(بێ نازیی خێوەتگەی مانگرتوان) نەبوونی ئۆپۆزسیۆنی ڕاستگۆو ڕاستەقینەی سەلماند!

ئاشكرایە لە هەموو وڵاتێكی جیهاندا لایەنی دەسەڵات ئەركی ڕاپەڕاندنی كاروباری هاونیشتمانیان و پاراستنی مافەكانیان و دەستەبەر كردنی ئاسایش و ئارامی بۆیان لە ئەستۆ دەگرێت! هەروەها بەپێی سروشت و جۆری سیستمی سیاسی و ئاستی پیادەكردنی فەزای دیموكراسی یاساو ڕێساكان دادەڕێژرێن و جێبەجێ دەكرێن، ئەمەش بە ئامانجی پاراستنی ماف و ئازادییەكان و ڕێكخستنی پەیوەندییەكانی نێوان تاكەكانی كۆمەڵگە و دەسەڵات و، ڕێگریكردن لەبێ سەروبەریی و بڵاوبوونەوەی فەوزا و پاشاگەردانی و  تێكچوونی ئاسایشی گشتی!

ئەگونجێ هەندێ جار كەسانێك یان چەند دەستە و تاقم و لایەنێك لێرەو لەوێ بەو یاساو ڕێسایانە ڕازی نەبن ، یان لەسەر شێوازی جێبەجێكردن و دابەزاندنی ئەو یاسایانە بۆ نێو ژیانی واقیعی كۆمەڵگە ڕاوبۆچوونی جیاوازیان هەبێت كە ئەمەش سەرهەڵدانی دیاردەیەكی سیاسی نوێی لە فەزای گشتی وڵاتدا لێدەكەوێتەوە كە پێی دەوترێ  :  دیاردەی ئۆپۆزسیۆن بوون.

ئەڵبەت پسپۆڕان و شارەزایانی بواری سیاسەت قسەی زۆریان لەسەر ئەم دیاردەیە كردووە ، هەروەها پێناسەی جۆراوجۆریان بۆ وشەی ئۆپۆزسیۆن داڕشتووە كە گرنگترینیان و نزیكترینیان ئەوەیە :  ئۆپۆزسیۆنی سیاسی بەرانبەرە لەگەڵ دەسەڵاتی سیاسی لە هەردوو ڕووی پڕۆژە و ئامانجەوە ، هەندێكیان دەڵێن  :  ئەم دەستەواژەیە لە بنەڕەتدا وشەیەكی لاتینیە كە بریتیە لە (oppositus) و واتای گێچەڵ دروستكردن یان وەستانەوە دژی حكومەت دەگەیەنێ.

بێ گومان دیمەنی سیاسی هیچ وڵاتێك كە سیستەمی دیموكراسی پەیڕەو بكات تەواو نابێت ئەگەر ئۆپۆزسیۆنێكی نیشتمانی ڕاستگۆ و ڕاستەقینە لەو وڵاتەدا بوونی نەبێت و ، لە پەرلەماندا فراكسیۆنێكی پەرلەمانیی نوێنەرایەتی نەكات!
ئەڵێم (ئۆپۆزسیۆنێكی ڕاستگۆ و ڕاستەقینە) چونكە هەندێك لەو حیزب و لایەنە سیاسیانەی كە لە قۆناغە جیاوازەكاندا بانگەشەی ئۆپۆزسیۆن بوونیان كردووە یان ئێستا ئەو بانگەشەیە دەكەن لە ڕاستیدا ڕاستگۆنەبوون یا نین و ، ئۆپۆزسیۆن بونیان وەك ئامڕازێك و كارتێكی فشار بۆ دەستكەوتی حیزبی و تەنگەتاوكردنی حكومەت و دەسەڵات بەكارهێناوە  یان دەیهێنن!

