حەنینێک بۆ قەڵەم و کاغەز کە دەبونە ئاوێنەی نوسینەکانمان

چەند خۆش بو کە دەمان ویست وتارێك بۆ رادیۆ  ، رۆژنامە یا تەلەفزیۆن بنوسین ،جۆری قەڵەمەکەمان لا گرنگ بو ( پاندانی پارکەر ،شیڤەر، قەڵەم جافی بیک یا سۆفت ) کاغەزەی خەت دار یا ئەی فۆری سپی)  رۆڵی گرنگیان دەبینی لە کوالێتیی بەرهەمەکەمان.
جا چا خواردبەوە یا جگەرە کێشان ( بۆ جگەرەکێشەکان) گرنگ بو بۆ بەرهەمهێنان و لە دایک بونی بەرهەمەکە.

من خۆم حەزم بە کاغەزی رەنگاو رەنگ زیاتر  بو بۆ نوسینەکانم ، ناونیشانی راپۆرت ،وتار و بابەتەکان بە ماجیکێك بنوسم ،  ئەویتری بە پاندانی مەرەکەب یا  جافی بیك یا جافە قەڵەوە سویدییەکان بنوسم یاخود قەڵەمی سۆفت  .[ ئاخر  لە سەردەمی خوێندکاریشدا دەفتەرەکانم جوانترین بون هەموی رەنگاو رەنگ و رازاوە بون بە گوڵ و گەڵا یا خۆم دەمنەخشاندن یا  سودم لە وێنەی ریکلامەکان وەردەگرت].

ئیتر ئەو  نوسینە زۆر بە تام و چێژێکی تایبەتەوە دەنوسران.

هەر بۆیە خاوەنی سامانێکی زۆری قەڵەمی جۆراو جۆر بوم  ، تەنانەت لەکار کەوتوەکانیشم فڕێ نەدەدا .ئێستاش کە دەچمە  کتێب فرۆش و شوێنە تایبەتەکانی پێداویستیی نوسین ، هەمیشە پەلکێش دەکرێم بۆ لای خانەی قەڵەمەکان.

چەند خۆش بو !بۆ نوسینی راپۆرتێك ، ئامادەکردنی بەرنامەیەکی  رادیۆیی یا رۆژنامەی کاغەزیی ، تەنانەت تەلەفزیۆنیش، دەبوایە، پەنا ببەین بۆ ئەرشیف ، نوسینە کۆنەکان ، کتێب و سەرچاوە مێژوییەکان .

ئەمێستا  کۆمیتەر ، مۆبایل و لاپتۆپی بێ گیانی بێ رەونەق  لەبەردەستدایە ،  دیار نییە کێ دەست و  خەتی جوانە !، هەرچییەکت بوێت   خۆت هیلاك مەکە و بەدواییدا ئەم کتێب ،ئەو سەرچاوە ، ئەو کتێبخانە  و ئەم رۆژنامە یە مەکە ،لە گۆگل کلیکێك لێ  بدە و هەقت نەبێت   هەمویت وەك هێلکەی  پاککراو دێتە بەردەست ، ئیتر هەڵەشی تیادا بێت گرنگ نییە. لەوەش خراپتر سیستمی   (   Artificial Intelligence,AI ) زیرەکی دەستکردە ، کە ئیتر بۆ وتار نوسین و هەمو شتێکی تر جێگەی بیرکردنەوەی مرۆڤیشی گرتوەتەوە ، بەو واتایەی ئیدی هەمو کەس نوسەر ، ئەدیب ، دەنگ خۆش و موزیسان هەمو شتێکە .

