ئەم سەرۆكە شوێن ڕێنمونیەكانی شەیتان دەكەوێ!

هەروەك چۆن هەڵبژاردنەكانی سەرۆكایەتیی ساڵی 2016 پڕی بوو لە كێبەركێی توندو مشتومڕو ترس و لەرزێكی زۆر لە (دۆناڵد ترەمپ)ی پاڵێوراوی ئەوكات ، بە هەمان شێوە هەڵبژاردنەكانی ئەمجارەی (2024)یش پاڵێوراوی سەركەوتوو هەمان جەدەل و هەراو مشتومڕی لەگەڵ خۆیدا بەڕێكرد ، ئەگەرچی بە ئاسانی سەركەوت و گەڕایەوە كۆشكی سپی !!

(ترەمپ) لە كاتێكدا بوویەوە بە سەرۆك كە پارتە كۆمارییەكەیشی زۆرینەی ( ئەنجومەنی نوێنەران و پیران ) یشی بۆ خۆی مسۆگەركرد ، كە ئەمەش دەست و بازوو و هێزی تەنفیزیی و تەشریعیی (ترەمپ)ی لەنێو جومگەكانی دروستكردنی بڕیار لە ئەمریكادا توندو فراوانتر كرد.

سەركەوتنی (ترەمپ) لە هەڵبژاردنەكانی ئەمجارەدا شۆكێكی گەورە نەبوو هاوشێوەی سەرکەوتنی لە هەڵبژاردنەکانی ساڵی 2016، بەهۆی لاوازی و بێ سەروبەریی هەڵمەتەكانی دیموكراتەكانەوە ، هەروەها ئەو دابەشبوونەی كە كۆمەڵگای ئەمریكا پێوەی دەناڵێنێ ، لەگەڵ لێهاتوویی و سەركەوتنی (ترەمپ) لە هەڵمەتەكانداو، لێزانین و زیرەكی ناوبراو لە دواندنی زۆرینەی دەنگدەران و، چەندین هۆكاری تریش!!

ئێستا (ترەمپ) بە تێگەیشتنێكی زیاتر لە میكانیزمی كاری واشنتۆن و دامەزراوە جیاجیاكانیەوە هەر لە كۆشكی سپییەوە تا دامەزراوەكانی تری دروستكردنی بڕیار ویلایەتی دووەم وەردەگرێتەوە! ئەو ئێستا بە تێگەیشتنی زیاترو قوڵتر لە سروشتی بیركردنەوەی سەرانی عەرەب و خاڵە لاوازو بەهێزەكانیان مامەڵە دەكات ، بەپێچەوانەی ویلایەتی یەكەمیەوە كە تا ئەندازەیەكی زۆر بەدەست بێ شارەزایی ناوخۆیی و دەرەكییەوە گیرۆدە بوو بوو!

لە ئاست ئیدارە داهاتووەكەشیەوە (ترەمپ) توانیویەتی تۆڕێكی دڵسۆز لە ڕاوێژكاران بۆ خۆی دەست نیشان بكات كە زۆر بە ئاسانی سیاسەتەكانی جێبەجێ دەكەن ، جگە لە كۆنتڕۆڵكردنی كۆنگرێس لەلایەن پارتەكەیەوە كە ئەو كۆنتڕۆڵكردنە خۆی لە خۆیدا جێبەجێ كردنی ئەجێنداكان و تێڕوانینەكانی (ترەمپ) لە كۆنگرێسدا ئاسانترو خێراتر دەكات!

ئێستاش دوور لەو مشتومڕەی لە ئارادایە لەمەڕ چۆنیەتی بەڕێوەبردنی سەرۆكایەتییەكەی و، ئەگەری جێبەجێكردنی ئەو پڕۆژەیەی كە نزیكەكانی پێشكەشیان كردووە و بە پڕۆژەی ساڵی (2025) ناسراوە و بەنزیكەی هەزار لاپەڕە مەزەندە دەكرێ ، ئەوەی بەلای منەوە گرنگە لەم نووسینەدا بیخەمەڕوو ئاشكراكردن و خستنەڕووی حەقیقەتی كەسایەتیی و پێكهاتەی شەخسیی و دەروونیی و سیاسیی ئەم سەرۆكە نوێیەیە كە هەمووانی بەخۆیەوە سەرقاڵ كردووە!

