ئەمەیە چێژو لەزەتی دانیشتنە خێزانییەکانى ڕۆژى جەژن

لەکت و پڕێکدا دەرگاى قسە دەکرێتەوە هەروەک چۆن دەرگای پەنجەرەکان بۆ هاتنە ژوورەوەی هەواى پاک واڵا دەکرێن!! بەڵام جیاوازییەکە ئەوەیە هەواى پەنجەرەکان بوژێنەرەوەن , بەڵام قسە و باسەکانى دانیشتنەکانى جەژن سەرسام هێنەرن ، لەڕۆژانى جەژندا هەمووان پێکەوە دادەنیشن و شوێنی خۆیان دەگرن بێ ئەوەی پێشتر شوێنی تایبەتیان بۆ خۆیان گرتبێ و تەرتیباتی پڕۆتۆکۆڵیان ئەنجامدابێت.

گەورە فەتوا دەدات و بڕیار دەردەکات  ، بچووکەکانیش کۆمێنت دەدەن  ، میوانەکانیش لەو نێوانەدا بوونەتە بەشێکی نیقاش و بابەت و قسە و باسە گەرمەکان ! بابەتەکان سەرەتا بەچیرۆکی بوکی دراوسێیەکى نەناسراو دەست پێدەکەن ، دوایی سەردەکەون و باز دەدەن بۆ نرخی مانگا و گوێرەکە و بزن و مەڕو ماڵات! ئینجا دەگۆڕێ بۆ نرخی دۆلار و تمەن و دینارو پاوەن ، دواتر هەر بەهێواشی سەردەکێشێ بۆ سیاسەت و ئەمریکا و غەززە و حەماس و ڕۆژئاواى کوردستان و موچە و لێدان لە کورە ئەتۆمییەکانى ئێران ، وەک ئەوەی چارەنووسى ئێمە و دنیا و میللەتان هەمووی لەسەر ئەم بابەت و باسانە وەستابێ! لەکتوپڕێکدا یەکێک لە ئامادەبووان وەک ئەوەی -- ئیبنو خەلدون -- مان لێدەرکەوتبێ باسى بیرۆکەی تایبەتی  خەوتنی دواى ئێوارانمان بۆ دەکات  ، لەلایەکی ترەوە یەکێک قسە دەبڕێ و باسى حەزو ئاواتێکی گەورە دەکات کە بریتیە لە  : بەخێوکردن و پەروەردەکردنی هەنگ لە حەوشەى دواوەی ماڵەوە ، ئینجا باس دەبێتە باسى یارییەکی کۆنی نێوان (بەرشەلۆنە و ڕیاڵ مەدرید)!! یەکێک باسی کێڵگەی بەخێوکردنی پەلەوەر دەکات  ، یەکێک باسى شکانى بازاڕی خانوو عەقار دەکات  ، لە لەحزەیەکدا یەکێکی تر هاوار دەکات مۆز بخۆن ، مۆز زۆر باشە بۆ کەمکردنەوەی قەلەقى و ئارامی دەروونی! قسەکان کۆتاییان دێت و هەمووان بێدەنگ دەبن و ئارامی باڵ دەکێشێ ، بەڵام لەچرکەساتێکی چاوەڕوان نەکراودا منداڵێک لەسەرخۆو هێمنانە و جیاواز لەگەڵ ئاست و تەمەنی خۆی دەڵێ  : خوا قەبووڵى بکات! ئەى جەژنانە کوا؟!

باسەکان و چیرۆکەکان هیچ پەیوەندیەک لەنێوانیاندا نیە  ، هیچ ڕێزبەندییەکیان تێدا نیە ، هیچ ئەنجامێکیان نیە  ، کەش و هەواکە سەیرو سەمەرەیە ، بەڵام زۆر زیندووە ، هیچ قسەیەک ڕێخۆشکەر نیە بۆ قسەیەکی تر بەڵام ئاڕاستەیەک دەدرەوشێنێتەوە  ، یان کۆمەڵێک دەهێنێتە پێکەنین  ، یان بزە بۆ لێوی چەندان کەس دەگێڕێتەوە کە ماوەیەکی دوور و درێژ غائب بووە!

سەیرکەن.... لەگەڵ ئەو هەموو قسە و باس و چیرۆک و هات و هاوارەدا کەس نابینی سکاڵا بکات  ، هەمووان دڵیان خۆشە ، هەمووان قسە دەکەن ، کەس نیە گوێ بگرێ کە ئەمەیە کۆڕ و دانیشتنەکانى جەژنی تایبەت و خۆشترو گەرم و گوڕتر کردووە  ! ئەو کۆڕ و دانیشتنانەى کە (ئەحمەد زەییات) گەورە ئەدیب و نووسەری گەورەی میسرى بەمشێوەیە گوزارشتیان لێدەکات و دەڵێت :

( زۆر زەحمەتە قسە و باسە پەرش و بڵاوەکان کۆبکرێنەوە و ڕێکبخرێن ، کاتێک ئەو قسە و باسانە لە کەسانێکەوە بن کە باوەڕیان بەهیچ یاسا و ڕێساو ئەتەکێت و بنەمایەکی نیقاش و گفتوگۆ و قسەکردن نەبێ! هیچ باوەڕێکیان بە ئەمانەتى مێژوو نەبێ  ، وردەکاریى گێڕانەوەکان و ڕووداوەکان ئاگادارنەبن و شارەزا نەبن  ، هیچ مافێک نەدەنە قسەکەر کاتێک قسە دەکات قسەکەی تەواو بکات ، یان بیروبۆچوون و ڕاى خۆى دەرببڕێ ، قسە و باس و چیرۆکی نێو ماڵان لە دانیشتنەکانى ڕۆژانى جەژندا وەک چریکە چریکەی چۆلەکە و باڵندەکان وایە لەنێو دارودرەختی باخ و بێستانەکان ، هەر چۆلەکە و باڵندەیەک بۆ خۆى دەخوێنێ  ، هیچ یەکێک گوێ لەوی تریان ناگرێ!)

ئەم دانیشتنانە هیچ جۆرە زانیارییەکت پێنابەخشن  ، بەڵام گەرم و گوڕو چالاکت دەکەنەوە  ، گەشە بە ڕاوبۆچوونەکان نادەن ، بەڵام پلە و ئاستی خۆشەویستی بەرزدەکەنەوە! جگە لەوەی ئەو هات و هاوارو قسە و دەنگە بەرزو چیرۆکە عەفەویانە تام و چێژێکی تایبەتی خۆیانیان هەیە! لە گەرمەی ئەم مشتومڕانەدا ، ئەم دانیشتنە بە کۆمەڵانەدا ، ئەم باس و خواس و قسە پچڕپچڕانەدا سەکینەت و ئارامییەکی بێ وێنە هەست پێدەکرێ کە وەسف ناکرێ ، شەرح ناکرێ ، هەروەک چۆن خوێندنی باڵندەکان ، چریکە چریکەی چۆلەکەکان فەوزایەکە و ماناکەى نازانرێ ،  بەڵام لەزەت و خۆشی و ئارامی بە گوێکانمان دەبەخشن.

PM:08:48:30/03/2025

ئه‌م بابه‌ته 1064 جار خوێنراوه‌ته‌وه‌‌

هەموو وتارەکان کاتێک لە وێستگە نیوز بڵاودەبێتەوە تەنها بیروبۆچونی خاوەنەکانێتی