ڕۆڵی لاوازی میدیا لە ئاشکراکردنی ناشیرینی کۆمەڵگا و نەبوونی ئامانج و پەیامێکی ئەرێنی

میدیا وەک یەکێک لە پایە سەرەکییەکانی پەیوەندی مرۆیی و کۆمەڵایەتی، ڕۆڵێکی زۆر گرنگ دەگێڕێت لە  ئاراستە کردن و داڕشتنی بیر و ڕەفتاری کۆمەڵگا. بەڵام لەم چەند ساڵەی دواییدا شاهیدی ئەوە بووین کە بەشێک لە دەزگاکانی ڕاگەیاندن، جا بە مەبەست بێت یان بێمەبەست، لەبری ئەوەی باس لە پرسە ئەرێنییەکان بکەن و کۆمەڵگا هان بدەن، زیاتر سەرنجیان لەسەر ئاشکراکردنی ناشیرینی و نائاساییە کۆمەڵایەتییەکانە. ئەم ڕێکارە نەک هەر دەبێتە هۆی تێکچوونی مۆڕاڵی گشتی، بەڵکو دەتوانێت کاریگەری نەرێنی لەسەر ڕەفتار و هەڵوێستی تاکەکەسی و دەستەجەمعی هەبێت.

یەکێک لە کێشە سەرەکییەکانی میدیا بەتایبەت لە هەرێمی کوردستان، نەبوونی پەیام و ئامانجێکی ڕوونە لە ناوەڕۆکی بەرهەم هێنراودا. زۆرێک لە دەزگاکانی ڕاگەیاندن لەبری دابینکردنی چارەسەر و هاندانی دەستکاریکردن یان دۆزینەوەی چارەسەر بۆ ڕەفتارەکان ، تەنها ناشیرینی و نائاسایی ئاشکرا دەکەن. ئەم شێوازە لە کارکردنە دەبێتە هۆی ئەوەی بینەران و بیسەران  هەست بە بێهیوایی و نائومێدی بکەن و دەستبەرداری هەوڵدان بۆ باشترکردنی دۆخی خۆیان و کۆمەڵگا بن.

ئاشکراکردنی نادادپەروەرییەکان بەبێ پێشکەشکردنی چارەسەر دەتوانێت ببێتە هۆی وێنەیەکی نەرێنی و شێواوی کۆمەڵگا. ئەمەش نەک تەنها متمانەی گشتی بە میدیا کەمدەکاتەوە، بەڵکو دەتوانێت هەستی بێمتمانەیی دروست بکات و گرژییە کۆمەڵایەتییەکان زیاتر بکات. لەڕاستیدا پێویستە میدیا وەک پردێک لە نێوان خەڵک و دەسەڵاتدا مامەڵە بکات و لەبری ئەوەی تەنها ڕەخنە بگرێت، پێوسیتە چارەسەری کردەیی و ئەرێنی بخاتەڕوو.

بۆ ڕاستکردنەوەی ئەم دۆخە، پێویستە ڕاگەیاندن ڕێکار یاخود شێوازی کارکردنی خۆی بگۆڕێت و تیشک بخاتە سەر لایەنە ئەرێنییەکانی کۆمەڵگە و سەرکەوتنی تاکەکان، نەک سەرنجی لەسەر ناشیرینەکان بێت. ئەم گۆڕانکارییە دەتوانێت دروستکردنی ناوەڕۆکێکی جەوهەری  لەخۆبگرێت کە هاندەری دەستپێشخەری ئەرێنی، چیرۆکی سەرکەوتن و ئەزموونی پەروەردەیی بێت. هه ڕوه ها میدیا ده توانێت به هاوکاری له گه ڵ دامه زراوه کۆمه ڵایه تی و پەروەردەیی ورۆشنبیری و کولتوورییه کاندا هاوکار بێت بۆ به ڕه وپێشبردنی کولتووری هاوپه یمانی و هەماهەنگی و هاوکاری له کۆمه ڵگه دا.

بێگومان ڕۆڵی میدیا لە داڕشتنی هەڵوێست و ڕەفتارە کۆمەڵایەتییەکان حاشا هەڵنەگرە. بە گۆڕینی ڕێکارەکان لە ئاشکراکردنی ناشیرینییەوە بۆ پێشکەشکردنی پەیام و چارەسەری ئەرێنی، دەتوانین یارمەتیدەر بین لە باشترکردنی دۆخی کۆمەڵگا و زیادکردنی هیوا و پاڵنەر لەنێو تاکەکاندا. پێویستە میدیا وەک هێزێکی ئەرێنی و بنیاتنەر لە کۆمەڵگادا مامەڵە بکات، ڕۆحی هاوکاری و هاوکاری پەروەردە بکات نەک بەرەوپێشبردنی نائومێدی و وێرانی ..

PM:01:57:18/04/2025

ئه‌م بابه‌ته 736 جار خوێنراوه‌ته‌وه‌‌

هەموو وتارەکان کاتێک لە وێستگە نیوز بڵاودەبێتەوە تەنها بیروبۆچونی خاوەنەکانێتی