کێ بایکۆت ئەکات و بۆچی
ئاسۆ عەبدوللـەتیف
بەرەی بایکۆت وەک هێزو ڕەوت و دیدگاو بەرەیەکی ناڕێکخراو هەیە لەهەموو پرۆسەیەکی هەڵبژاردن و کایەکانی دیموکراسیدا، خەڵکانی عاجزو توڕەو ناڕازی زۆرن و شوێن ئەو (زاهیرە سەوتیە) ناکەون و ناشکەونە نێو کاریگەریەکانی خیتابی میدیایی باو، کەهەندێک وەک موبەلیغی ئەرسەدۆکسی و خەتیبی زمانلوس "میرابۆ” ئاسا هاوارو هوتافی بۆ دەکێشن و تیۆریزەی دەکەن.
ئەم هەڵبژاردنە بۆ خولی شەشەمی ئەنجومەنی نوێنەرانی عێراق، پردی پەڕینەوە نییە بۆ بەهەشت، چونکە هیچ زۆرینەیەکی جەماوەریی لەئارادانیەو هەڵبژاردنەکەش بۆ هەرێم نیەو بۆ عێراقە، بەتایبەت بۆ ناو نەخشەیەکی پڕسەرئێشەو گرێوگۆڵی زۆرینەیەکی فاشی مەزهەبی ململانێدار، خەیاڵ شتێکەو واقیع شتێکیتر، موعجیزەیەک نەخوڵقاوە بۆ هێزو مۆدێلە سیاسیە حیزبی و ئایدۆلۆژیەکان نەک لەکوردستان بەڵکو لەعێراقیشدا کارێک بکەن ببنە رابەرو داهێنەرو دروستکەر، ئەوە سێ هەڵبژاردنە دۆخەکە وەک خۆیەتی.
ئەوەی ئەم جۆرە ئۆپۆزسیۆنە دەیڵێ و دووبارەی ئەکاتەوە دەنگدانەوەی ئەشکەوتەکەیە، کەس بەو دەنگە خەبەری نابێتەوە بەتایبەت دەنگدەری نوستووی ڕووپۆشکراو هێشتا زۆرینەن، ئەوانە لە بەرەی بێدەنگەکانن و کۆمەڵگای تەنیوە، الأغلبية الصامتة، بەدەنگەدەنگ و قاڵەقاڵی ئەم بەرەو رەوت و قەوارانە، بەخەبەر نایەن و لەناو بایکۆتی قوڵدان، ئەوانە پڕۆژەی جددیان دەوێ، خزمەتگوزاریی و خۆشگوزارانیان دەوێ، هەرزانی نرخی شتومەکیان دەوێ، ئارامیان دەوێ، کەسایەتیان دەوێ، دەی ئەم بانگەشەکارانەی نێو کەمپەینەکانی هەڵبژاردن نیانە، لەبەرئەوەی ئەغلەبیەی ڕێژەیی و کەمن. الأَغلبية النِّسْبِيَّة.
نەیانتوانی خەڵکی باش و بەجەوهەرو ئایکۆنی ڕاقی دروست بکەن و پێشچاوی جەماوەی بخەن و هەرخۆیان ئینفیرادی دێن و دەچن، دەهۆڵیام بۆ بایکۆتی مەکتەبەکان دەکوتی و مناڵی خۆیان بەجامڕەش دەبردە هایسکوڵ و ئەهلیەکان و یەک خولەک لەخوێندن و وانەیەک دانەبڕان.
بەڵێ شتێکی تر هەیە ئەویش زۆرینەی تایبەت و گەورەیە الغالبية الخاص و العظمى، زۆرینەی خێزانی ئۆلیگاریشی بەدەسەڵات و تەواوی جومگە هەستیارەکانیان بەدەستەوەیە، حکومەتیان لایە، سەربازو دەزگاو نەوت و سەفەقاتیان لایە دەنگ کڕین بازاڕی گەرمە، چەک و هێزو پارەی هەیە ئەی بۆچیەتی بۆ ئەم ڕۆژە ڕەشە نەبێ، لەعێراق هەیەو لێرەش کۆپی ئەو سلوکە سیاسیە کراوە.
وردە وردە هەرێم دەبێتە کۆپی بەغداد بۆ لێدان لەشکۆی دامەزراوەی یاسادانان و دیموکراسی، ئەوەتا ئاڵووێری پەڕلەمانتار بەئاشکرا ئەکرێ، لەوێ نائب و مەندوب و وەزیرو بەڕێوەبەری گشتی هەموو کڕین و فرۆشتنی پێوە دەکرێ کەس ڕێگرنیەو هەڵبژاردنیش هیچ ناگۆڕێ، ئەگەر بەملیۆنێک دۆلار مەندوبێک بکڕن دەبێ ئەو مەندووبە سبەی دەنگ بە پڕۆژە یاسایەک بدات خاوەنەکەی دەملیۆن دۆلار قازانج بکات واتە یەک بەدە.
ئینجا کە هێزت نەبوو سندووقی دەنگدان بپارێزیت لەساختەکاری و دەستێوەدران و هاک و سۆفتوێری دەستکاریکراو یان بردنی سندوقی پیکۆسە ئەلیکترۆنیەکان، نابێت باسی دیموکراسی و گۆڕانکاری جەوهەری بکەیت بەبێ شۆڕش و راپەرین و پرۆژەی جددی، ئەوە تەنها شوێنکەوتنی سەراب و هیوای ساختەیە بۆ خەڵک، هێزە راستەقینەکە ئەوە نیە هاوارو ژاوەژاو دروست بکەیت و تەڵقینی جەماوەر بکەیت بەزەخرەفەی حروف و بەلاغی بەرز مردوەکە بنێژی، مەهێڵە مرۆڤەکە بێهیوابێت و بگاتە لێواری ئازارو مەرگ، کەئەوەشت پێ ناکرێ مەبەرە هەواکێشی ساختەی مەنجەڵی توڕەبوونەکانی خەڵک.
ئاسۆ عەبدوللەتیف
PM:03:18:16/10/2025
ئه‌م بابه‌ته 124
جار خوێنراوه‌ته‌وه
هەموو وتارەکان کاتێک لە وێستگە نیوز بڵاودەبێتەوە تەنها بیروبۆچونی خاوەنەکانێتی