بێدەنگیی لە بەرامبەر نەهامەتییەکانی کورد؛ شەرمەزارییە بۆ مرۆڤایەتی
شام شەمەی ساڵح
لە ژێر سێبەری بێدەنگی کۆمەڵگەی نێودەوڵەتیدا، سەرۆک کۆماری تورکیا ڕەجەب تەیب ئەردۆغان بەردەوامە لە چەوساندنەوەی دڕندانەی کورد کە ترسناکترین بەشەکانی مێژوومان بیردەخاتەوە. شەرمەزارییە کە چۆن خەڵکێک کە ئازایانە لە دژی دەوڵەتی ئیسلامی شەڕیان کردووە، ئێستا ڕووبەڕووی هەڕەشەی پاکتاوی نەژادی دەبنەوە، لە کاتێکدا جیهان بە مێشکێکی سڕ و دڵی ساردەوە سەیری دەکات.
کاتێک منداڵ بووم، باوکم فێری کردم کە دیموکراسی تەنها گەنجینەیەک نییە، بەڵکو ئەرکێکی ئەخلاقییە، هێزێکە کە لە تاریکی و چەوساندنەوە دەمانپارێزێت. بەڵام ئەو ئازادییەی کە ئێمە لێرە بە بەخشین وەریدەگرین، ئەو یەکسانییەی کە پشتی پێ دەبەستین، بۆ گەلەکەم لە کوردستان هیچ نییە جگە لە خەونێکی بەدی نەهاتوو. خەونێک کە بە دەنگی بۆمبەکان تێکدەشکێت و لە سێبەری چەوساندنەوەدا ون دەبێت کورد لەمێژە یەکێکە لە چەوساوترین گرووپە نەژادییەکانی جیهان. تێکۆشانی ئەوان بۆ مافی چارەی خۆنووسین و مافەکانی مرۆڤ ڕووبەڕووی دژایەتییەکی دڕندانە بۆتەوە لەلایەن دەوڵەتی تورکیاوە کە بە هەڕەشە بۆ سەر یەکپارچەیی خاکی خۆی دەبینێت.
جێگەی گاڵتەجاڕییە کە ناتۆ، رێکخراوێک کە بانگەشەی پاراستنی دیموکراسی و مافەکانی مرۆڤ دەکات، بەردەوامە لە دابینکردنی چەک بۆ تورکیا کە بۆ کوشتنی خەڵکی مەدەنی کورد بەکاردەهێنرێت. لە کاتێکدا ئەندامانی ناتۆ باس لە پاراستنی مافەکانی مرۆڤ دەکەن، دەپرسم ئەم دیموکراسییە لە کوێیە کاتێک تورکیا بە چەکی ناتۆ ناوچە کوردییەکان وێران دەکات و دانیشتوانەکەی دەردەکات؟ ئەمە هەڵوێستێکی دوو ستانداردە کە ناتوانرێت پاساو بدرێتەوە.
کوردەکان نەک تەنها تەماشاکەرێکی نادیار بوون لە شەڕی دژی داعش. ئەوان پاڵەوانی بەرەکانی پێشەوە بوون. شەرڤانانە کوردییەکانی یەپەگە بەشدارییەکی بەرچاوی لە تێکشکاندنی ئەم وەحشییەدا کردووە و باجێکی قورسی خەباتەکەی داوە شەرمەزارییە کە ئەم قارەمانانە ئێستا ناچارن لە ترسی ژیانیاندا بژین. هێرشە سەربازییەکانی دەوڵەتی تورک بۆ سەر شارۆچکە و گوندە کوردنشینەکان بۆتە هۆی دەرکردنی بەکۆمەڵ و قەیرانێکی مرۆیی بە ئەندازەیەکی خەیاڵی. خەڵک ناچار دەبن ماڵ و حاڵی خۆیان بەجێبهێڵن، منداڵان دایک و باوکیان لەدەست دەدەن و زۆربەیان لە شەڕەکاندا گیانیان لەدەستداوە.
سوید وەک بەشێک لە ناتۆش تاوانبارە. بە بەشداریکردن لە فرۆشتنی چەک بە تورکیا، ئێمە یارمەتیدەر دەبین بۆ سووتەمەنی کردنی ئەم زوڵمە. کاتی ئەوە هاتووە کە ئەو پرسیارە لە خۆمان بکەین: ئایا بەڕاستی دەتوانین بەرگری لە بەهاکانمان بکەین کاتێک چاومان دادەخەین بۆ ئەو ئازارانەی کە ڕوودەدەن؟ ئەم بێدەنگییە بێدەنگییەکی تاوانکارانەیە، بێدەنگییەک کە ڕێگە بە ستەم دەدات گەشە بکات.
کۆمەڵگەی نێودەوڵەتی دەبێت ئەوە بزانێت کە وشە چیتر بەس نییە. پێویستە هەڵسوکەوت بکەین کردارەکانمان دەبێت ڕەنگدانەوەی بەهاکانمان بێت. دەبێت فشار بخەینە سەر تورکیا بۆ ئەوەی ڕێز لە مافەکانی کورد بگرێت و ئەو چەک و تەقەمەنییانە ڕابگرین کە بۆ سەرکوتکردن و کوشتنی خەڵکی بێتاوان بەکاردەهێنرێت چاوپۆشی کردن لەم بارودۆخە تەنها شکستێکی ئەخلاقی نییە. ئەوە شەرمەزارییە بۆ مرۆڤایەتی.
تێکۆشانی کورد بۆ ئازادی و دادپەروەری تێکۆشانێکی جیهانییە کە کاریگەری لەسەر هەموومان هەیە ئێستا کاتی ئەوە هاتووە کە بەرگری لەو کەسانە بکەین کە قوربانی زۆریان داوە بۆ ئەوەی ئێمە لە خراپە بپارێزن. چیتر ناتوانین ئازارەکانیان پشتگوێ بخەین. پێویستە ئێستا کار بکەین. چونکە ئەوە تەنها پرسیاری سیاسەت نییە. ئەوە پەیوەندی بە مرۆڤایەتیمانەوە هەیە.
AM:10:45:12/12/2024
ئه‌م بابه‌ته 1556
جار خوێنراوه‌ته‌وه
هەموو وتارەکان کاتێک لە وێستگە نیوز بڵاودەبێتەوە تەنها بیروبۆچونی خاوەنەکانێتی