حزب لەتمان دەکات، لێ ئاڵای کوردستان یەکمان دەخاتەوە!

بە درێژایی مێژووی گەلی کورد، یەکێک لە گەورەترین کێشەکانی بریتی بووە لە دابەشبوونی ناوخۆیی و جیاوازی سیاسیی، کە زۆرکات لەبەر ئایدۆلۆژی و بەرژەوەندییە تایبەتییەکانیانەوە پەیدا بوون.

پارتە کوردییەکان، کە هەر یەکەیان خاوەنی بیر و ڕێبازێکی تایبەتین کە زۆرترین کات یەکترییان ڕەت کردۆتەوە پاشان جیاوازییەکانی نێوان لایەنی بەرامبەریان دەستنیشان کردووە. دواتر ئەم دۆخەش وای کردووە کە هێزی گشتیی کوردان لاواز بێت و دەرفەتەکان بۆ بەهێزکردنی یەکگرتوویی نەتەوەیی لەدەست بچن.

بەڵام کاتێک دۆخی سیاسیی ناوچەکە گۆڕانێکی گەورە تێیدا ڕوویدا، بەتایبەتی لە کاتی هاوپەیمانی و نزیکبوونەوەی ڕۆژئاوا و باشوور، ڕاستییەکی گرنگ دەرکەوت کە مەترسییەکی هاوبەش هەیە. کە هەر کاتێک دەرفەتێکی مێژوویی دێتە پێش، کوردان دەتوانن لەسەر بنەمای کوردایەتی یەکدەنگ بن. ئەم هاوپەیمانییە نیشاندەری ئەوە بوو کە لەسەر بنەمای نەتەوەیی دەتوانرێت هەموو جیاوازییە سیاسی و ئایدۆلۆژییەکان بخرێنە ژێر چەتری یەک ئامانج کە بۆ پاراستن و بەرزکردنەوەی کوردستانە.

ئەم گۆڕانە تەنیا لە ئاستی سەرکردایەتی نەبوو، بەڵکو لە ناو لایەنگران و ئەندامانی پارتەکانیشدا کاریگەرییەکی گەورەی هەبوو. ئەوانەی کە پێشتر بە توندی بەرگرییان لە بیر و بۆچوونی تایبەتی پارتەکانیان دەکرد، بینیمان کە چلۆن هەموویان یەک دەنگ بوون لە پشتگیریکردنی ئەو هەنگاوە نەتەوەییە. ئەمە نیشانەی ئەوەیە کە کوردایەتی و هەستی خۆشەویستی هاوبەش لە ناو دڵی گەلدا زۆر بەهێزترە لە گشت ئەو جیاوازییە سیاسییەی کە هەیە.

ئەزموونی تاڵی دابەشبوونی کۆمەڵایەتی

زۆر کات لەبەر ئەندامبوون لە پارتێک یان ڕێکخراوێکیی دیاریکراو کە تاکی کورد نەیتوانیوە بە ئازادی ڕای خۆی دەربڕێت. ئەگەر هەر ئەندامی پارتەکان لە تۆڕە کۆمەڵایەتییەکاندا لایک یان کۆمێنتێک بکات، یان هاوسۆزیی خۆی بۆ بیرێکی تر دەرببڕێت، بە زووترین کات دەبێتە بابەتی لێپرسینەوە و لێپێچینەوە. کە ئەم شێوە لە کۆنترۆڵ و فشارە، وای کردووە کە زۆر کەس لە ترسی تەنەر و تاوانبارکردن، دەنگی خۆیان و ڕای خۆیان بخنکێنن. کە ئەمەش دەبێتە فاکتەرێک بۆ دابڕان لە کۆمەڵگە، لێسەندنەوەی کەسایەتی.

هەر بەم شێوەیەش زۆرکات کوردان نەیانتوانیوە بەشداربن لە بۆنە گشتی و نەتەوەییەکاندا، تەنیا بە بیانووی ئەوەی کە ئەو بۆنەیە لەلایەن پارتێکی دیاریکراو ڕێکخراوە.
لە ڕاستیدا دەکرێت ئەو بۆنەیە ببێتە هۆی جێگایەک بۆ یەکگرتوویی، نەک ببێتە گۆڕان بۆ مەیدانی دژایەتی و دوورکەوتنەوە لە یەکتر.

