەوە تەنها بیروبۆچونی خاوەنەکانێتی