لە شاخ خوێنی یەکتر دەڕێژین و لە شاریش خزمی یەکین!!
سەعید کاکەیی
ساڵی ١٩٨٣، دوای خۆپیشاندانی خوێندکارانی زانکۆی سەلاحەددین—کە زانکۆی سلێمانی بوو گواسترابوویەوە بۆ ھەولێر—لە ڕێگای ھاوسەری یەکممەوە و بە حوکمی ئەوەی کە خزمی یەکتربوون کاکە بەڵێن ئەحمەدم ناسی. ھاوسەری یەکەمم بە کاکە بەلە ناوی دەبرد و منیش ھەر بەو ناوە خۆشەوە ناوم دەبرد. ئەوێ ڕۆژێ من ئەفسەری یەدەکی سوپای عێراق بووم و توانای ئەوەم ھەبوو پسوولەی مۆڵەتی فەرمی سەربازیم (الاجازات الرسمیة العسکریة) دەستکەوێت. زۆربەی ئەو پسوولانەم دەبەخشییە شەھیدی کاکم، ملازم مەجید کاکەیی کە لە ساڵی ١٩٨٩دا لە ئەمنە سوورەکەی سلێمانی شەھیدکرا چونکە سەرکردەیەکی دیاری حزبی سۆسیالیستی کوردستان بوو. ئەوەی دەمایەوە، دەمبەخشییە ژنبراکەم کە ئاسۆی ئیسماعیل ڕەشان بوو، ئەویش جگە لە خۆی و ھەڤاڵەکانی کە سەربە کۆمەڵە بوون، سوودیان لەو مۆڵەتانە دەبینی بۆ جێبەجێکردنی چالاکیی ژێرزەمینی حزبەکەیان لەناو شاری سلێمانیدا.
ڕۆژێکیان و لە مانگی دوانزەی ساڵی ١٩٨٣، من و ھاوژینەکەم لە تووی مەلیكەوە بەرەو ناوبازاڕ دەھاتینە خوارەوە. نزیك لە چوارڕیانی برایم پاشا ھاوژینەکەم پێی وتم ئەوە بەڵێنی پورە ڕووناکەو پێموتووە کە چەند مۆڵەتێکی سەربازیت بۆ پەیا ئەکەم، تۆ ھیچێك لەو مۆڵەتانەت پێیە ئێستا؟
منیش پێموت: بەڵێ.. نزیکەی دە دوانزەیەکم پێیە. ھەر لەوێ دوای چۆنی و چاکی لەگەل کاکە بەڵێن، تێكڕای ئەو مۆڵەتانەم پێی بەخشی کە بە من بوون. کاکە بەلە بە پێکەنینەوە پێی گووتم: سەیرە! لە شاخ خوێنی یەکتر دەڕێژین و لە شاریش دۆست و خزمی یەکین!! خوایە ئاوێ بەو ئاگری یەکتر کوژییەدا بکەیت.
ئەوەیان یەکەمجار و دواجارم بوو کاکە بەلە لە کوردستاندا ببینم و دواجاریش لە واشنتۆن دوای چەندین ساڵ چاوام بە زاتیان گەش بوویەوە، بەتایبەت دوای ئەوەی لە فەرجینیا نشتەجێبوویەوە و بووە کارمەندی دەنگی ئەمریکا.
روحی بەرزەفڕت شاد بەلە گیان.. خۆزگەم بەو ڕۆژەی یەکترمان بینی و....
.
AM:08:13:02/04/2025
ئه‌م بابه‌ته 10720
جار خوێنراوه‌ته‌وه
هەموو وتارەکان کاتێک لە وێستگە نیوز بڵاودەبێتەوە تەنها بیروبۆچونی خاوەنەکانێتی