کاک نێچیرڤان چاکی مەکە، با خراپ بێت

بە شانازییەوە رەنگبێ من یەکێک لەو دەگمەن کەسانە بم کە حەوت ساڵ پێش ئێستا، زۆر راشکاوانە باسی باڵباڵێنی ناو پارتیم کردووە و ئەو تابۆیەم شکاند.
*
ئێستا باجەکەی دەدەم و حەوت ساڵە ناتوانم بگەڕێمەوە کوردستان و لە دیداری دایک و باوکم مەحڕومم.
*
هەر لەو رۆژەیڕا کە باڵی ئینقلابچی هاتنە سەر حوکم، بە کردەوە دەستیان بەسەر ژێرخان و سەرخانی وڵاتدا گرت و هاکا، باج لەسەر هەناسەدانی خەڵکیش دابنێن و شازادەی کوڕ، پارەکەی بخاتە رەشی باخەڵییەوە.
*
رەنگبێ خاڵی وەرچەرخان لە تەحویلی حوکمڕانیی کوردستان بۆ دەستەڵاتێکی ئەمنی، مافیایی، کلیپتۆکراسی و سەرکوتکار، ئەو رۆژە بێت کە پارتیی باوک کوڕ بۆ دوو ساڵ دەرگای پەرلەمانیان داخست و نێچیرڤان بارزانییان ناچار کرد چوار وەزیرەکەی گۆڕان بنێرێتەوە.
*
پارتی وایکرد، بەڵام یەکێتیش نوققەی لێوە نەهات! 
*
کە ئەوەی بۆ چووە سەر، ئەوجا نەیهێشت سەرۆکی پەرلەمان وەکو گەشتیارێکی عارەبیش بێتە هەولێر.
*
هەر ئەو پارتییە ئێستا فرمێسکی تیمساح بۆ پەرلەمان دەڕێژێ!
*
لە راستیدا، ئۆباڵی ئەو غەدر، زوڵم و ستمەی کە مەغروور بارزانی بە پاڵپشتیی باوکی لە خەڵکی کوردستانی دەکات، لە ئەستۆی هەمووانە لە سەرۆکی هەرێمەوە بگرە تا یەکێتی و ئەو موهەڕیجانەیش کە رۆژانێک موعارەزە بوون.
*
ئەوە راستییەکی شاراوە نییە کە مەغروور بارزانی وەرەقەی سەرۆکی هەرێم (کە بەپێی قانون سەرۆکی دەستەڵاتی جێبەجێکردنە) ناخوێنێتەوە. تەنانەت تا بۆی بکرێ پێچەوانەی ئەوە دەجولێتەوە کە سەرۆکی هەرێم کاری بۆ دەکات. 
*
ئەم نەفرەتە پەنگخواردووەی ناخی مەغروور بارزانی وایکردووە بە دەیان هەزار پارتیی دڵسۆز، بکەونە ناو لیستی رەشەوە و لەناو حزبەکەی خۆیان وەکو بێگانە سەیر بکرێن.
*
کاک  نێچیرڤان لە چەند ساڵی رابردوودا، ئەگەرچی لەسەر زۆر بابەت و پێشێلییەکان هاتۆتە دەنگ و رێگەی نەداوە پەیکەری حزبەکە بە هۆی ئەوە زیانی بەر بکەوێ، بەڵام دەبوایە لێگەڕابایە دەنگدەرانی پارتی لەو دوو هەڵبژاردنەی رابردوو پارتیی باوک و کوڕیان سزا دابایە.
*
ئەوەی نەکرد و لە بری ئەوە چووە سەر ستەیج و داوای ملیۆنێک دەنگی کرد!
*
لە مەراسیمی پێدانی نیشانی باڵای ئیتالیا، جگە لە یەک کەس، هەموو پارتیی باوک و کوڕ غائب بوون. ئامادە نەبوون پێرۆزباییەکیش بنوسن!
*
کاک نێچیرڤان بە تەدەخولەکانی بۆ راستکردنەوە باری کەوتووی حکومەتەکەی مەغروور بارزانی، غەدر لە خۆی دەکات؛ تەمەنی دەستەڵاتێک درێژ دەکاتەوە کە لە گیانەڵادایە.

PM:05:34:28/07/2026

ئه‌م بابه‌ته 200 جار خوێنراوه‌ته‌وه‌‌

هەموو وتارەکان کاتێک لە وێستگە نیوز بڵاودەبێتەوە تەنها بیروبۆچونی خاوەنەکانێتی