شارەزای ئەم بوارە نەبین دوادەکەوین

ئەوەی تەکنۆلۆژیا لە جیهانی مرۆڤایەتی ئێستادا هێناویەتیە کایەوە لە خەون دەچێ، مرۆڤی ئێستا بیر لەوە دەکاتەوە تەکنۆلۆژیا سەرجەم ئافەت و پەتاو نەخۆشیەکانی سەرگۆی زەوی بنەبڕ بکات، مرۆڤی ئێستا بیر لەوە دەکاتەوە تەکنۆلۆژیاو ئامێرە ئەلیکترۆنیە پێشکەوتووەکان تەمەنی مرۆڤەکان زۆر زیاتر لەوەی ئێستا هەیە درێژتر بکاتەوە، مرۆڤی ئێستا بیر لەوە دەکاتەوە بەیەک کلیک خۆی لە جێگایەکدا ببینێتەوە زۆر جیاوازتر بێ لەو جێگایەی چەند ساتێک پێش ئێستا خۆی تیایدا دەبینیەوە، هەروەها مرۆڤەکانی ئەم سەردەمە بیر لەوە دەکەنەوە بێ دەستێوەردانی کەسانی تر توانای دیاری کردنی (بۆهێڵەکان و کرۆمۆسۆمەکان)ی خۆیانیان هەبێت!

ئەڵبەتە ئێمە بەحوکمی ئەوەی کارو پیشەمان فێرکردن و بەجێگەیاندنی ئەرکی مەعریفیی و ئەکادیمییە لە نێو ناوەندێکی باڵاو دامەزراوەیەکی گەورەی زانستیی ئەکادیمیی وەک زانکۆدا ئەو ڕاستیەمان بۆ دەرکەوتووە کە ڕێژەیەکی هەرە زۆری قوتابیانی زانکۆو ناوەندەکانی خوێندن لەبواری تەکنۆلۆژیادا لاوازو کۆڵەوارن و شارەزای بەکارهێنانی دروستی ئامێرو ئامرازو سەکۆ زانستیە فێرکارییە ئەلیکترۆنیە زیندووەکان نین و، بگرە هەندێک جار بێ تواناو ناشارەزاشن لە چۆنیەتی وەدەستخستن و ڕاکێشان و سوود وەرگرتن لە کتێب و سەرچاوە زانستیە ئەلیکترۆنیەکان!
کارکردن لە داهاتوودا پێویستیان بە (تواناو بەهرەو لێهاتوویی و شارەزایی ئاست بەرز) هەیە لەبواری تەکنۆلۆژیای پێشکەوتوودا، کەدیارە ئەمەش گرنگی و زەرورەتی خۆئامادەکردنمان بۆ ئەو قۆناغە بۆ دەردەخات، بۆیە پێویستە نوخبەی زانستی بەگشتی و قوتابیان بەتایبەتی لەهەموو ئاست و قۆناغەکاندا لەئێستاوە لەهەوڵی خۆ بەهێزکردن و بەرەو پێش بردن و گەشەپێکردنی زیاتری تواناکانیان بن لەبواری تەکنۆلۆژیادا، ئیتر ئایا لەڕێی بەشداریکردن لە خولە تایبەتەکانەوە بێت، یان لەڕێی ئەو کتێب و سەرچاوە پەیڕەوییانەوە بێت کە زانکۆکان و دەزگاو دامەزراوە تایبەتەکان ئامادەیان کردوون.
لەبیریشمان نەچێت گەشەدان بە مەعریفەی تەکنۆلۆژیی لە قۆناغی ئێستادا هەنگاوێکی هەرە گرنگ و سەرەکیە بۆ بنیاتنانی ئابوورییەکی بەهێزو پێشخستنی وڵات و کۆمەڵگە، لە ئێستاوە دەبێت گرنگی دان بەو بوارە خەمێکی هەرە گەورەی دەسەڵات و کۆمەڵگەو نوخبەی ئەکادیمیی بێت لەپێناو زامن کردن و دەستەبەرکردنی چارەنووس و داهاتوویەکی ڕووناکترو  پرشنگدارتر بۆ نیشتیمان و نەوەکانی داهاتوو.

PM:03:30:19/12/2025

ئه‌م بابه‌ته 724 جار خوێنراوه‌ته‌وه‌‌

هەموو وتارەکان کاتێک لە وێستگە نیوز بڵاودەبێتەوە تەنها بیروبۆچونی خاوەنەکانێتی