ئەو ژنەی لەبۆردومانەكەی توركیا لەكونەماسی قاچێكی لەدەستدا، ئێستا ژیانی چۆنە؟


وێستگە نیوز- پشتیوان جەمال
ئەو، هەرچەندە قاچێكی لەدەستداوە و تائێستاش ئاسەواری سووتان بەدەستەكانییەوە هەر ماوە، بەڵام هێشتا بە ورەیەكی بەرزەوە لەژیان دەڕوانێت و دەڵێت "مادام هاوسەر و منداڵەكانم لەژیاندا ماون، ئاساییە قاچێكیشم لەدەستداوە".

ئەوە چیرۆكی پەیمان تاڵیبە، ئەو ژنە تەمەن 32 ساڵەی بەهۆی بۆردومانی فڕۆكەی بێفڕۆكەوانی توركیا لەهاوینی ساڵی رابردوو لەسەیرانگەی كونەماسی نزیك شاری سلێمانی قاچێكی لەدەستدا و بەسەختیش برینداربوو، هەر لەو رووداوەدا هاوسەر و دوو منداڵەكەشی برینداربوون، بەجۆرێك هاوسەرەكەی چەند پارچەیەك چووە جەستەی و كوڕەكەشی پارچەیەك لەمێشكیدا ماوە.

ئێوارەی 25ی حوزەیرانی 2020 كاتێك گەشتیارێكی زۆر لەگوندی كونەماسی بوون بۆ بەسەربردنی كاتێكی خۆش، فڕۆكەیەكی بێفڕۆكەوانی توركیا دوای چاودێریكردنی ئوتومبیلێكی گەریلاكانی پارتی كرێكارانی كوردستان (پەكەكە) بۆردومانی ئەو ناوچەیەی كرد كە بەهۆیەوە گەریلایەیەك لەنێو دوكانێكی سۆپەرماركێت گیانی لەدەستدا، پەیمان و خێزانەكەشی برینداربوون.

ئەو رووداوە دەنگدانەوەی گەورەی لێكەوتەوە و كار گەیشتە ئەوەی لەپەرلەمانی توركیا وێنەی ئەو خێزانە وەك قوربانییەكی مەدەنی، نیشاندرا و پەرلەمانی ئەو وڵاتەشی هەژاند، بەڵام تائێستا نەتوانراوە چارەسەری بنەڕەتی پەیمان بكرێت ئەویش دابینكردنی قاچێكی دەستكردە.

پەیمان دەرچووی بەشی زمانی كوردی زانكۆی سلێمانییە، ساڵی 2012 لەگەڵ كەیوان كاوەی تەمەن 30 ساڵ چوونەتە ژیانی هاوسەرییەوە و باوك و دایكی كوڕ و كچێكن (هەناسە 8 ساڵ، هێژوان 7 ساڵ).

ئێستا پەیمان باری تەندروستی باشترە، بەڵام قاچی چەپی تا نیوەی ناوقەدی بڕدراوەتەوە و تەنها دەتوانێت بە دارشەق و عەرەبانەیەكی دەستكرد هاتووچۆ بكات، بەڵام ئەو رووداوە نەك هەر نەیتوانیوە چۆك بە پەیمان دابدات، بەڵكو هێشتا ورەی بەرزە و بەئومێدێكی زۆرەوە لەژیان دەڕوانێت.

پێش رووداوەكە ئەو خێزانە  دوو خانوویان هەبووە یەكێكیان لەشاری سلێمانی و ئەوەی دیكەش لەگوندی كونەماسی، هەر لەگوندەكەش سۆپەرماركێتێكیان دانابوو، بۆیە لەكاتی كەرەنتینەی ساڵی رابردوو بەهۆی ڤایرۆسی كۆرۆناوە، ئەوانیش چوونەتەوە بۆ گوندەكەیان و خەریكی بەڕێكردنی ژیانیان بوون.


دووری نێوان ماڵی خەزوری پەیمان و شوێنی رووداوەكە تەنها چەند خولەكێكی كەمە و ماڵی خۆیشیان لەنزیك دوكانەكەیانە و بەبەرزاییەوەیە، وەك پەیمان بۆ وێستگە نیوزی گێڕایەوە، رۆژی رووداوەكە لەگەڵ منداڵەكانی لەماڵی خەزوری بوون، بەڵام منداڵەكان داوایان كردووە بڕۆن بۆ دوكانەكەیان، ئەویش بەقسەی كردوون و چوونەتە دوكانەكە، لەو كاتەشدا كە خەڵكانێكی زۆر بۆ گەشت روویان لەكونەماسی كردبوو، هاوسەرەكەی بۆ چەند خولەكێك جێی هێشتوون.