( ترەمپ ) چ جۆرە كەسێكە ؟ چۆن بیردەكاتەوە ؟

سەرەڕای ئەوەی (ترەمپ) لەماوەی هەشت ساڵی ڕابردوودا توانیویەتی شارەزاییەكی زیاتر پەیدا بكات ، بەڵام بە سەرنجدان لە لێدوانەكان و وتارەكان و چاوپێكەوتنەكانی ناوبراو هەست دەكەیت هێشتا گۆڕانكارییەكی ئەوتۆ لە كەسایەتیی و پێكهاتە و تێڕوانین و بیروڕا سەرەكییەكانی ئەودا بەدی نەهاتووە ، چ پەیوەست بە ناوخۆ چ پەیوەست بە دەرەوە!

هۆكاری ئەمەش (وەك هەندێك دەڵێن) : دەگەڕێتەوە بۆ ئەوەی (ترەمپ ) نەك تەنها سەرمایەدارێكە و بەڕێكەوت هاتۆتە نێو سیاسەت و دەسەڵاتەوە ، یان لە ئەنجامی بارودۆخێكی مێژوویی ئەمریكا و جیهانەوە كە تێیدا ڕاستڕەویی توندڕەو سەركەوتووە ، بەڵكو هۆكار ئەوەیە (ترەمپ) بەرجەستەكەری نمونەیەكی بێ وێنەی دۆستایەتی شەیتان و دوژمنایەتی خوایە لەم سەردەمەی ئێستای دنیادا!

ئەو ڕاوچییەكی ماددیی سەرسەختە و جگە لە (قازانج و بردنەوە) و شەڕكردن لەپێناو ئەو دوانەدا هیچی تر نازانێ! ئەو بەرجەستەكەری قۆناغێكی مێژووییە كە تێیدا خۆرئاوا لە هەموو فەزیلەت و بەهایەكی مرۆیی جوان و مەعنەویی داماڵڕاوە!

گۆشەنیگاو هەڵسوكەوت و بڕیارەكانی (ترەمپ) نەك تەنها گوزارشت لە كرۆكی شارستانییەتی ڕۆژئاوا دەكەن ، بەڵكو زەقترین و باشترین نمونە و وێنای دەگمەنی دەرخەری ڕووی ڕاستەقینەی ئەو شارستانییەتە دڕندەیەن ، كە دەیەوێ بێ هیچ گوێدانێك بە مرۆڤ هەموو جیهان ڕاو بكات!

بێگومان شیاوترین پێناسە و وەسفێك كە تا ئێستا بۆ (ترەمپ) دیاری كرابێت ، ئەو پێناسەیە كە ڕۆژنامەنوسی بەناوبانگی ئەمریكی (Bobwoodward) لە كتێبەكەیدا بەناونیشانی (War – جەنگ) هێناویەتی كە دەڵێ :

( ترەمپ كەسایەتییەكی هەلپەرستی سەرمایەداریی دیكتاتۆریی خۆسەپێنی سەرەڕۆو دەمارگیرە و ئەوەندەی خۆی خۆش دەوێ ئەمریكای خۆش ناوێ...) ئەو ڕۆژنامەنووسە دەڵێ : (ترەمپ پیاوێكی سەرمایەداری فێڵبازە ، تاكە كەسایەتییەكە كە زۆر بەبایەخەوە پێگەیەنراوە و ئامادەكراوە ، كەسایەتی ترەمپ زیاتر چاوی لەسەر سەركەوتن و بردنەوە و شەڕو مانەوەیە لەم ژیانەدا ، تاكە ڕێگایەكیش بۆ زامنكردنی ئەوە بەلای ئەوەوە : غەریزەیە)!

لە زیاتر ناساندن و ئاشكراكردنی حەقیقەتی كەسایەتی ترەمپدا (Bobwoodward) دەڵێ : ( لە بڕیارداندا ترەمپ شوێن غەریزەی دەكەوێ و، غەریزەش بەلای ئەوەوە لە هەموو ڕەگەزێكی تر گرنگترە).

ترەمپ ژیان وەك جەنگ مومارەسە دەكات ، لەم سۆنگەیەشەوە كات و ساتە سەخت و ترسناكەكان هەمیشە لە ڕێگادان...