جۆرێكی تر لە ئۆپۆزسیۆن هەیە ئەركی تەنها دەربڕینی هەڵوێستی ڕەخنەگرانەیە لە ڕاگەیاندنەكان و تۆڕە كۆمەڵایەتیەكان و، قەت توانای دەرچوونی لەو فەزایە نیەو، ناتوانێ دابەزێتە شەقام و بەشێوەیەكی ڕێكخراو و تۆكمە و نەخشە بۆ داڕێژراو ڕووبەڕووی دەسەڵات ببێتەوە!

بەڕاستی شەرمەزارییە .. چونکە ئەوەی کە بینیمان لەو حیزب و لایەن و سەرۆک و سەرکردەکانیانەوە هیچ نەبوو تەنها بەیاننیامەکی لاواز ،  یان لێدوانێکی شەرمنانەی بێ ماناو بێ کاریگەر نەبێ  ،  کە ئەویش لەدوا لەحزەکاندا هات ، واتە دوای ڕاگەیاندنی ڕێکەوتنی شاندی هەرێم و بەغدا لەسەر چارەسەرکردنی کێشەی مووچە !!!!

دەتوانم بڵێم  :  ئێستاکە  ئیتر جەماوەر مافی خۆیەتی متمانەی بە هیچ یەكێك لەم ڕەنگ و فۆڕمانە نەبێ  كە  لە ڕاگەیاندنەکانەوە لاف و گەزافی ئۆپۆزسیۆن بوون  لێ دەدەن  ، چونكە هەموویان بە لای هاوڵاتییەوە بە فیعلی و بە واقیعی جار دواجار  تاقیكراونەتەوەو تاقی دەکرێنەوە  ، بۆ جەماوەر ئاشکرا بوو کە زۆربەیان خاوەن هیچ گۆشە نیگا و بەرنامەیەكی سیاسیی چاكسازیی تۆكمەی ئەوتۆ نەبوون و نین ، بەدرێژایی قۆناغەكانی ڕابردووش  هیچ شتێكیان نەگۆڕیوە و  ،  بارودۆخەكەش نەک وەك خۆیەتی ،  بەڵكو خراپتر لە جاران قەیرانەكان درێژەیان هەیە و  ،  بێ هیوایی و  ڕەشبینی و بێ ئومێدیی بەرانبەر بەم جۆرە ئۆپۆزسێۆنە زیاتر توندتر دەبێ و پەرە دەسێنێ !

ئەو حیزب و لایەنانەی كە ئێستا لە ساحەی سیاسی كوردستاندا وەك بەرەی ئۆپۆزسیۆن و جەماوەری ناڕازیی  خۆیان نمایش دەكەن و ، هەر لە ئێستاوە بە دروشمی درۆ و ساختە هەڵپەو بەرنامەسازیی بۆ كۆكردنەوەی دەنگ دەکەن بۆ هەڵبژاردنە پەرلەمانیە چاوەڕوانکراوەکەی عێراق  ، هەمان تایپە كۆنەكانن و هەمان سیاسیی و دەم و چاوە سواوەکانی ڕابردوون كە لای جەماوەر نەیانتوانیوە هیچ  دەستكەوتێكی گەورەی نەوعیی بەدەست بهێنن و  ،  نەیانتوانیوەو ناشتوانن  لە داهاتوودا هیچ جۆرە گۆڕانكارییەكی ڕیشەیی لە سیستەمی حوكمڕانیی و فەرمانڕەوایی لە كوردستاندا بهێننە كایەوە  ، بە مانایەكی تر واتە لە كوردستاندا تا ئەم چركە ساتەش هیچ ئۆپۆزسیۆنێكی نوێی ڕاستەقینەی ڕاستگۆی جێی ئومێدو متمانە ،  چ لەڕووی بەرنامە و پرۆژەوە ،  چ لەڕووی پارت و  كاراكتەرە پێشكەش كراوەكانەوە بەدی ناكرێ!

PM:11:37:03/02/2025

ئه‌م بابه‌ته 1340 جار خوێنراوه‌ته‌وه‌‌

هەموو وتارەکان کاتێک لە وێستگە نیوز بڵاودەبێتەوە تەنها بیروبۆچونی خاوەنەکانێتی