پەیمان وتی "كەسێك هاتە ژوورەوە شتی دەویست، منیش داوام لە كچەكەم كرد باوكی بانگ بكاتەوە، ئەوە بوو هاوسەرەكەم هاتەوە، ئەو كەسە داوای كارتۆنێك هێلكەی كرد، هاوسەرەكەم خەریك بوو بۆی بپێچێتەوە، لەكۆتایی پێچانەوەكەدا بوو، خەریك بوو منیش بگەڕێمەوە، ئەوە بوو رووداوەكە روویدا، ئیتر نەمزانی چی روویدا و كەوتم بە زەویدا".

پەیمان بەردەوام بوو لەگێڕانەوەی ئەو چركەساتە "تا ناو نەخۆشخانەكە هۆشم هەبوو، حەزیشم دەكرد ئاگام لەدۆخەكە نەبێت، چونكە لەفیلمێكی ترسناك دەچوو، تەنانەت لەناو ئوتومبیلی فریاكەوتنەكەشدا ئاگام لەهەموو شتەكان بوو گوێبیستی قسەكان بووم، زانیم لە بەشی خوارەوەی جەستەم شتێك روویداوە، بەڵام تەسەورم دەكرد قاچێكم شكابێت، دوایی مامی هاوسەرەكەم وتی چی هەڵبگرم وا قاچی لێ بۆوە، گوێم لەو قسەیە بوو، بۆیە دواتر لە نەخۆشخانە كە وتیان دەبێت قاچێكی ببڕینەوە شۆك نەبووم، چونكە لەچركەساتی رووداوەكە هەستمكرد قاچم لەدەستداوە".

پەیمان لەكاتی قسەكانیدا لەسەر زەوی دانیشتبوو، لەبەشی پشتەوەشی دارشەق و عەرەبانەی هاتووچۆكەی دانابوو، ئەو هەندێجار بیری ساتەكانی ژیانی لەپێش رووداوەكە و ئێستا دەكات كە چۆن توانیویەتی بەدڵی خۆی خزمەتی منداڵەكانی بكات و خواردن ئامادە بكات و دەڵێت "پێش رووداوەكە هەرچییەكیان بویستایە بۆم دەكرد، هەروەها ئەو خواردنانەی پێویستیان بەسوركردنەوە بوایە دەمكرد، بەڵام ئێستا وەك پێویست ناتوانم، یان بۆ نموونە منداڵەكان لەبەرئەوەی بچووكن هەندێجار بیریان نییە من واملێهاتووە داوای هەندێك شتم لێدەكەن بۆیان بكەم، بەڵام كە پێیان دەڵێم سەیر بكەم چۆنم، ئیتر خۆیان دەیكەن، ئەوە هەستێكی ناخۆشە بۆم".
 
ئەو ژنە وەك زۆربەی ئافرەتانی دیكە پێش رووداوەكە زۆری حەزی لەچوونە بازاڕ بووە بۆ دابینكردنی پێداویستییەكانی، بەڵام ئێستا بەهۆی رووداوەكەوە ناتوانێت وەك پێویست ئەو كارەش بكات، لەو رووەوە دەڵێت "ئێستا یان دەبێت بەئوتومبیل لەدوورەوە داوای پێداویستییەك بكە بۆم بكڕن، یان كاتێك خوشكەكانم دەڕۆنە بازاڕ داوای پێداویستی بكەم كە بە ئینتەرنێت بۆیان بنێرم".

هەرچەندە ئەو رووداوە ئەركی پەیمانی قورسكردووە، بەڵام خۆی وتەنی ئەوەی ئاهێكی بە دڵ و دەرونیدا هێناوەتەوە كەسوكاری خۆی و هاوسەرەكەیەتی و وتی "سوپاس بۆ خوا كەسوكارێكی زۆر باشە هەیە چ ماڵی باوك و خوشك و براكانم، چ ماڵی خەزوریشم كە زۆر موراعات و هاوكاریم دەكەن و سوپاسیان دەكەم".

