هەگبەی زەیدی لەتاران !
د.بەختیار شاوەیس
لەوتاری پێشوو ( هەگبەی
زەیدی لەکۆشکی سپی ) فۆرمەلەی قۆناغی نوێی پەیوەندیە ستراتیژی و ئابووری و
سیاسیەکانی واشنتن و بەغدادمان کرد، ئەڵبەت لەسەر بنەمای گۆرانکاریەکانی
دەسەڵات و پاوەری نوێ لەعیراق و هەروەها لەسۆنگەی پەرەسەندنە
دراماتیکیەکانی جەنگ لە رۆژهەڵاتی ناوەراست.
لەم نێوەندەدا، کاتێک
هەگبەی سەرۆک وەزیرانە گەنجەکەی عیراق هەڵدەدەیتەوە لەسەردانی بۆ تاران ،
ئەوا قوڵتر ئەوەت بۆ دەردەکەوێت کە قسەکانی عەلی ئەکبەر ویلایەتی گەورە
راوێژکاری موجتەبای رابەر رەسمی هەندەسەی مامەڵەی تاران لەگەڵ حکومەتی نوێی
عیراق دەکات، نەک ماچو موچەکەی پزیشکیان وەک سەرۆکێکی دەست و پێ بەستراو.
ئاخر
لەناواخنی ئەو هەموو قەیرانە قوڵە ئەمنی و سیاسی و ئابووری و
دیپلۆماسیانەی کەبەرۆکی پەیوەندیەکانی بەغداد و تارانی گرتوە، لەم ئان و
ساتە هەستیارەدا یاداشتی تێگەیشتنی سکەی شەمەندەفەر و دەستەخوشکبوونی
هەردوو پایتەختی وڵات دەکەوێتە کام قوتوی عەتاری سەردانێکی بەرهەمدار؟!
کرچوکاڵی
هەگبەی زەیدی لەتاران هەر بەتەنها لەمەغزا ستراتیژیەکەیدا دەرنەکەوت،
بەڵکو لەقوڵایی دیپلۆماسیشدا قسەکەی عەباس عراقچی ( کێشەی ئێمە لەگەڵ
ئەمریکا گەیاندنی پەیام نیە واتە کاکی خۆم ئەو بەردە گەورەیە بە پاکستان و
سەلتەنەتی عومان نەهاوێژرا باشترە تۆ دووربکەوەرەوە) حەقیقەتی پشت پەردەی
قوڵایی دیپلۆماسی ئەم سەردانە لەداهاتووی نزیک دەردەخات ، ئیتر با کابرا
بیشچێتە سەر مۆنۆمێنتی قاسمی سولەیمانی و مەهدی موهەندیس لەتاران!
عەلی
فالح زەیدی دەچێتە تاران ، بەڵام شەوی بەر لەسەفەری گۆرانکاری بنەرەتی
لەپۆستە باڵا ئەمنی و موخابەراتی و سەربازیەکان دەکات وەک ئامادەکاری بۆ
رووبەرووبونەوەی گروپە میلیشیاکان لەکۆتایی ئەیلولی داهاتوو ، کەئەمە
داواکاری یەکەمی ئەمریکیەکانە دژی تاران.
زەیدی دەچێتە تاران، بەڵام
رۆژێک بەر لە رۆشتنی لەناو کوپەی ترشیات دەیان ملیار دینار پارەی
گەندەڵکاران و لە گەراجی باخ ٦٠ کیلۆ زێر دەدۆزێتەوە و بەدەرزەن فەرمانبەری
گچکە و گەورە کەلەپچە دەکات کەئەم هەنگاوانە حاشیەکانی ئیران زیاتر
بەتەسفیەی سیاسی دەخوێننەوە و هێدی هێدی دەنگ لەدژی هەڵدەبرن.
عەلی
زەیدی دەچێتە تاران چوار یاداشتی لێکتێگەیشتنی ( حبر على الورق ) ئیمزا
دەکات ، بەڵام لەکۆشکە سپیەکە بەگوژمەی سەدان ملیار دۆلار ، چل و هەشت
رێککەوتنی ستراتیژی لە سێکتەرەکانی ئابووری، ئەمنی ، وزە و سیاسی ئیمزا
دەکات و پەلی دەیان کۆمپانیای ئەمریکی رادەکێشێتە سەر دەریا نەوتەکەی بەسرە
و عەمارە و کەرکوک.
زەیدی دەچێتە تاران بەڵام بەپاسەوانیکردنی
فرۆکەی تایبەتی جەنگی، رەنگە ئەمە سەلماندنی ئەو قسەیە بێت کە قاسم عەبودی
وتەبێژی عەلی زەیدی دەڵێ: سەرۆک وەزیران پێی وتم لەم رێگەیە بەردەوام دەبم و
کۆڵ نادەم ئەگەر سەریشم دابنێم ، من ئێستا تەنها کەسێکی خاوەن کار نیم
بەڵکو باوکی ٤٦ ملیۆن مرۆڤ م .
کۆتایەکەی : ئەرێ بەراست ئەم قسەیە موزایەدە یان هەروا و بەهەوانتە کرا یان شتێک لەئارادایە؟ والله اعلم
AM:11:45:24/07/2026
ئهم بابهته 332
جار خوێنراوهتهوه
هەموو وتارەکان کاتێک لە وێستگە نیوز بڵاودەبێتەوە تەنها بیروبۆچونی خاوەنەکانێتی