دامه‌زراوه‌ی ئه‌تۆمی ئێران: پیتاندنی یۆرانیۆم لەوێستگەی نه‌ته‌نز بەردەوامە

‌ وێستگه‌ی ئه‌تۆمی نه‌ته‌نز له‌ئێران

وێستگەنیوز-

دوای ئەوەی 11ی ئەم مانگە بەشێک لە تۆڕی دابەشکردنی کارەبا له‌ وێستگه‌ی ئه‌تۆمی نه‌ته‌نز له‌ئێران تەقییەوە و ئەو وڵاتەش ئیسرائیلی بە تەقینەوەکە تۆمەتبارکرد، ئەمڕۆ سێشەممە دامه‌زراوه‌ی ئه‌تۆمی ئێران رایگەیاند، وێستگەکە زیانی پێنەگەیشتووە و لەکارکردن بەردەوامە.

عەلی ئەکبەر ساڵحی، سەرۆکی دامه‌زراوه‌ی ئه‌تۆمی ئێران بەرۆژنامەنوسی وڵاتەکەی راگەیاندوە، لەئێستادا کارەبا گەیەنراوەتەوە بە بەشە خێراکانی وێستگه‌ی ئه‌تۆمی نه‌ته‌نز له‌ پارێزگای ئه‌سفه‌هان و لەماوەی چەند رۆژێکیشدا کارەبا بۆ تەواوی وێستگەکە دابین دەکرێت.

ئاماژەی بەوەشکردوە، لەئێستادا بەشێکی بەرچاو لەکارکردنی وێستگەکە خراوەتەوە سەر کار و پیشەسازی ئەتۆمی لەکارکردن بەردەوام دەبێت، پلانی ئەوەشیان هەیە لەماوەیەکی کەمدا توانای تەواوی وێستگەکە بەڕێژەی 50% بخەنەوەکار.

جۆین بە لەگەڵ هەواڵە بەپەلەکانی وێستگە نیوز لە تیلیگرام

پەیوەست بەم بابەتەش دوێنێ رۆژنامەی "نیویۆرک تایمز"ی ئەمریکی وردەکاری نوێی لەسەر رووداوەکەی رۆژی یەکشەممە لە نەتەنزی ئەتۆمی ئێران بڵاوکردەوە و لەزاری سەرچاوە ئەمریکییەکانەوە ئاماژەی بەوەکرد، رووداوەکە لە ئاکامی تەقینەوەیەکی بەهێز بوو کە سیستەمە کارەباییە سەربەخۆ نێوخۆییەکانی وێران کردوە کە وزە دەگەیەنێت بە ئامێرەکانی سەرنتەرفیوجی ژێر زەوی و بەهۆیەوە ئەو وێرانکارییەوە گورزێکی بەهێزی گەیاند بە تواناکانی ئێران بۆ پیتاندنی یۆرانیۆم.

باس لەوەشکراوە، گەڕانەوەی وزەی دامەزراوەی نەتەنز رەنگە بەلانی کەمەوە 9 مانگ بخایەنێت.

لای خۆیەوە سەعید خەتیبزادە، وتەبێژی وەزارەتی دەرەوەی ئێران لەکۆنفرانسێکی رۆژنامەنوسیدا رایگەیاند، "ئەوەی لە  وێستگه‌ی ئه‌تۆمی نه‌ته‌نز رویداوە هێرشێکی تیرۆرستی بوە لەسەر خاکی ئێران و ئێمە لەچوارچێوەی یاسا نێودەوڵەتییەکان مافی وەڵامدانەوە بەکاردەهێنین".

ئاماژەی بەوەشكرد، "لەکات و شوێنی گونجاودا وەڵامی ئیسرائیل دەدەینەوە".


هـ.هـ


AM:08:48:13/04/2021


ئه‌م بابه‌ته 1168 جار خوێنراوه‌ته‌وه‌‌



لێرەوە کۆمێنت بنوسە لە فەیسبوک دەردەکەوێت