كەیوان كاوە، هاوكارێكی سەرسەختی پەیمانە و بۆ زۆر شوێن كە پەیمان ناتوانێت بە دارشەقیش هاتووچۆی پێدا بكات، هاوسەرەكەی بە باوەشت دەیبات، پەیمان وتی "زۆر زۆر سوپاسی هاوسەرەكەم دەكەم كە هاوكاری سەرەكیمە، سوپاس بۆ خوا ئێستا لەگەڵ هاوسەر و منداڵەكانم دەژیم، ئەوەی گرنگە كە ئەوان ماون، هەست دەكەم لەدەستدانی قاچم لا ئاساییترە وەك لە لەدەستدانی ئەوان".

لەكۆمەڵگەی زۆرجار روودەدات پیاوان لەبەر هەر هۆكارێك بێت خێزانی دووەم دێننەوە، بۆیە پەیمانیش وەك زۆربەی ژنان لەو گومانە بەدور نەبووە، بەڵام ئێستا زۆر دڵنیایە لەخۆشەویستی هاوسەرەكەی و وتی "لەنەخۆشخانە وتم لەوانەیە هاوسەرەكەم دڵی سارد بێتەوە، بەڵام بەپێچەوانەوە ئێستا لەجاران زۆر باشترە بۆم، بۆیە ئەگەر پێشتر ترسا بم لەوەی هاوسەرەكەم خێزانی دووەم بێنێتەوە، ئێستا ئەو ترسەشم نەماوە، چونكە دڵسۆزییەكانی دەبینم، ئەگەر خوانەخواستە ئەویش وای لێبهاتایە منیش هەمان هەستم بۆی دەبوو، چونكە رۆحیەن دەمەوێت، نەك جەستەییەن".

پەیمان كاتێك روودەكاتەوە گوندی كونەماسی هەرگیز ئەو رووداوەی بیر ناچێتەوە و دەڵێت "نەك هەر ئەو كاتەی كە دەچمەوە لای دوكانەكە ئەو رووداوەم بیر دەكەوێتەوە، بگرە بەردەوام لەخەیاڵمدایە و هەست دەكەم دووبارە دەبێتەوە".

پەیمان پێش رووداوەكە خەونی ئەوە بووە لەبوارەكەی خۆی كە مامۆستاییە بتوانێت پەرە بەتواناكانی بدات و وانە بڵێتەوە، بەڵام ئێستا خەونی بۆتە دروستكردنی قاچێكی دەستكردی باش تا بتوانێت پێداویستییەكانی رۆژانەی بەشێوەیەكی باشتر پێ دابین بكات، ئەوەش لەدەرەوەی وڵاتە. 

ئەو ژنە دەڵێت "چارەسەرەكەم تەنها لەدەرەوەی وڵاتە، چونكە ئەو كەسانەشی لە من خراپتر بوون، لەدەرەوە چارەسەریان بۆ كراوە، بۆیە ئێستا بەهۆی ئەو رووداوەوە لەهەموو روویەكەوە ژیانمان لەخراپیدایە، هاوسەرەكەشم بەهۆی ئەوەی دەبێت ئاگای لە من بێت، ناتوانێت هیچ كارێك بكات".

لەسەرەتای رووداوەكەوە هەندێك بەرپرسی باڵای حكومی هاوكارییان كردوون، بەڵام وەك كەیوان كاوەی هاوسەری بۆ وێستگە نیوزی باسكرد، لەسەرەتای رووداوەكە بەڵێنی 100%یان پێدان چارەسەری هاوسەرەكەی بكەن، بەڵام ئەو بەڵێنانە نەچوونە بواری جێبەجێكردنەوە و هاوكارییەكی كەمیش كران و وتی "هەر ئەو كاتە بەرپرسانی حكومی وتیان چارەسەری پەیمان لەدەرەوەیە و نزیكەی 120 تا 150 هەزار دۆلاری تێدەچێت، ئەوەش لەتوانای ئێمەدا نییە و داوا دەكەم بە هەموو لایەك هاوكاریمان بكەن".

پەیمان هەرچەندە بەرامبەر ئەم رووداوەشی بەسەریاندا هاتووە زۆر بەهێزە و دەیەوێت خۆڕاگر بێت، بەڵام هێشتا لەنێوان ژیانی دوێنێ و ئەمڕۆیدا ناتوانێت باسی رابردوویان نەكات و  دەڵێت "تا پێش رووداوەكە بەختەوەرترین خێزان بووین، بەڵام دوای رووداوەكە ژیانمان 180% گۆڕا!!".



PM:09:49:12/03/2021


ئه‌م بابه‌ته 12336 جار خوێنراوه‌ته‌وه‌‌



لێرەوە کۆمێنت بنوسە لە فەیسبوک دەردەکەوێت