بەڵێن گیان، بەڵێن نەبو ، وا زو کۆڕی هاوڕێیان چۆڵ کەیت

دوێنێ یەکێك بو لەو رۆژە سەختانەی کە  لە ناکاو لە سایتی وێستگە نیوز هەواڵی جەرگبڕی مەرگی کاک بەڵێنی حاکم  ئەحمەدم کەوتە بەرچاو .سەرەتا هەوڵم دا  وا لەخۆم بگەیەنم کە لێدوانێکی بەڵێن خۆیەتی لە بارەی بڕیارەکەی سەرۆك ترامپ بۆ راگرتنی پشتیوانیی فیدراڵیی لە دەنگی ئەمریکا ، بەڵام بەداخەوە وا نەبو ،هەواڵی مەرگی ناوادەی بەڵێن  احمد  صالح بو.

بەڵێن لە قۆناغی ناوەندیی و نیوەی ئامادەیی هاوڕێم بو . بۆ یەکەمینجار کە لە سانەوی صلاح الدین بینیم  زو لەیەکتر گەیشتین .
ئەو کوڕی  دادوەرێکی ناسراو و دیاری شارەکەمان بو ، لە گەڕەکێکدا دەژیا کە میللی نەبو ، هەمو شتێکی جیاواز بو لە زۆربەمان ،کەچی  خەسڵەت و سروشتێکی وای هەبو وەک ئەوەی  لەگەڕەکێکی میللیدا بژی.

دیار بو  هەر بە تەنیا پەروەردەی سیاسیی ئەوکاریگەرەی نەبوە   لەسەری    ،بەڵکو پەروەردەی خێزانەکەشی رۆڵی گرنگی هەبوە کە هەرگیز خۆی لەوانیتر جیا نەکاتەوە.

 کاتێك لە یەکتری تێگەیشتین کە هەردوکمان  خولیای جیهانی کتێب و خوێندنەوەین ، لەیەکترییش ئاشکرا بوین کە   هەردوکمان ئاشناین بە رێبازێك ،ئیتر پەیوەندییەکەمان زیاتر بەهێز بو.

بەڵێن لە جیهانە ناجدییە هەمیشە پێکەنینەکەیدا  لەگەڵ رەوانشاد رزگار عپمان صابر کە ئەویش لە خێزانێکی  ناسراو و دەوڵەمەندی سلێمانی بو ، بەردەوام داهێنانی  هەبو لە نوکتە و گاڵتەو گەپ و قسەی ناجدیی دا ، لەولاشەوە لە جیهانی ئەدەب و سیاسەتدا شاسوارێکی بێ وێنە بو.

کاکە بەڵێن پاشخانێکی روناکبیریی وا بەهێزی هەبو  کە  حەزی دەکرد هەمیشە لەو خوێندکارانە نزیك ببێتەوە و ببێت بە هاوڕێ یان کە زۆر هەژار بون ، ئەوەش خاڵێکی بەهێز بو کە کەسێکی خۆشەویست بێت لە ناو خوێندکارەکاندا ،هەر ئەوەش کردیە ئەو بەڵێن احمدەی کە ئەمڕۆ هەموان  غەمبارن بەو سەفەرە ئەبەدییەی .

بەڵێن گیان ئێستاش دیمەنی  ئەو رۆژگارەم لە بەر چاوە کە وەستاویت لە ناوماندا  و گفتوگۆکانی کۆڕەکەمانت گەرم دەکرد و  بە پرسیارێك مەسەلەیەکی نوێت دەهێنایە پێشەوە  جا  لەبارەی ئەدەبەوە  یا سیاسەت بوبێت ،کە لە تەواوی پشوەکانی دوای وانەکان هەمومان لە بەردەم محاجەرەی  بەردەم پۆلەکەماندا  کۆدەبوینەوە بۆ تەواوکردنی باسەکە ،  میسکی خیتامیش نوکتە یا قسەیەکی ناجدیی  خۆت  و کاکە رزگار بو.

راستە بارودۆخەکان لە یەکتری دابڕاندین بەڵام دوای راپەڕینی ئازاری ١٩٩١ جارێکی تر پێك شاد بوینەوە ، کە لە ئەمریکاش بویت لەرێی فیسبوکەکەتەوە هەر بەردەوام بوین.

ئەمڕۆش کە ئەم چەند دێڕە وەك بەشێکی بیرەوەرییەکان لە خەسڵەتە جوانەکانت دەنوسم هەروا دەزانم لە پۆلەکانی خوێندنگاکە یا لە کۆڕ و سیمینارەکانی ئەوسای سلێمانی لەگەڵ یەکتردا قسە دەکەین و جاروبار گاڵتەوگەپێك دەخەیتە  نێو قسە جدییەکانمان.

 خۆزیا بمان توانیایە پێت بڵێین بەڵێن گیان سەفەر مەکە ، لە کۆپلە ی شیعر و پەخشانە کورتەکانی فیسبوکەکەت بێ بەشمان مەکە.

PM:08:48:02/04/2025

ئه‌م بابه‌ته 324 جار خوێنراوه‌ته‌وه‌‌

هەموو وتارەکان کاتێک لە وێستگە نیوز بڵاودەبێتەوە تەنها بیروبۆچونی خاوەنەکانێتی