چونكە ( ترەمپ) خۆی دەڵێ : (هەمیشە چاوەڕێی كاتە سەختەكان بكە و لەگەڵ لێدانە یەك لەدوای یەكەكاندا بڕۆ.... ئاگاداربە ئەگەر خەڵك زانیان تۆ پاشەكشە دەكەیت ، چونكە ئەگەر خەڵك زانییان تۆ لاوازی ئیتر پێت فێردەبن و بەسەرتا زاڵدەبن... ئەگەر خۆت بدەیت بە دەستەوە گرفت و كێشەی زۆرت بۆ دێتە پێشەوە.... لەبەرئەوە زۆر توند بە ، دەبێ جەماوەرو هەواداری خۆت بناسی! دەبێ بكوژبیت بۆ هەندێ كەس ، بۆ هەندێ كەسی تریش دەبێ وەك شیرینی بیت ، بۆ هەندێكی تریش وەك هەردووكیان بە).

(ترەمپ) كەسێكە شوێن هەنگاو و ڕێنموونیەكانی شەیتان دەكەوێ ، لەبارەی عەرەب و وڵاتانی ئیسلامیشەوە هیچ نازانێ تەنها ئەوە نەبێ ئەوان سەروەت و سامان و داهاتێكی باشیان هەیە كە شیاوی نین ، ئەوان ئاینێكیان هەیە كە گەورەترین مەترسییە لەسەر پڕۆژە گەورەكەی ئەمریكا لە جیهاندا.... بەلای ئەوەوە گەلی فەلەستین ترسناكترین ئەڵقەی پڕۆژەی جیهاددیی خوایین كە دەبێ لەنێو ببرێن و، كۆت و بەند بكرێن بۆ ئەوەی نەبنە سەرەتاو بناغەیەكی نوێی هەڵسانەوە و زیندووبوونەوەی نەتەوەیەك كە ماوەیەكی زۆرە لە خەوێكی قوڵدایە!

(ترەمپ) زۆرترین دژایەتی موسڵمانان و فەلەستینییەكان دەكات ، هەر ئەو بوو بە ئاشكرا ڕێی خۆشكرد بۆ ئاساییكردنەوەی پەیوەندییەكانی نێوان ئیسرائیل و وڵاتانی كەنداو، بەتایبەت سعوودیە و ئیمارات، بۆ ئەوەی بەیەكجاری كۆتایی بە پرسی فەلەستین بهێنێ و گەمارۆی بدات! (ترامپ) بوو ئێرانی لەڕووی ئابوورییەوە زیاتر تەنگەتاو كرد ، قاسم سولەیمانی كوشت و ڕۆڵی تارانی لە یارمەتیدانی چەكدارانی حەماس لاوازو بێ كاریگەر كرد.

ترامپ بوو (سەفقەی سەدە)ی پەسەندكرد ، باڵوێزخانەی ئەمریكای بۆ قودس گواستەوە و، دانی بە سەروەریی ئیسرائیلدا نا بەسەر بەرزاییەكانی جۆلانەوە.

مەعلومیشە ( ترەمپ ) كانزایەكی هەرە گەورە بوو بۆ ئیسرائیل ، هەروەك چۆن ئیسرائیل كلیلی ئەو كانزا عەرەبیەیە كە ئەمریكا قەت لێی بێ نیاز نابێ هەتاوەكو عەرەب لەو بارودۆخەدا بن ... بۆیە جێی سەرسوڕمان نیە كاتێك (ترەمپ) و (ناتانیاهۆ) بەیەك ئاواز دەخوێنن... ناتانیاهۆ دەڵێ : سەركەوتنی ترەمپ (سەرەتایەكی نوێ)یەو (سەركەوتنێكی گەورە)یە و (هەلێكی مەزن )یشە بۆ ئیسرائیل!

ئەمەیە كورتە و پوختەی پێكهاتە و پێناسە و حەقیقەتی سەرۆكە نوێكەی ئەمریكا بۆ ئەوانەی دەیانەوێ ئاشنا بن بە

ئاڕاستە و بڕیارەكانی چوار ساڵی داهاتووی ناوبراو سەبارەت بە وڵاتانی ناوچەكە و جیهانی ئیسلامیی بە گشتی!

PM:02:24:11/11/2024

ئه‌م بابه‌ته 2076 جار خوێنراوه‌ته‌وه‌‌

هەموو وتارەکان کاتێک لە وێستگە نیوز بڵاودەبێتەوە تەنها بیروبۆچونی خاوەنەکانێتی