هەمان کات زۆرێک لە کۆڕ و سیمینارەکانیش توشی هەمان کێشە بوون. کە کەسانێک ناتوانن بە ئاسانی بەشداری بکەن، بەتایبەت ئەگەر کەسی ڕێکخەر ، کۆڕگێر و میوانی سیمینار پێشینەی حزبی هەبێت یان ئەندامی پارتێک بێت.
دواتر مۆرکی ئەو لایەنە دەدرێت بەو کەسەی کە بەشداری دەکات یان گوێگر دەبێت، لێ دواتر دەبێتە هۆی تاشە و تەنەر و ڕەتکردنەوەی لەلایەن توێژە جیاوازەکان، کە بە هەمان شێوە لە تۆڕە کۆمەڵایەتییەکانیش کە بە شێوازی جیاواز هێرشی توند دەرکرێتە سەر کەسانێکی بەشدار بوو بە تایبەت ئەگەر ناسراو بێت، کە نامرۆڤانە سوکایەتی و هێرشێکی زۆر ناڕەوا دەکرێتە سەری، بەهەمان شێوەش ئەگەر لە دەزگایەکی مێدیایی جیاواز دەربکەوێت، هەڵبەت ئەمە بۆ میوان و کارکردن، لەو مێدییانە هێرشکردن هەر بە هەمان چەشنە. کە بەداخەوە کە ڕەتکردنەوە لە توێژی سیاسی، ڕۆشنبیران و نوسەراندا زۆر ڕەنگ داوەتەوە.. هەڵبەت بۆ بڵاوکردنەوەش هەمان چەشنە.

هەموو ئەوانەی باسمان کرد و چەندین نمونەی تر، تەنیا بەشێکن لە واقیعیەکی تاڵ کە پێویستە بە جیدی چارەسەر بکرێت. ئەگەر کۆمەڵگەی کوردی بەردەوام بێت لەسەر ئەم شێوازە، یەکگرتوویی تەنیا وەک وشەیەک دەمێنێتەوە، نەک ببێتە ڕاستییەک!

حزب و کۆمەڵگە

حزب و ڕێکخراو پێویستە بگەن بەو تێگەیشتنەی کە ڕۆڵیان تەنیا ڕێکخستن نییە، بەڵکو ئەرکیان دروستکردنی کۆمەڵگەیەکی تەندروست و فرە ڕەنگییە. ئەگەر حزبەکان بەردەوام بن لە دابەشکردنی خەڵک، ئەوا بە ئاگایی یان نائاگایی بۆ داهاتوویان هێزی خۆیان لەدەست دەدەن.
پێویستە پەیوەندییە کۆمەڵایەتی و نەتەوەییەکان بخرێنە سەر بنچینەی یەکگرتوویی نەک دابەشبوونی کورد، کە دەتوانرێت لە ڕێگای ڕێزمانی نوێی سیاسی، ڕێزگرتن لە جیاوازی و پشتگیری لە ئازادیی تاکەکەسی بەدەست بهێندرێت.

فرە ڕەنگی و هێزی کوردایەتی

کوردایەتی بە فرە ڕەنگییەکانییەوە جوان و لوتکەی سیمای دیموکراسیی وێنا دەکات.
جیاوازیی بیر و بۆچوون، کەمکردنەوەی هێز نییە، بەڵکو زیادبوونی هێزە ئەگەر بە شێوەیەکی دروست بەکاربهێندرێت. ئەگەر بمانەوێت دەتوانین ئەم جیاوازییانە بگۆڕین بۆ سەرچاوەی دیالۆگ و تێگەیشتن، ئەوکات دەکرێت کۆمەڵگەیەکی بەهێزتر و پێشکەوتوو‌تر دروست بکەین.

لە کۆتاییدا هیوادارم کە حزب و ڕێکخراو چیدی نەبنە هۆی لێکدابڕان، بەڵکو ببنە پەیوەندی و قبوڵکردنی یەکتر لە نێوان کوردا، بەتایبەت کە کاتێک کۆمەڵگە یەک دەنگ بێت، ئەوا حزبەکانیش ناچار دەبن ئەو یەک دەنگییە بپارێزن.

حزب دەتوانێت لەتمان بکات، لێ ناتوانێت گیانی کوردایەتیی بشکێنێت.

ئاڵای کوردستان دەتوانێت هەموومان یەک بخاتەوە، بەو مەرجەی خواستی ئەوەمان هەبێت لە ژێر ئەم ئاڵایەدا بە دڵ و گیان یەکێتی و یەکبونمان رێک بخەین.

AM:10:37:11/04/2026

ئه‌م بابه‌ته 572 جار خوێنراوه‌ته‌وه‌‌

هەموو وتارەکان کاتێک لە وێستگە نیوز بڵاودەبێتەوە تەنها بیروبۆچونی خاوەنەکانێتی