تڕەمپیزم، سەرمایەو پارەو دەوڵەت!

‌ئاسۆ عەبدوللـەتیف

کورد دەبێ بەوعەقڵ و لۆژیکە تازەوە سیاسەت بکات و گرنگی بەکارو سەرمایەو پیشەسازی نەوت و کانزاو ئابوری بدات بۆ کڕینی دەوڵەت و پایەکانی، کابینەیەکی شەش حەوت وەزیریی بۆ هەرێم پڕ بەپێستیەتی بەڵام وەزیربن و گزیرنەبن، بڕیاردەربن و بچوک و گرگن نەبن، کاراو چالاک بن، سەرمایەداربن و چاولەدوای موچەو خانەنشینی نەبن، ئیتر کاتیەتی وەبەرهێنان بکەن لە نەوت و پارەو سەرمایەی نیشتیمانی ئەم وڵاتەدا، سەدەیەکە خەبات دەکەین و قسەدەکەین و دەیڕێسین بە شێوازی فەلسەفی و تیۆری و حیزبی و ئەدەبی و ئایدۆلۆژیی جۆراوجۆرو دادی نەبوو، بەراستی شەرمە کورد ئەو هەموو بیرە نەوتەی هەیەو کەچی گلەیی لەدوژمنەکانی بکات، گازندا لە فارس و عەرەب و تورک بکات کە دەوڵەتیان بۆ دروست نەکردین، ئیدی هیچ لاوانەوەو سۆزداری و مێژوویەکی خوێناویی بەکەڵک ناخوا، دەوڵەتت دەوێ دەبێ بەهاو کاریزماو پارەو سەرمایەت هەبێ و پارەبدەی بۆ کڕین و بنیادنانی، پارەبدەی بۆ مانەوەی، پارە بدەی بۆ هاوسەنگی، دەبێ خۆت دەوڵەمەند بکەیت و سەفەقات و بەرژەوەندیی گەورە بخەیتە بەردەم نەهەنگەکانی سیاسەت، لەبری ئەوەی بەدەم توتیە بچوکەکان و خێزانە ئەرستۆکراتەکانی ئەوروپاوە پێبکەنن و پێشوازی شاهانەتان لێ بکەن کە سودێکی نیە بۆ دەوڵەتسازیی، دەی بەئاگابێن و وەرن تۆڕی گەورە هەڵبدەن بۆ ترەمپ و نەهەنگە گەورەکانی دەریا، واز لەو دیبلۆماسیەتە نەزۆکانە بهێنن لێرەو لەوێ، واز لەو لۆبی و مارکێتینگە ئاستنزمانە بهێنن، چیتر هۆتێلی پێنج ئەستێرە بۆ رەمزی ئەکادیمی و سیاسی بچوک مەگرن و مەیانکەن بە وەهم و هالەو کەڵەگای ڕۆژگار، وەرن یاری بکەن بە نەوت و ئیکۆنۆمی و کریدیتی ژێر زەوی کوردستانەکەتانەوە، بەسیەتی گەندەڵی و بەهەدەردان و کات درەنگی کرد، کاتی وەبەرهێنانی عەقڵانیە بەرەو بنیادنان و ئابوری گەورەو سەفەقات و نەوت و فرۆشتنی نەوت و گازی سروشتی بەرامبەر بە کڕینی دەوڵەت هیچ نەبێ جارێ وەرن پایەیەکی بکڕن.

 

کورد ئەگەر دەوڵەتی دەوێ نابێ ئیتر ئەوەندە ملکەچانە خۆی بچوک بکاتەوە هەمیشە لەهێڵی بەرگری و پاڕانەوەدا بێت، دەبێ دۆخی دەرونناسیانەی ستەمکاری سایکس بیکۆو لۆزان و سەعدئابادو جەزائیرو شۆڕشە خوێناویەکان تێپەڕبکات بەرەو سەقامگیریی دارایی و بانکی و ئابوری نەوتی و دەوڵەتیانە لە جیهاندا، وزەو گازە سروشتیەکەی بەهەدەر نەدات بۆ ئەم دەوڵەت و ئەو دەوڵەت، تا فۆڕمۆڵەی سیمایەکی حکومەتداری ڕاقی پێ بکات.

ئەمریکاو چین سەرباری ئەوەی ئیمپراتۆری زەبەلاحی جیهانن و خاوەنی نەهەنگە گەورەکانی ئابوری بازاڕو دۆلارو پیشەسازین، کەچی لەم خاک و خۆڵەی کوردستان و ئەو بیابانە وشکەی عەرەب و ئەو زەویە بەپیتانەی ئەفریقای ڕەشدا خەریکی دۆزینەوەی ڕێگا تازەکانی بازرگانین، بەرەو کان و خان و بیرو سەرچاوە گازیەکان و نەختینەو دراوی زەمانکراو، کێ هەیەتی کڕیارێکی باشن بۆی کێش نییەتی و خەریکی پیشەسازی چەکبازیی و دیبەیت و ئایدۆلۆژیاو کتێب و زانکۆن، یان برسین یان بێبەرین لەو باوکە قازانجویستەو ئەبێ سەدساڵی تر ڕابکەن بەشوێن دەوڵەتدا.