شنەبایەک لە ڤیەنناوە

‌ئاریان فەرەج

کەس نییە نەزانێ پەکەکە لەوەتەی هەیە گێچەڵ و بەڵایە بۆ هەرێمی کوردستان، پەکەکەیەک بە بەدکارییەکانی بووبێتە هۆی ئەوەی ناوی کورد بە ناوبانگی خراپی تیرۆرەوە بلکێ، بۆری نەوت و سەرچاوەی ئابوریی میلەت بتەقێنێتەوە و مناڵی خەڵک بڕفێنێ و دەست لە سڤیل نەپارێزێ و خەڵکی سەدان گوندی کوردستان لە خاکی خۆیان وەدەرنێ، بازاڕ سوتاندنیشی لێدەوەشێتەوە و بۆی بکرێت خراپتریش دەکات. 

هەڵبەت پەکەکە ناتوانێت لێرە وجودی بەرچاوی هەبێت و بە رۆژی روناک و بە ئاشکرا بەدکارییەکانی لەم هەرێمەدا ئەنجام بدات، بۆیەش دەبێ بە خۆخزاندنە ناو حزب و رێکخراوەکان و گەر بۆی بلوێ دامەزاوە ئەمنی و عەسکەرییەکان، جێی خۆی بکاتەوە و هەلی خۆمەڵاسدان و زەبروەشاندن دەستبخات، پرسیار ئەوەیە : گەر  پەکەکە توانی کەسانێکی خۆی   بخزێنێتە نێو دەزگایەکی ئەمنیی هەرێمەوە یاخود توانی کەسێکی سەر بەو دەزگایە بۆ خۆی تەجنید بکات و تاوانی پێ بکات، ئایا دواجار تاوانەکە لە ئەستۆی پەکەکەیە یان ئەو دەزگایەی دزەی کردۆتە ناوی؟

هەڵبەت وەڵامەکە روونەو بۆیەش لە سوتاندنی بازاڕەکاندا کە بە پێی لێکۆڵینەوەی هاوبەشی هەرێم و بەغدا دەرکەوت ئەنجامدەرانی پەکەکەن ئیدی لەژێر پەردەی هەر لایەن و دەزگایەکدا خۆیان مەڵاس دابێ، نە دەبوا پەنجەی تۆمەت لە هیچ ئاستێکدا بۆ  هیچ لایەنێکی دیکە درێژ بکرێ، لە راستیدا نەدەبوو یەکێتییش بەو ئاستە مشەوەش بێ و بەو پەلەپڕوزێیە بکەوێتە کاردانەوەی گرژ و توندەوە. 

بە کورتی، رەد و بەدەل و کار و کاردانەوەی ئەم دوو رۆژەی رابردووی هەندێ کەس و کەناڵ، گرژاندنێکی ناموجەبی دۆخەکە و (تا)یەکی ناوەخت و هێشتا زووی هەڵبژاردن بوو، گەر درێژەی کێشابا و گرژتر با، بێ گومان کاریگەریی خراپی دەکردە سەر ئەو هەوڵانەی دەدرێن بۆ ئەوەی تا دەگەینە پاییز، کەشێکی لەبار بۆ هەڵبژاردنێکی هێور هاتبێتە ئاراوە.

لێدوانەکەی دوێنێی سەرۆک نێچیرڤان بارزانی کە گووتی هیچ بەڵگەیەک بۆ تێوەگلانی یەکێتیی وەک حیزب لە تاوانی سوتاندنی بازاڕەکاندا نییە، ئاوێکی سارد و خێرای کرد بەو ئاگرەدا و شنەبایەکی فێنکی ڤیەننایی بوو بۆ هاوینی گەرم و پڕوکێنەری هەرێم، لێدوانێک بوو سوکنایی بە دڵەکان هێنا و پلەی گەرمیی هەموانی دابەزاندەوە.. بەو هیوایەی تا دەگەینەوە پاییزی هەڵبژاردن، پێویست نەکات سەرۆک هەر خەریکی ئاو بە ئاگردا کردن بێت.