سەرباری ئەوەی بێ ناەەڕۆکیشن و دیارە کە زادەی بیر و هزری کەسەکە نین ، بەڵام کوا ئێستا گوێ بە ناەەڕۆك و رۆح دەدرێت!. کەواتە نەك هەر قەڵەم و کاغەز بەڵکو. بیرکردنەوەکانیش ، توانا و بەهرەکانیش نرخ و ئەرزشیان نەماوە ، وەك چۆن سۆشیال میدیا بەهای رۆژنامەنوس و جنێو فرۆشی کردە یەك . وەك چۆن ئەم تەکنەلۆژیا و ئایدۆلۆژیایەی هیچ و پوچییە ،  قەڵەمە مەزنەکانی رۆژنامەگەریی وەك بەدرخانییەکان ، پیرەمێرد ، مامۆستا ابراهیم احمد ، سەرۆك مامجەلال ،  نەوشیروان مستەفا ، فەلەکەدیین کاکەیی  ، عەلادین سجادیی ، پرۆفیسۆر عیزەددین مستەفا ، مستەفا ساڵح کریم  و دەیانی  تری کۆچکردو و  سەدان رۆژنامەنوسی نا حزبیی  ئێستای وەك  دکتۆر مەریوان وریا قانع  ، ئاسۆس هەردی ،  رەحمان غریب   ، ئارام سعید ، شوان محمد  و دکتۆر احمد میرە و دەیانی تریان  تەمەنیان درێژ و قەڵەمیان بڕشت بێت ،   خراونەتە ریزی  جنێو دەر و بوختان چییە کان و ناویان لە خۆناوە رۆژنامە نوس  . یاخود بە هۆی ئەم سۆشیال میدیایەوە کە  خراپ بەکار دەهێنرێت وەك هەر ئامێرێکی تر ، رۆژنامە نوسە گەشمەرگەکانی ئازادیی قەڵەم و بیروڕای وەك {جمال عیرفان ،  شاسوار جلال(ئارام) ، عبدالخالق معروف ، کاردۆ گەڵاڵی ، رەئوف ئاکرەیی و ، فیکرەت جاوید ،عبدالجبار وهبي (أبو سعيد)،أبو گاتع ،سلام عادل و عبدالعباس سالم } و سەدانی هاوشێوەیان خراونەتە ریزی ئەوانەی کە بێ مۆراڵانە  قسە دەکەن  ، سجن کراون یا کوژراون ، لە کاتێکدا  نێوانی پەیامی  ئەو گەشمەرگانە و ئەمانەی تر ئاسمان و رێسمانە[سەرباری ئەوەی من بەهیچ شێوەیەیەك لەگەڵ کوشتن و تیرۆری جەستەییدا نیم ] .

بەڵێ وەك چۆن بەها و پێودانگی رۆژنامە نوس گەیشتوەتە ئاستێکی نەرێنی ، بەش بە حاڵی خۆم  وای دەبینم بەهای قەڵەم و کاغەزیش لە قەیراندایە  ،ئەو وتار و   چیرۆك و بابەتانەی لەسەر شاشەی مۆبایلەکەم  یا لاپتۆپەکەم دەیخوێنمەوە چێژی کتێب و رۆژنامە کاغەزییەکەی لێ وەرناگرم ، ئەو بابەتانەشی دەیان نوسم بە مۆبایلەکەم هیچ وەك ئەو بابەتانە نییە کە جاران بەقەڵەم دەمنوسین و بە فاکس یا بە نامە دەمناردن !. بەڵام چ بکەین ئەوە واقعە دەبێت سازشی لەتەکدا بکەین و خۆمانی لەسەر رابهێنین ، هەروەك چۆن  ئەمڕۆ بە کەسێك دەڵێین  جەردە و پیاوکوژ ، بەڵام کە توش دەبێت ، دەبێتە پاڵەوان و نیشتمان پەروەر و هەمومان دەبێت بۆی بلاوێنینەوە  و بەسەریدا هەڵ بدەین و بە خۆراگر و رزگارکەری گەلی  ناو بنێین !

PM:10:59:10/05/2026

ئه‌م بابه‌ته 240 جار خوێنراوه‌ته‌وه‌‌

هەموو وتارەکان کاتێک لە وێستگە نیوز بڵاودەبێتەوە تەنها بیروبۆچونی خاوەنەکانێتی