كورد و تەتبیع

‌ئاریان فەرەج

‏‎لە سەروبەندی به‌ بنبه‌ستگه‌یشتنی‌ پرۆسه‌ی‌ سیاسیی له‌ عێراق و گرژبوونی لەراددەبەدەری دۆخ و ووتاری سیاسی له‌ كوردستاندا، سه‌رۆكی هه‌رێم، جه‌ژنی‌ ره‌مه‌زانی‌ كردە دەرفەت بۆ ئەوەی جارێكی دیكە پەیامە تەباییخوازەکەی بە گوێی هەموواندا بداتەوە، ئەو پەیام و دیدەی دەکرا رێ لە زۆر قەیران بگرێ و ئێستاش دەکرێ کۆی دۆخە قەیراناوییەکە و لێکەوتە و دەرهاویشتە سەختەکانی لەسەر هەموو ئاستەکان هەر چۆنێک بووە، چارەسەر و راستەڕێ بکاتەوە. 

‏‎لە دیدی سه‌رۆك نێچیرڤاندا،  لەم عێراقە بێ ئامان و دەستوورشكێنەدا و لە  سەرینی ئەو گۆڕانکارییانەی بەسەر ناوچەکە و جیهاندا هاتووە و دێت‌، کورد کە جگە لە خۆی، هیچ کەس لە خەمیدا نییە،  گەر هە‌موو هێزه‌كانیشی‌ یه‌كده‌ست بن، ئەوپەڕی بتوانێ لانی‌ كه‌می‌ مافە بەدەستهاتووەکانی‌ بیپارێزێ و لێیان كەم نەكرێتەوە، چ جای ئه‌وه‌ی‌ هه‌ر لایه‌نێكی‌ كوردی‌ بە تەنیا و بێ منەت لەوی دی، لە جیاتی بە پشتی یەكدی، بە پشتیوانیی نەیارانی یەكدی، خەریكی شكاندنی‌ یەكتربن!

‏‎بڕیارە ناڕەواكەی دادگای فیدڕالی دژ بە ئابووریی كوردستان، قۆستنەوەی قووڵترین ناكۆكیی نێوخۆیی سیاسی و ناتەبایی کۆمەڵگەیی كورد بوو‌، بۆ وەشاندنی زەبرێك لە كوردستان كە ده‌ ساڵ بوو هەلی وەشاندنی وەك ئیستایان بۆ نەڕەخسابوو. ئەوانەش كە له‌ ناوخۆدا پێیان وایە زەبرەكە لە دەسته‌ڵات وەشێندراوە نەك  قەوارەی کوردستان و خەڵکەکەی، دەبێ بزانن هەر بەڵایەك روو لە كوردستان بكات، بەر لە دەسەڵاتدار، هاوڵاتیی سادە باجه‌كه‌ی‌ ده‌دات وهەمیشەش بەڕە لە لا تەنكەكەیەوە دەدڕێ.  

‏‎ڕوانگەی سەرۆکی هەرێم بۆ فەرمانڕەوایی لە عێراق بە هەرێمی کوردستانیشەوە هه‌ر له‌سه‌ره‌تای‌ ئه‌م ته‌قسیمبه‌ندی‌ و رێگه‌جیاكردنه‌وه‌یه‌ی‌ پارتی‌ و یه‌كێتی‌ له‌ یەكتر، روانگایه‌كی‌ ڕاشکاوانه‌ بوو. ئەو له‌ مێژه‌ دەڵێت واقعیی‌ سیاسیی‌ عێراق و كوردستان تا ئه‌م ساته‌وه‌خته‌ش به‌ جۆرێكه‌ کە ئەستەمە هیچ هێزێک یان بەرەیەک بتوانێ بەبێ هاوبەشیی‌ ئه‌وانی‌ دیكه‌ حوكمڕانی‌ بكات. هه‌ر بۆیه‌ش له‌ دوای‌ هه‌ڵبژاردن‌ زۆری‌ جه‌خت كرده‌وه‌ كه ‌ده‌بێ ناڕه‌زایی‌ ئه‌و لایه‌نه‌ عێراقییانه‌ له‌به‌رچاو بگیرێ كه‌ ده‌نگیان كه‌م هێناوه‌. سه‌باره‌ت كوردستانیش، سەرۆکی هەرێم هەمیشە مكوره‌ له‌سه‌ر ئه‌وه‌ی‌ كه‌ بەبێ پێكه‌وه‌یی‌، سەقامگیری نایەتەدی و نه‌ لێره‌ پرسی حوکمڕانی لە تەنگژە و خه‌م ده‌ڕه‌خسێ و نه‌ له‌ به‌غداش هیچ به‌ هیچ ده‌كه‌ین.

