كورسیەكەی بەڵێن ساڵح

دوای 26 ساڵ كاری رۆژنامەوانی لە دەنگی ئەمریكا (1999-2025) دواجار كورسیەكەی بە چۆڵی مایەوە، بەڵێن بەو تەمەن و ئەزمونە زۆرەیەوە،  26 ساڵ بوو  لەدەنگی ئەمریكا كاری دەكرد لەیەككاتدا پێشكەشكار و بێژەر و ئامادەكار و هەواڵ سازو ئامادەكاری  راپۆرتی رۆژنامەوانی بوو،  كەم رۆژنامەنووس هەیە بەو ووزەو جدیەتەوە كاربكات،، كەم رۆژنامەنووسیش هەیە بەركەوتەی لەگەڵ زمانە شیرینەكەیدا نەبووبێت (روحەكەم).....

مانگی ئابی ساڵی رابردوو چوومە واشنتۆن، رۆژانە نامەی دەنارد (روحەكەم كەی دەگەیت و با زوو یەك ببینین)، دواجار رێككەوتین 23ی ئابی 2024 من دەگەمە واشنتۆن و لەگەڵ كاك هێمن بەرزنجی گەیشتینە ئۆفیسی سەرەكی دەنگی ئەمریكا، بەداخەوە كاك بەڵێن لەوێ نەبوو، هێرۆ زەنگەنە وتی ئەوە شوێنی كاركردنێتی ئەویش كورسیەكەیەتی چۆڵە، بەڵام بەداخەوە لەم وەرزەدا كۆرۆنای گرتووەو هیلاكە، منیش بە مۆبایلەكەی خۆم وێنەی شوێنی كاركردنی و كورسیە چۆڵەكەیم گرتوو بۆ كاك بەڵێنم نارد، ئەویش بە ڤۆیسێك وەڵامی دامەوە (قوربانی تۆم كاكە حەمە گیان بەڕاستی مەحجوبم ئیدی چیبكەین كاكە كە نەخۆشی هات دەسەڵات نیە ئیتر نازانم ئەم كۆرۆنایە لەكوێوە بۆم هات نەمزانی، گرنگ ئەوەیە تۆ بێوەی بێت و سەركەوتوو بیت   رووحەكەمە ......)

كەم رۆژنامەنووس هەیە دوای 26 ساڵ كاركردن لە دەزگایەكدا هەموو رۆژێك وەك ئەوەی سەرەتای كاركردنی بێت بەو گەرم و گوڕی و زەوق و سەلیقەیەوە، هەركات تەلەفۆنی دەكرد یان بۆ دەستكەوتنی هەواڵ یان بۆ میوان پرسی دەكرد  وات دەزانی یەكەم جارە بەو شەوق و گەرموگوڕیەوە كاری رۆژنامەوانی دەكات، ئەو رۆژانە لە شاشەو وێبسایتی  دەنگی ئەمریكا دەمانبینی  (هەواڵی پێشكەش دەكرد و لەهەمانكاتدا پێشكەشكاریش بوو) لە پشتیشەوە رۆژانە هەواڵ و راپۆرتی امادە دەكرد، شاعیر و نوسەرێكی بەسەلیقەبوو، كەم كەس هەیە لەو تەمەنەدا وا گەرم و گوڕو گورج و گوڵ و لەهەمانكاتدا كارەكەی بەو رادەیە خۆش بوێت ...... ئەو كورسی رۆژنامەنووسیەكەی جێنەهێشت، بەداخەوە بە ئارامی و بە بێدەنگی جێی هێشتین بەبێ ئەوەی كەسمان دڵمان لێی زویر بووبێت ......

بەڵێن ساڵح خۆی دەڵێت:

- ساڵی 1961 لە شاری هەڵەبجەی کوردستانی ئێراق لەدایک بووم، ئەو کاتە باوکم لەو شارەدا فەرمانبەر بوو.

- هەر بەهۆی کارکردنی باوکمەوە پۆلی یەکەمی سەرەتاییم لە شاری شەقڵاوە ی پارێزگای هەولێر تەواوکردووە، پۆلی دووش لە هەڵەبجە و دواتر لە خوێندنگەکانی بێکەس و گۆران لە شاری سلێمانی قۆناغی سەرەتاییم تەواوکرد.

- قۆناغی ئامادەییم لە هەردوو ئامادیی سەڵاحەدین لە شاری سلێمانی و دواناوەندی ڕانیە لە شاری ڕانیەی بناری کێوەڕەش خوێندووه.
دوا قۆنا غی خوێندنیشم لە بەغدا، لە پەیمانگەی بەڕێوەبردنی ڕەسافە تەواوکرد.

- لە سەرەتای ساڵانی هەشتاکانی سەدەی ڕابردووەوە، سەر و سەودام لەگەڵ نووسیندا پەیداکرد و ئێستاشی لەگەڵدا بێت هەڵبەست بەشێکی دانەبڕاوە لێم.

- خوێندنەوەی هەڵبەستەکانی مەحوی لای من تام و چێژێکی سۆفیانەم دەداتێ، کە ڕێک و ڕەوان دەمکاتە دەروێشێکی حاڵگرتوی ناو ئەم خانەقا پاکیزەییەی هەڵبەست.

- لە سەرەتاکانی ساڵانی نەوەتەکانەوە دەستم کردووە بە کاری ڕۆژنامە گەری و لە ژمارەیەک گۆڤار و ڕۆژنامە و ڕادیۆ و تەلەڤزیۆنی هەرێمی کوردستانی ئێراقدا کارم کردووە.

- لە ساڵی 1996 دا هەوارم گواستەوە بۆ وڵاتە یەکگرتووەکانی ئەمریکا و لێرەش لە مانگی 12ی ساڵی 1999 و کارمەندم لە بەشی کوردی دەنگی ئەمریکا

- لە رۆژی 2025/3/30 لە واشنتۆن بە جەڵتە كۆچی دواییكرد

(لە ویكیپیدیا وەرگیراوە)

PM:06:41:01/04/2025

ئه‌م بابه‌ته 3112 جار خوێنراوه‌ته‌وه‌‌

هەموو وتارەکان کاتێک لە وێستگە نیوز بڵاودەبێتەوە تەنها بیروبۆچونی خاوەنەکانێتی