‏‎له‌ روانگه‌ی‌ سه‌رۆك نێچیرڤاندا، كورد بۆ ئه‌وه‌ی‌ له‌ هاوكێشە و تەحالوفاتی به‌غدا پێگه‌ی بەهێزبێ، ده‌بێ یەكەمجار له‌نێوخۆدا هه‌بێ، ئه‌و هه‌بوونەش‌ به‌بێ پێكه‌وه‌یی‌ و به‌ده‌ستهێنانه‌وه‌ی‌ پشتیوانیی‌ میللی‌، دەستەبەر نابێ. گه‌ر داره‌كه‌مان لێره‌ خوار بێت، سێبه‌ره‌كه‌ی‌  نەك هەر لە بەغدا، له‌ هه‌موو شوێنێك خوار ده‌بێ.

‏‎جاران زمانی حاڵی کورد دەیگووت: نزیكی و دووریمان لە هەر لایەنێكی‌ عێراقی‌ بە ئەندازەی نزیكی و دووریی ئه‌و لایه‌نه‌یه‌ لە دانپێدانانی مافە دەستورییەکانی خەڵكی كوردستان. ئەوکات لایەنەکانی كورد سەرباری ناکۆکیی نێوانیشیان، وه‌ك پێكهاته ‌داخڵی‌ دانوستان ده‌بوون نه‌ك وه‌ك ئه‌حزاب، بۆیەش هەموو هێزەکانی عێراق کوردیان وەک پێکهاتە دەبینی و وەک پێکهاتە مامەڵەیان لەتەکدا دەکرا نەک وەک ئەحزاب. بەڵام ئێستا و لە ئاکامی ئەو دابەشبوونە قوڵەی کورد، خه‌ریكه‌ لە دیدی لایەنە عێراقییەکاندا، كورد له‌ پێكهاته‌وه‌ ده‌گۆڕێت بۆ ئه‌حزاب، ئەحزابێک کە موشتەرەکاتی ناسنامە پێکهاتەییە کوردستانییەکەیان، بە سیمای خیتاب و هەڵوێستیانەوە، تا ئەندازەیەکی ئەوتۆ کاڵ بۆتەوە کە هێزه ‌عێراقییه‌ جیاجیاکانی هێنابێتە سەر ئەو باوەڕەی کە کاتی لە ئێستا لەبارتر شک نەبەن بۆ کەمکردنەوەی مافە بەدەستهاتووەکانی کورد و  لاوازکردن و لەبەینبردنی قەوارەکەی.  

بۆ ئەوان کە قەت باوەڕیان بە ماف و شایستەکانی کورد نەبووە و لە دەرفەتی لەبەین بردنی گەڕاون، له‌ ئێستادا خۆشحاڵن بەوەی لە جیاتی‌ مامه‌ڵه‌ له‌گه‌ڵ پێكهاته‌یه‌كی‌ یه‌كگرتوو و پێداگیر و یه‌كده‌نگ، مامه‌ڵه‌ له‌گه‌ڵ حزبی‌ جیاجیا و سه‌ودای‌ جیاجیا بكه‌ن، گرەوی ئاشکرانەکراوی ئەوان لەسەر ئەم لێكترازانەی کورد،  گرەوە لەسەر تەقسیم بوونی قەزیەی کورد و کاڵبوونەوەی پێداگیریی کورد لەسەر ماف و داواکارییەکانی. گرەوە لەسەر قۆستنەوەی دۆخی خراپ و لاواز و لێکترازاوی کورد تا تێیدا بتوانن حزبه‌كانی‌ كورد به‌ ماف و ئیستحقاقی كه‌متر قایل بكه‌ن و تەنانەت ئەگەر لەسەر کاغەزیش بێت ئه‌وله‌ویاتیان پێ بگۆڕن، گه‌ر وانییه‌: كورد و ئه‌وله‌ویاتی‌ كورد له‌ كوێ و ته‌حریمی‌ ته‌تبیع له‌گه‌ڵ ئیسرائیل له‌ كوێ!!


PM:02:30:10/05/2022

ئه‌م بابه‌ته 512 جار خوێنراوه‌ته‌وه‌‌



هەموو وتارەکان کاتێک لە وێستگە نیوز بڵاودەبێتەوە تەنها بیروبۆچونی خاوەنەکانێتی